ଭୁବନେଶ୍ୱର,୧୯।୧୨: ରାଜ୍ୟରେ ପ୍ରଥମ ଥର ପାଇଁ ଏକ ଦୁଇ ଦିନିଆ ଗୋପାଳନ ସମ୍ମିଳନୀ ଚଳିତ ମାସ ୨୧ ଓ ୨୨ ତାରିଖ ଓଡ଼ିଶାର ବଲାଙ୍ଗୀରଠାରେ ହେବାକୁ ଯାଉଛି। ଏପରିକି ବଲାଙ୍ଗୀର ଜିଲା ପ୍ରଶାସନ ଓ ବିକେଏନ୍ ଆଞ୍ଚଳିକ ଦୁଗ୍ଧ ସଂଘର ମିଳିତ ସହଯୋଗରେ ଓଡ଼ିଶାର ପ୍ରଥମ ଗୋପାଳନ ସମ୍ମିଳନୀ ଆୟୋଜିତ ହେବାକୁ ଯାଉଛି। ଏହି ପରିପ୍ରେକ୍ଷୀରେ ବିଭିନ୍ନ କାର୍ଯ୍ୟକ୍ରମ ସାଙ୍ଗକୁ ବିଶେଷଜ୍ଞଙ୍କ ଅଭିଭାଷଣ ସହିତ ସାରା ଭାରତରୁ ଗୋପାଳନ ଓ ଏହାସହ ଜଡ଼ିତ ବିଭିନ୍ନ ଉତ୍ପାଦ ମଧ୍ୟ ପ୍ରଦର୍ଶନ କରାଯିବ। ସେହିଭଳି ଗୋପାଳନ ସମ୍ପର୍କିତ ବିଭିନ୍ନ କେସ୍ ଷ୍ଟଡିଜ୍ ଓ ଗୋପାଳନ କ୍ଷେତ୍ର ସହ ଜଡ଼ିତ ବିଭିନ୍ନ ନେଟଓ୍ବର୍କିଂ ଫୋରମ୍ ବିଷୟରେ ମଧ୍ୟ ବିସ୍ତୃତ ଆଲୋଚନା କରାଯିବ। ଏଥିସହିତ ‘ଗୋପାଳନ ସାହିତ୍ୟ ଓ କବିତା’ ପରି ସାଂସ୍କୃତିକ କାର୍ଯ୍ୟକ୍ରମର ମଧ୍ୟ ଆୟୋଜନ କରାଯିବ ବୋଲି ଜଣାପଡିଛି। ସେହିପରି ରାଜ୍ୟରେ ଗୋପାଳନ କ୍ଷେତ୍ରରେ ପରିବର୍ତ୍ତନ ଆଣିବାରେ ଉକ୍ତ ସମ୍ମିଳନୀ ସ୍ଥାୟୀ ଜୀବିକା ସୃଷ୍ଟି କରିବା ସହ ଗୋପାଳନ-ଉଦ୍ୟୋଗ ସୃଷ୍ଟି କରିବାରେ ଏକ ମାଇଲଖୁଣ୍ଟ ପାଲଟିବ ବୋଲି କୁହାଯାଉଛି।
ଉକ୍ତ ସମ୍ମିଳନୀରେ ସାରା ଦେଶରୁ ଏନ୍ଡିଡିବି, ଏନ୍ଡିଆରଆଇ, ଆଇଭିଆରଆଇ, ସିସିବିଏଫ୍, ଏପିକୋଲ୍, ଆଇସିଏଆର, ସିଇଡିଏସଆଇ, ଏନଏସଡିସି ଭଳି ବିିଭିନ୍ନ ସରକାରୀ ବିଭାଗ ଓ ଅନୁଷ୍ଠାନର ପ୍ରତିନିଧିମାନେ ଯୋଗଦେବାର କାର୍ଯ୍ୟକ୍ରମ ରହିଛି।
ଅପରପକ୍ଷରେ ଗୋପାଳନ ଓ ଗୋ-ପ୍ରଜନନର ବିଶେଷଜ୍ଞ ଓ ଉଦ୍ୟୋଗୀମାନଙ୍କ ମଧ୍ୟରେ ମତ୍ସ୍ୟ ଓ ପଶୁ ସମ୍ପଦ ବିଭାଗର କମିଶନର ତଥା ସଚିବ ସୁରେଶ କୁମାର ବଶିଷ୍ଠ, ଡ. ଅଶୋକ ପଟ୍ଟନାୟକ, ଡ. ଟି.କେ. ମହାନ୍ତି, ଡ.ରମାଦେବୀ ନିମ୍ମାନାପାଲ୍ଲୀ, ଡ. ଚନ୍ଦ୍ର ହାସ ଏବଂ ମହିଳା ଉଦ୍ୟୋଗୀ ପଲ୍ଲବୀ ବ୍ୟାସଙ୍କ ସମେତ ରାଜ୍ୟର ବିଭିନ୍ନ ଦୁଗ୍ଧ ସଂଘ, ଦୁଗ୍ଧ ସମବାୟ ସମିତି ଓ ସଫଳ ଗୋପାଳନ ଉଦ୍ୟୋଗର ପ୍ରତିନିଧିମାନେ ମଧ୍ୟ ଭାଗ ନେବେ। ବିଶେଷ କରି ସମବାୟ ପରିଚାଳନା ବାବଦରେ ବିସ୍ତୃତ ଆଲୋକପାତ କରିବା ସହ ସରକାରୀ ଯୋଜନା ଓ ସୁବିଧା ସାଙ୍ଗକୁ ଟେକ୍ନୋଲୋଜିକାଲର ସଫଳତା ଓ ଉଦ୍ଭାବନ ଏବଂ କୁଶଳୀ ବ୍ୟବସ୍ଥାର ବିକାଶ ବାବଦରେ ମଧ୍ୟ ଅବଗତ କରାଯିବ। ଏଥିସହିତ ଏ କ୍ଷେତ୍ରରେ ଟେକ୍ନୋଲୋଜିକାଲ ବିକାଶକୁ ନେଇ ମଧ୍ୟ ଏକ ପ୍ରଦର୍ଶନୀ ଆୟୋଜିତ ହେବ। ସୂଚନାଯୋଗ୍ୟ ଯେ ରାଜ୍ୟର ବିଭିନ୍ନ ଶିକ୍ଷାନୁଷ୍ଠାନରେ ଏକ ଜିଲାସ୍ତରୀୟ କୁଇଜ ପ୍ରତିଯୋଗିତାର ମଧ୍ୟ ଆୟୋଜନ କରାଯାଇ ବିଜେତାମାନଙ୍କୁ ଉକ୍ତ କାର୍ଯ୍ୟକ୍ରମ ପରିଶେଷରେ ପୁରସ୍କୃତ କରାଯିବ ବୋଲି ଆୟୋଜନ କମିଟି ପକ୍ଷରୁ କୁହାଯାଇଛି।
