ଭୁବନେଶ୍ୱର,୩୧ା୮(ବ୍ୟୁରୋ): ରାଜ୍ୟରେ ଆଇନ ତା’ ନିଜ ବାଟରେ ଯାଉ ନାହିଁ ବରଂ ଆଇନ ଆଗରେ ବାଟ ଓଗାଳି ଛିଡା ହୋଇ ରହିଛନ୍ତି ରାଜ୍ୟ ସରକାର। ରାଜଧାନୀ ଭୁବନେଶ୍ୱରରେ ଦିନକୁ ଦିନ ହତ୍ୟା, ବଳାତ୍କାର, ଠକେଇ, ଡକାୟତି ଓ ମୋଟରଯାନ ଦୁର୍ଘଟଣା ବଢ଼ୁଥିଲେ ମଧ୍ୟ ପୋଲିସ କୌଣସି କାର୍ଯ୍ୟାନୁଷ୍ଠାନ ନେଉନାହିଁ। ଗଣତନ୍ତ୍ରରେ ହିଂସାର ସ୍ଥାନ ନାହିଁ ବୋଲି ଡିଣ୍ଡିମ ପିଟୁଥିବା ଶାସକ ବିଜେଡିର ବାସ୍ତବ ଚିତ୍ର ସମ୍ପୂର୍ଣ୍ଣ ଭିନ୍ନ ବୋଲି ରାଜ୍ୟ ଭାଜପା ଗଣମାଧ୍ୟମ ମୁଖ୍ୟ ଦିଲୀପ ମଲ୍ଲିକ କହିଛନ୍ତି। ରାଜଧାନୀରେ ଗୁଣ୍ଡାଗର୍ଦ୍ଦି ପ୍ରତ୍ୟେକ ଦିନ ଘଟୁଥିଲେ ମଧ୍ୟ ପୋଲିସ ଚୁପ୍ ରହି ତାମସା ଦେଖୁଛି। କାହା ଇଙ୍ଗିତରେ ପୋଲିସ କାର୍ଯ୍ୟକରୁଛି ବୋଲି ମଲ୍ଲିକ ପ୍ରଶ୍ନ କରିଛନ୍ତି। ପୋଲିସର କାର୍ଯ୍ୟ ସାଧାରଣ ଜନତାଙ୍କୁ ସୁରକ୍ଷା ଦେବା। ଏଥିପାଇଁ ରାଜ୍ୟ ସରକାର ଦ୍ୱୈତନଗରୀ ପାଇଁ କମିଶନ ପୋଲିସର ବ୍ୟବସ୍ଥା କରିଛନ୍ତି। କିନ୍ତୁ ବାସ୍ତବ ଚିତ୍ର ସମ୍ପୂର୍ଣ୍ଣ ଅଲଗା।
ଭୁବନେଶ୍ୱର ଓ କଟକ ସହରର ପୋଲିସଙ୍କଠାରୁ ଜିଲା ପୋଲିସ ଅଧିକ ମାତ୍ରାରେ କାର୍ଯ୍ୟ କରୁଛନ୍ତି ବୋଲି ସେ କହିଛନ୍ତି। ୨୦୨୧ରେ ରାଜ୍ୟରେ ୧୩୯୪ ହତ୍ୟାକାଣ୍ଡ ଘଟିଥିଲା। ସେଥିରୁ ୬୫୮ ମାମଲା ବା ୪୭%ରେ ଚାର୍ଜଶିଟ୍ ଦାଖଲ କରିବା ସ୍ଥଳେ କମିଶନରେଟ୍ ପୋଲିସ ୭୩ ହତ୍ୟାକାଣ୍ଡରୁ ୨୨ଟିର ଚାର୍ଜଶିଟ ଦାଖଲ କରିଥିଲା ଯାହାର ପରିମାଣ ୩୦%। ସେହିପରି ରାଜ୍ୟରେ ୪୬% ମାମଲାରେ ଚାର୍ଜଶିଟ୍ ଦାଖଲ ହୋଇଥିବା ବେଳେ କମିଶନରେଟ୍ ପୋଲିସର ୪୩% ମାମଲା ଦାଖଲ ହୋଇଛି। ରାଜ୍ୟରେ ଚୋରି ମାମଲାରେ ୪୧%, ଦଙ୍ଗାରେ ୬୧%, ଠକେଇରେ ୨୭% ଏବଂ ମୋଟରଯାନ ଦୁର୍ଘଟଣାରେ ୬୪% ମାମଲାରେ ଚାର୍ଜଶିଟ ଦାଖଲ ହୋଇଥିବା ବେଳେ କମିଶନରେଟ୍ ପୋଲିସରେ ଚୋରିରେ ୩୩%, ଦଙ୍ଗାରେ ୩୩%, ଠକେଇରେ ୨୧% ଓ ଦୁର୍ଘଟଣାରେ ୫୭% ଚାର୍ଜଶିଟ ଦାଖଲ କରାଯାଇଛି। ବଳାତ୍କାର ମାମଲାରେ ମଧ୍ୟ କମିଶନରେଟ୍ ପୋଲିସ ଫେଲ୍ ମାରିଛି ବୋଲି ମଲ୍ଲିକ କହିଛନ୍ତି।
ଦ୍ୱୈତନଗରୀ ଭୁବନେଶ୍ୱର ଓ କଟକକୁ ନେଇ ଗଠିତ କମିଶନରେଟ ପୋଲିସ ମୁଖ୍ୟାଳୟ ରାଜଧାନୀରେ ରହିଛି।
ଏହି ଦ୍ୱୈତନଗରୀ ଲାଗି ସ୍ପେଶାଲ ସ୍କ୍ବାଡ, ପିଓପିଡି ଟିମ୍, କ୍ରାଇମ ସେଲ୍ ଭଳି ବିବିଧ ତଦନ୍ତକାରୀ ବଛାବଛା ଟିମ୍ ରହିଛି। କିନ୍ତୁ କାହିଁକି ଜିଲା ପୋଲିସଙ୍କଠାରୁ କମିଶନରେଟ୍ ପୋଲିସ ପଛରେ ରହଛି ତାହା ସାଧାରଣରେ ପ୍ରଶ୍ନବାଚୀ ସୃଷ୍ଟି କରିଛି ବୋଲି ମଲ୍ଲିକ କହିଛନ୍ତି।
