ନୂଆଦିଲ୍ଲୀ, ୭।୯: ବିଶ୍ୱର ସବୁଠାରୁ ବ୍ୟୟବହୁଳ ଟି୨୦ ଟୁର୍ନାମେଣ୍ଟ ଇଣ୍ଡିଆନ୍ ପ୍ରିମିୟର ଲିଗ୍ (ଆଇପିଏଲ୍)ର ତ୍ରୟୋଦଶ ସଂସ୍କରଣ ଲାଗି କାର୍ଯ୍ୟସୂଚୀ ପ୍ରକାଶ ପାଇଛି। ୟୁଏଇରେ ୧୯ ସେପ୍ଟେମ୍ବରରୁ ୧୦ ନଭେମ୍ବର ପର୍ଯ୍ୟନ୍ତ ଖେଳାଯିବାକୁ ଥିବା ଆଇପିଏଲ୍ ସିଜନ-୧୩ର ଉଦ୍ଘାଟନୀ ମ୍ୟାଚ୍ ଚେନ୍ନାଇ ସୁପର୍ କିଙ୍ଗ୍ସ ଓ ମୁମ୍ବାଇ ଇଣ୍ଡିଆନ୍ ମଧ୍ୟରେ ଅନୁଷ୍ଠିତ ହେବ। ମହେନ୍ଦ୍ର ସିଂ ଧୋନୀଙ୍କ ନେତୃତ୍ୱାଧୀନ ଚେନ୍ନାଇ ୩ଥର ଟାଇଟଲ୍ ଜିତିଥିବାବେଳେ ରୋହିତ୍ ଶର୍ମାଙ୍କ ମୁମ୍ବାଇ ଇଣ୍ଡିଆନ୍ସ ୪ଥର ଚାମ୍ପିୟନ ହୋଇଛି। ସେପ୍ଟେମ୍ବର ୧୯ରେ ଆବୁଧାବିରେ ଉଭୟ ଦଳ ଉଦ୍ଘାଟନୀ ମ୍ୟାଚ୍ରେ ପରସ୍ପରକୁ ଭେଟିବେ।
ଇତିହାସରେ ୪ର୍ଥ ଥର ଲାଗି ଉଭୟ ସୁପର୍ କିଙ୍ଗ୍ସ ଓ ମୁମ୍ବାଇ ଇଣ୍ଡିଆନ୍ସ ପରସ୍ପର ଓପନିଂ ମ୍ୟାଚ୍ ଖେଳିବାର ସୌଭାଗ୍ୟ ଲାଭ କରିଛନ୍ତି। ଏଥିପୂର୍ବରୁ ୨୦୦୯, ୨୦୧୨ ଓ ୨୦୧୮ରେ ଏହି ଦୁଇ ଦଳ ମଧ୍ୟରେ ଉଦ୍ଘାଟନୀ ମ୍ୟାଚ୍ ଅନୁଷ୍ଠିତ ହୋଇଯାଇଛି। ଏହି ୩ଟି ମ୍ୟାଚ୍ ମଧ୍ୟରୁ ରୋହିତ୍ଙ୍କ ଦଳ ୨ଥର ଜିତିଥିବାବେଳେ ଧୋନୀଙ୍କ ଚେନ୍ନାଇ ଥରେ ବାଜିମାତ୍ କରିବାରେ ସଫଳ ହୋଇଥିଲା। ୨୦୦୯ରେ ଅନୁଷ୍ଠିତ ମ୍ୟାଚ୍ରେ ମୁମ୍ବାଇ ୧୯ ରନରେ ଚେନ୍ନାଇକୁ ପରାସ୍ତ କରିଥିଲା। ଏହାପରେ ୨୦୧୨ ସଂସ୍କରଣ ପ୍ରଥମ ମ୍ୟାଚ୍ରେ ଦୁଇ ଦଳ ମଧ୍ୟରେ ଅନୁଷ୍ଠିତ ମ୍ୟାଚ୍କୁ ମୁମ୍ବାଇ ୮ ଉଇକେଟ୍ରେ ଜିତି ନେଇଥିଲା। ୨୦୧୮ ସିଜନରେ କିନ୍ତୁ ଚେନ୍ନାଇ ପରାଜୟ ଧାରା ଭାଙ୍ଗିବାରେ ସଫଳ ହୋଇଥିଲା। ଉଦ୍ଘାଟନୀ ମ୍ୟାଚ୍ରେ ଧୋନୀଙ୍କ ଦଳ ୧ ଉଇକେଟ୍ରେ ବିଜୟୀ ହୋଇଥିଲା।
