ଲୋଇସିଂହା,୨୧ା୮(ସୁଶାନ୍ତ ବାରିକ): ବଲାଙ୍ଗୀର ଜିଲା ଆଗଲପୁର ବ୍ଲକ ମିଶନ ଶକ୍ତି ଭବନ କାର୍ଯ୍ୟକ୍ଷମ ହୋଇନାହିଁ। ହେଲେ କାର୍ଯ୍ୟାଳୟ ବ୍ୟବହାର ପୂର୍ବରୁ କାନ୍ଥ ଚାରିପଟେ ବିରାଟ ଫାଟ ସୃଷ୍ଟି ହୋଇଛି ା ନବନିର୍ମିତ କୋଠାର ଏପରି ଦୂରାବସ୍ଥା ଦେଖିଲେ ଏହାର ସ୍ଥାୟିତ୍ୱକୁ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି। ଖାଲି ସେତିକି ନୁହେଁ ନିକଟରେ ମିଶନ ଶକ୍ତି ଭବନ ଲୋକାର୍ପଣ ହୋଇଥିଲେ ହେଁ ଏହି କୋଠାରେ କାର୍ଯ୍ୟ କରିବାକୁ ବିଭାଗୀୟ କର୍ମଚାରୀ ସୁରକ୍ଷିତ ମଣୁନାହାନ୍ତି। ଅପରପକ୍ଷେ ବ୍ଲକ ପ୍ରଶାସନ ଓ କୋଠା ନିର୍ମାଣ କରିଥିବା ପିଡବ୍ଲ୍ୟୁଡି ବିଭାଗ ଏଥିପ୍ରତି ନିର୍ବିକାର ରହି ଥିବାରୁ ସାଧାରଣରେ ଅସନ୍ତୋଷ ପ୍ରକାଶ ପାଇଛି।
ସ୍ବୟଂ ସହାୟକ ଗୋଷ୍ଠୀ ମହିଳାଙ୍କ ଦକ୍ଷତା ବିକାଶ ପାଇଁ ରାଜ୍ୟ ସରକାର ପ୍ରତି ବ୍ଲକରେ ମିଶନ ଶକ୍ତି ଭବନ ନିର୍ମାଣ କରୁଛନ୍ତି। ଏହି କ୍ରମରେ ବଲାଙ୍ଗୀର ଜିଲା ଆଗଲପୁର ବ୍ଲକ (ଡୁଡୁକା) ପରିସରରେ ମିଶନ ଶକ୍ତି ଭବନ ନିର୍ମାଣ ହୋଇଛି ା ୨୦୨୨-୨୩ ଅର୍ଥିକ ବର୍ଷରେ ପିଡବ୍ଲ୍ୟୁଡି ବିଭାଗ ପକ୍ଷରୁ ଟେଣ୍ଡର ଆହ୍ବାନ କରି ଉକ୍ତ କୋଠା ନିର୍ମାଣ ହୋଇଛି। ପ୍ରାୟ ୫୦ଲକ୍ଷ ଟଙ୍କା ବ୍ୟୟ ଅଟକଳରେ ନିର୍ମିତ କୋଠାକୁ ବରଗଡ ଜିଲା ଗାଇସିଲାଟ ଅଞ୍ଚଳର ଜଣେ ଠିକାଦାର କରିଛନ୍ତି। ଗତ ଜୁଲାଇ ୭ ତାରିଖରେ ନବ ନିର୍ମିତ ମିଶନ ଶକ୍ତି ଭବନକୁ ଜିଲା ପରିଷଦ ଅଧ୍ୟକ୍ଷା ଦେବାକୀ ସାହୁ ଲୋକାର୍ପଣ କରିଥିଲେ। ଲୋକାର୍ପଣର ଅଳ୍ପଦିନ ମଧ୍ୟରେ କୋଠାର ଅବସ୍ଥାକୁ ନେଇ ବ୍ଲକ ଭାଜପା ଅଙ୍ଗୁଳି ଉଠାଇ ଏଠି ୫-ଟି କୁଆଡେ ଗଲା ବୋଲି ପ୍ରଶ୍ନ କରିଛନ୍ତି। ଅପରପକ୍ଷେ ଜିଲା ପରିଷଦ ସଭ୍ୟା ବୀଣାପାଣି ଦାଶ କୋଠାରେ ଫାଟକୁ ନେଇ କ୍ଷୋଭ ପ୍ରକାଶ କରିଛନ୍ତି। ସେ କହିଛନ୍ତି ଗତ ମାର୍ଚ୍ଚ ମାସରେ ଜିଲା ପରିଷଦ ୱାର୍କ କମିଟି ଉପାଧ୍ୟକ୍ଷା ମିଥିଲା ମାଝିଙ୍କ ନେତୃତ୍ୱରେ ଆଗଲପୁର ବ୍ଲକରେ ଉନ୍ନୟନ କାମ ପରିଦର୍ଶନ କରିଥିଲେ ା ସେତେବେଳେ ନିର୍ମାଣରେ ଅନିୟମିତତା ଦେଖି କମିଟି ସଦସ୍ୟ ଅସନ୍ତୋଷବ୍ୟକ୍ତ କରିଥିଲେ। କାମରେ ସୁଧାର ଆଣିବାକୁ ଠିକାସଂସ୍ଥା ଓ ବିଭାଗୀୟ ଅଧିକାରୀଙ୍କୁ ତାଗିଦ୍ କରାଯାଇଥିଲା ା ଏଥିରୁ କମିଟିର ନିର୍ଦ୍ଦେଶକୁ ଅଣଦେଖା କରାଯାଇଥିବା ସ୍ପଷ୍ଟ ହୋଇଛି। କାମ କରିଥିବା ଠିକାଦାରଙ୍କୁ କଳା ତାଲିକାଭୁକ୍ତ କରିବା ସହ ବିଭାଗୀୟ ଅଧିକାରୀଙ୍କ ବିରୋଧରେ ଦୃଢ କାର୍ଯ୍ୟାନୁଷ୍ଠାନ ଦାବି ହୋଇଛି। ବିଭାଗୀୟ ଏସ୍ଡିଓ ଉଦୟଚରଣ ବେହେରା କହିଛନ୍ତି ନବନିର୍ମିତ କୋଠାର ମରାମତି କରିବାକୁ ଠିକାଦାରଙ୍କୁ କୁହାଯାଇଛି। ମୁଁ ନିଜେ କ୍ଷେତ୍ର ପରିଦର୍ଶନ କରିବି ବୋଲି ସେ କହିଛନ୍ତି।
