ନୂଆଦିଲ୍ଲୀ,୩୧।୧୦: କୋଭିଡ୍ ଯୋଗୁ ଗତ ଦୁଇବର୍ଷ ହେଲା ପାର୍ବଣ ଓ ଦୀପାବଳି ଭଳି ପ୍ରମୁଖ ପର୍ବ ବନ୍ଦ ରହିଥିଲା। ହେଲେ ଚଳିତବର୍ଷ କୋଭିଡ୍ ସଂକ୍ରମଣ ନିୟନ୍ତ୍ରଣରେ ଥିବାରୁ ପାର୍ବଣ ଓ ଦୀପାବଳି ପୂର୍ବ ବର୍ଷ (୨୦୧୯) ଭଳି ସ୍ବାଭାବିକ ଭାବେ ପାଳିତ ହୋଇଛି। ଏପରି କି ଚଳିତବର୍ଷ ଦୀପାବଳିକୁ ଭାରତୀୟମାନେ ଧୁମ୍ଧାମରେ ପାଳନ କରିଛନ୍ତି। ଫଳରେ ସାରା ଦେଶରେ ୬ହଜାର କୋଟି ଟଙ୍କାରୁ ଅଧିକ ବାଣ ଫୁଟା ଯାଇଥିବା (ଫୋଟକା ପୋଡ଼ା ଯାଇଥିବା) କ୍ରାକର ଇଣ୍ଡଷ୍ଟ୍ରି ପକ୍ଷରୁ କୁହାଯାଇଛି। ସେହିଭଳି କ୍ରାକର ଶିଳ୍ପ ସହ ଜଡିତ ବ୍ୟବସାୟୀ ଓ କାରିଗର ମଧ୍ୟ ବେଶ୍ ଉତ୍ସାହିତ ଥିବା ପରିଲକ୍ଷିତ ହୋଇଛି।
ଉଲ୍ଲେଖଯୋଗ୍ୟ ଯେ, ସାରା ଭାରତରେ ସବୁ ସ୍ତରରେ ବାଣ ବିକ୍ରି ଲାଗି ଷ୍ଟକ୍ ରହିଥିବା ସବୁ ବର୍ଗର ଫୋଟକା ବିକ୍ରି ହୋଇଯାଇଥିବା ସୂଚନା ରହିଛି। କାରଣ ବିଗତ ୨ ବର୍ଷ ପରେ ଲୋକେ ଦୀପାବଳି ପାଳନ କରିବାକୁ ଯାଉଥିବାରୁ ଉଭୟ ଗ୍ରାହକ ଓ ବ୍ୟବସାୟୀଙ୍କ ମଧ୍ୟରେ ବେଶ୍ ଉତ୍ସାହ ଦେଖାଦେଇଥିଲା। ଅପରପକ୍ଷରେ ୨୦୧୬ରୁ ୨୦୧୯ ମଧ୍ୟରେ ହୋଇଥିବା ବାଣ କାରବାର ସମାନ ରହିଥିବା ବେଳେ ଚଳିତବର୍ଷର ବାଣ (କ୍ରାକର ବେପାର) କାରବାର ପ୍ରାୟ ୩୦% ବୃଦ୍ଧି ପାଇଛି ବୋଲି ତାମିଲନାଡୁ ଫାୟାରୱାର୍କସ୍ ଏଣ୍ଡ ଆମୋରସ ମାନୁଫାକ୍ଚର୍ସ ଆସୋସିଏଶନ (ଟିଏଏନ୍ଏଫ୍ଏଏମ୍ଏ) ର ସଭାପତି ଗଣେଶନ ପଞ୍ଜୁରାଜନ ମତବ୍ୟକ୍ତ କରିଛନ୍ତି।
ସେହିପରି କୋଭିଡ୍ ସଂକ୍ରମଣ ଯୋଗୁ ବାଣ (କ୍ରାକର) ତିଆରି ଲାଗି ଆବଶ୍ୟକ କଞ୍ଚାମାଲ ମୂଲ୍ୟରେ ୫୦% ପର୍ଯ୍ୟନ୍ତ ବୃଦ୍ଧି ହୋଇଥିଲା; ଯାହା ଏବେ ବି ହ୍ରାସ ହୋଇନାହିଁ, ତେଣୁ ଉତ୍ପାଦନ ମୂଲ୍ୟରେ ସ୍ବାଭାବିକଠାରୁ ୩୦ରୁ ୩୫ ପ୍ରତିଶତ କାରବାର ବୃଦ୍ଧି ହୋଇଥିବା ଜଣାପଡିଛି। ତେବେ ଭାରତର ଉତ୍ସବ ସମୟରେ ସାଧାରଣତଃ ୪ରୁ ୫ ହଜାର କୋଟି ଟଙ୍କାର କାରବାର ହୋଇଥାଏ। ତେବେ ବିକ୍ରି ହୋଇପାରି ନ ଥିବା ମାଲ ସମ୍ପର୍କରେ ସୋନି ଫାୟାର ୱାର୍କସର ନିର୍ଦ୍ଦେଶକ ଗଣେଶନ କହିଛନ୍ତି, ଚଳିତବର୍ଷ ଦୀପାବଳିରେ ଗୋଟିଏ ବି କ୍ରାକର ବଳି ନ ଥିବା ଜଣାପଡିଛି। ତେବେ ଚଳିତବର୍ଷ ସବୁଠୁ ଅଧିକ ବାଣ (ଫୋଟକା) ମହାରାଷ୍ଟ୍ରରେ ବିକ୍ରି ହୋଇଥିବା ବେଳେ ଉତ୍ତରପ୍ରଦେଶ, ବିହାର, କୋଲକାତା ଏବଂ ଗୁଜରାଟ ଭଳି ପ୍ରମୁଖ ରାଜ୍ୟ କ୍ରମାନ୍ବୟରେ କାରବାର କରିଥିବା ସେ ମତପ୍ରକାଶ କରିଛନ୍ତି।
ଗଣେଶନଙ୍କ କହିବା ଅନୁସାରେ ଉତ୍ପାଦନର ଏକ ବଡ଼ ଅଂଶ ମୁମ୍ବାଇ ଓ ବାକି ମହାରାଷ୍ଟ୍ର ଭଳି ରାଜ୍ୟ ନେଇଥିବା ଜଣାପଡିଛି। ଚଳିତବର୍ଷ ଦୀପାବଳି ପାଇଁ ସବୁ ପ୍ରକାର ଫୋଟକା ତିଆରି ହୋଇଥିଲା । ବିଶେଷ କରି ଉଚ୍ଚତମ ନ୍ୟାୟାଳୟ ଓ ସରକାରୀ ଅଧିକାରୀଙ୍କ ଗାଇଡ୍ ଲାଇନରେ କ୍ରାକର ପ୍ରସ୍ତୁତ କରାଯାଇଥିବା ବେଳେ ସବୁ ଫୋଟକା ଗ୍ରୀନ୍ ଫୋଟକା ଶ୍ରେଣୀର ନିର୍ମିତ ହୋଇଥିଲା। ଉଲ୍ଲେଖଯୋଗ୍ୟ ଯେ, ରାଜଧାନୀ ଦିଲ୍ଲୀକୁ ଛାଡିଦେଲେ ଦେଶର ଅନ୍ୟ କୌଣସି ସ୍ଥାନରେ ବାଣ ଫୁଟାଇବା ଲାଗି କଟକଣା ଲାଗି ନ ଥିବା ବେଳେ ଦୀପାବଳି ଧୁମ୍ଧାମରେ ପାଳନ ହୋଇଥିବା ଗଣେଶନ କହିଛନ୍ତି।