ଅନୁଗୋଳ ଅଫିସ,୧୧।୧ ଅନୁଗୋଳ ଜିଲାରେ କୋଭିଡ୍ ସଂକ୍ରମଣ ବଢ଼ୁଛି। ତେଣୁ ଜିଲାରେ ଥିବା କୋଭିଡ୍ ହସ୍ପିଟାଲଗୁଡ଼ିକ ସୁରୁଖୁରୁରେ ଚାଲିବା ନିମନ୍ତେ ସୋମବାର ଜିଲାପାଳ ସିଦ୍ଧାର୍ଥ ଶଙ୍କର ସ୍ବାଇଁଙ୍କ ଅଧ୍ୟକ୍ଷତାରେ ଏକ ପ୍ରସ୍ତୁତି ବୈଠକ ଅନୁଷ୍ଠିତ ହୋଇଯାଇଛି। ତାଳଚେର କୋଭିଡ୍ ହସ୍ପିଟାଲରେ ସମସ୍ତ ପ୍ରକାର ଆନୁଷଙ୍ଗିକ ବ୍ୟବସ୍ଥା କରି ଏହାକୁ ତୁରନ୍ତ କାର୍ଯ୍ୟକ୍ଷମ କରିବା ନିମନ୍ତେ ଜିଲାପାଳ ଏମ୍ସିଏଲ୍ କର୍ତ୍ତୃପକ୍ଷଙ୍କୁ ପରାମର୍ଶ ଦେଇଥିଲେ। ଏହି ହସ୍ପିଟାଲରେ ମୋଟ୍ ୧୨୦ ବେଡ୍ ରଖାଯିବ। ସେଥିରୁ ୯୦ଟି ସାଧାରଣ ଓ ୩୦ଟି ଆଇସିୟୁ ବେଡ୍ ରହିବ। ପ୍ରତି ଜେନେରାଲ ବେଡ୍ ନିକଟରେ ଅକ୍ସିଜେନ ସିଲିଣ୍ଡର ଉପଲବ୍ଧ ହେବ। ଆଇସିୟୁରେ ୮ଟି ଭେଣ୍ଟିଲେଟର ରହିବ। ୨ଜଣ ଡାକ୍ତର, ୪୦ ଷ୍ଟାଫ୍ ନର୍ସ ଓ ଅନ୍ୟ କର୍ମଚାରୀ ନିୟୋଜିତ ରହିବେ। ତଳ ମହଲାରେ ପ୍ରଶାସନ ତରଫରୁ ଏକ ହେଲ୍ପ ଡେସ୍କ ଖୋଲାଯାଇ ରୋଗୀଙ୍କ ସମ୍ପର୍କୀୟମାନଙ୍କୁ ଆବଶ୍ୟକ ସୂଚନା ପ୍ରଦାନ କରାଯିବା ସହ ସିସିଟିଭି ମାଧ୍ୟମରେ ରୋଗୀଙ୍କ ସ୍ଥିତି ସମ୍ପର୍କରେ ଜଣାଇ ଦିଆଯିବ। ସେହିପରି ବଅଁରପାଳ କୋଭିଡ୍ କେୟାର ସେଣ୍ଟରରେ ୧୨୦ଟି ବେଡ୍, ଛେଣ୍ଡିପଦା କୋଭିଡ କେୟାର ସେଣ୍ଟରରେ ୨୭୦ଟି ବେଡ୍, ସରକାରୀ ପଲିଟେକ୍ନିକ୍ ଅନୁଗୋଳ ଠାରେ ୧୦୦ଟି ବେଡ୍ ପ୍ରସ୍ତୁତ କରି ରଖାଯିବ। ରୋଗୀ ନେବା ଆଣିବା ନିମନ୍ତେ ଆବଶ୍ୟକ ଆମ୍ବୁଲାନ୍ସ ବ୍ୟବସ୍ଥା କରାଯିବ। ତାଳଚେରଠାରେ ମଧ୍ୟ ଖୁବ୍ଶୀଘ୍ର କୋଭିଡ୍ କେୟାର ସେଣ୍ଟର ପ୍ରସ୍ତୁତ କରାଯିବ ବୋଲି ଜିଲାପାଳ ପ୍ରକାଶ କରିଛନ୍ତି। ଏହି ବୈଠକରେ ଅତିରିକ୍ତ ଜିଲାପାଳ ରଜନୀକାନ୍ତ ସ୍ବାଇଁ, ଜିଲା ମୁଖ୍ୟ ଚିକିତ୍ସା ଓ ଜନ ସ୍ବାସ୍ଥ୍ୟ ଅଧିକାରୀ ଡା. ତ୍ରିଲୋଚନ ପ୍ରଧାନଙ୍କ ସମେତ ଏମ୍ସିଏଲ୍ର କର୍ମକର୍ତ୍ତାମାନେ ଉପସ୍ଥିତ ଥିଲେ।
