କେନ୍ଦ୍ରାପଡ଼ା ଅଫିସ/ରାଜନଗର, ୨୯।୧୨(ଡି.ଏନ.ଏ.): ବଉଳା କୁମ୍ଭୀରଙ୍କ ଗଣନା ପାଇଁ ଜାନୁୟାରୀ ୨ରୁ ୧୧ ତାରିଖ ୧୦ଦିନ ଧରି ଭିତରକନିକା ଜାତୀୟ ଉଦ୍ୟାନ ପର୍ଯ୍ୟଟକଙ୍କ ପାଇଁ ବନ୍ଦ ରହିବ। ରାଜନଗର ଡିଏଫ୍ଓ ଡ. ଯଜ୍ଞଦତ୍ତ ପତିଙ୍କ ସୂଚନା ମୁତାବକ, ଜାନୁୟାରୀ ୪ ଓ ୫ ଦୁଇଦିନ ଧରି ଗଣନାକାରୀଙ୍କୁ ପ୍ରଶିକ୍ଷଣ ଦିଆଯିବ। ୬ରୁ ୧୧ ତାରିଖ ଯାଏ ଭିତରକନିକା ଭିତରେ ଓ ବାହାରେ ନଦୀ ନାଳରେ କୁମ୍ଭୀର ଗଣନା କରାଯିବ। ପୂର୍ବର ପାରମ୍ପରିକ ପଦ୍ଧତି ସହ ଜାନୁୟାରୀରେ ପ୍ରଥମଥର ପାଇଁ ପଲିଗନ ସର୍ଚ୍ଚ ମୋବାଇଲ ଆପରେ କୁମ୍ଭୀର ଗଣନା କରାଯିବାକୁ ନିଷ୍ପତ୍ତି ନିଆଯାଇଛି। କୁମ୍ଭୀର ବିଶାରଦ ଡ. ସୁଧାକର କରଙ୍କ ପ୍ରତ୍ୟକ୍ଷ ତତ୍ତ୍ୱାବଧାନରେ ଏହି ଗଣନା କାର୍ଯ୍ୟ କରାଯିବ। ସକାଳେ ଖରା ପୋଇଁବା ସମୟରେ ଓ ରାତିରେ ସ୍ପଟ ଲାଇଟ ମାଧ୍ୟମରେ କୁମ୍ଭୀର ଗଣନା କରାଯାଇଥାଏ। ହୁଲି ଡଙ୍ଗାରେ ଗଣନାକାରୀମାନେ ନଦୀ ନାଳରେ କୁମ୍ଭୀର ଗଣନା କରିଥାନ୍ତି। କୁମ୍ଭୀର ଗଣନା ପାଇଁ ଟିମ୍ ଗଠନ କରାଯାଇଛି। ପ୍ରତ୍ୟେକ ଟିମରେ ୪ରୁ ୫ଜଣ ସଦସ୍ୟ ରହିବେ। ଭିତରକନିକାରେ ପ୍ରବାହିତ ନଦୀ ନାଳରେ ଧୀରେ ଧୀରେ ଧଳା ଶଙ୍ଖୁଆ କୁମ୍ଭୀରଙ୍କ ସଂଖ୍ୟା ବୃଦ୍ଧି ପାଉଥିବାରୁ ଏଥର ଗଣନା ସମୟରେ ସେଥିପ୍ରତି ଅଧିକ ଦୃଷ୍ଟି ଦିଆଯିବ। ଏ ବର୍ଷ ଗଣନା ସମୟରେ ୧୦ରୁ ଊର୍ଦ୍ଧ୍ୱ ଧଳା କୁମ୍ଭୀରକୁ ଗଣନାକାରୀମାନେ ଚିହ୍ନଟ କରିଥିଲେ। ଗତ କୁମ୍ଭୀର ଗଣନା ରିପୋର୍ଟ ଅନୁଯାୟୀ ଭିତରକନିକାରେ ୧୭୬୮ କୁମ୍ଭୀର ରହିଛନ୍ତି।
