ପ୍ରୟାଗରାଜ,୫ ।୯: ସଙ୍ଗମ ନଗରୀ ପ୍ରୟାଗରାଜରେ ମୁଖ୍ୟ ଚିକିତ୍ସା ଏବଂ ସ୍ୱାସ୍ଥ୍ୟ ଅଧିକାରୀ(ସିଏମଏଚଓ) କାର୍ଯ୍ୟାଳୟର କୁଷ୍ଠରୋଗ ବିଭାଗରେ କାମ କରୁଥିବା କୋଟିପତି ଝାଡୁଦାରଙ୍କର ଟିବି ଯୋଗୁ ମୃତ୍ୟୁ ହୋଇଥିବା ଜଣାପଡିଛି । ଧିରଜ ନାମକ ଏହି ଝାଡୁଦାର ଦୀର୍ଘ ୧୦ ବର୍ଷ ହେଲା ବ୍ୟାଙ୍କ ଖାତାରୁ ତାଙ୍କର ଦରମା ଉଠାଇ ନ ଥିଲେ । ହେଲେ ସେ ତାଙ୍କ ବ୍ୟାଙ୍କ ଖାତାରେ ପାଖାପାଖି ୭୦ ଲକ୍ଷ ଟଙ୍କା ଛାଡି ଯାଇଥିବା ଜଣାପଡିଛି ।
ଧିରଜ ପ୍ରୟାଗରାଜର ଜିଲା କୁଷ୍ଠରୋଗ ବିଭାଗରେ ସ୍ୱିପର କମ ଚୌକିଦାର ପଦରେ କାର୍ଯ୍ୟରତ ଥିଲେ । ସେ କୋଟିପତି ବୋଲି ଚଳିତ ବର୍ଷ ଜଣାପଡିଥିଲା । ଯେତେବେଳେ ବ୍ୟାଙ୍କବାଲା ତାଙ୍କୁ ଖୋଜି ଖୋଜି ତାଙ୍କ ଅଫିସରେ ପହଞ୍ଚିଥିଲେ । ଶନିବାର ଧିରଙ୍କର ମୃତ୍ୟୁ ଟିବି ଯୋଗ ହୋଇଥିବା ଜଣାପଡିଛି ।
ସୂଚନାଯୋଗ୍ୟ, ଧିରଜଙ୍କ ପିତା ଏହି ବିଭଗରେ କାର୍ଯ୍ୟରତ ଥିବା ସମୟରେ ତାଙ୍କର ମୃତ୍ୟୁ ହୋଇଥିଲା । ଏହାପରେ ମୃତକଙ୍କ ଆଶ୍ରିତ ଭାବେ ଧିରଜଙ୍କୁ ଏହି ଚାକିରି ମିଳିଥିଲା । ସେ ୨୦୧୨ରୁ ଏହି ବିଭାଗରେ କାମ କରି ଆସୁଥିଲେ । ଧିରଜଙ୍କ ବେଶଭୁଷା ଓ ମଇଳା କପଡା ଦେଖି ଲୋକେ ତାଙ୍କୁ ଭିକାରି ବୋଲି ଭାବୁଥିଲେ । ଲୋକଙ୍କ ଗୋଡଧରି ପଇସା ମାଗି ସେ ତାଙ୍କର ଖର୍ଚ୍ଚ ଉଠାଉଥିଲେ । ଲୋକେ ବି ତାଙ୍କୁ ଗରିବ ଭାବି ଦାନ ଦେଇ ଦେଉଥିଲେ ଏପଟେ ତାଙ୍କର ୮୦ ବର୍ଷିୟା ମାଆଙ୍କ ପେନସନ ଟଙ୍କା ବି ତାଙ୍କ ପାଖରେ ରହୁଥିଲା । ସେ ବିବାହ କରି ନ ଥିବା ବେଳେ ମାଆଙ୍କ ସହ ରହୁଥିଲେ । ବିବାହ କଲେ କେହି କାଳେ ତାଙ୍କ ସମ୍ପତ୍ତି ନେଇଯିବ ଏହି ଭୟରେ ସେ ବିବାହ କରିବାକୁ ଚାହୁଁ ନ ଥିଲେ । କିନ୍ତୁ ତାଙ୍କ ପାଖରେ ଘର ଟଙ୍କା ସବୁଥିଲା । ଏବେ ଶେଷରେ ଏହି କୋଟିପତି ଝାଡୁଦାରଙ୍କ ଟିବିରେ ମୃତ୍ୟୁ ହୋଇଥିବା ବେଳେ ପଛରେ ରହିଯାଇଛି କୋଟି କୋଟି ଟଙ୍କା । ଏହାର ଉତ୍ତରାଧିକାରୀ ବି କେହି ନାହାନ୍ତି । ତେବେ ଧିରଜ ମାନସିକ ଭାବେ ସାମାନ୍ୟ କମଜୋର ଥିବା କହିଛନ୍ତି ତାଙ୍କ ଅଫିସର କର୍ମଚାରୀ । ହେଲେ କାମରେ ସେ ଥିଲେ ଏକନିଷ୍ଠ ।
