ନୂଆଦିଲ୍ଲୀ,୧୫।୧୧ : ମହାରାଷ୍ଟ୍ରର ପୂର୍ବତନ ମୁଖ୍ୟମନ୍ତ୍ରୀ ଉଦ୍ଧବ ଠାକରେଙ୍କୁ ଦିଲ୍ଲୀ ହାଇକୋର୍ଟରୁ ମଙ୍ଗଳବାର ଏକ ବଡ଼ ଝଟକା ମିଳିଛି। ଶିବସେନା ଦଳର ନାମ ଏବଂ ନିର୍ବାଚନ ପ୍ରତୀକ ବ୍ୟବହାର ଉପରେ ପ୍ରତିବନ୍ଧକ ଲଗାଇଥିବା ନିର୍ବାଚନ ଆୟୋଗ(ଇସି)ଙ୍କର ମଧ୍ୟବର୍ତ୍ତୀକାଳୀନ ଆଦେଶ ବିରୋଧରେ ଉଦ୍ଧବ ଠାକରେଙ୍କ ଦ୍ୱାରା ଦାଖଲ ହୋଇଥିବା ଆବେଦନକୁ କୋର୍ଟ ଖାରଜ କରିଦେଇଛନ୍ତି। ଏହା ସହିତ ଶିବସେନାର ଦୁଇ ଦଳ ମଧ୍ୟରେ ଚାଲିଥିବା ବିବାଦ ଉପରେ ଯଥାଶୀଘ୍ର ନିଷ୍ପତ୍ତି ନେବାକୁ କୋର୍ଟ ନିର୍ବାଚନ ଆୟୋଗଙ୍କୁ କହିଛନ୍ତି।
ଏହାପୂର୍ବରୁ ସୋମବାର ଦିଲ୍ଲୀ ହାଇକୋର୍ଟ ମହାରାଷ୍ଟ୍ରର ପୂର୍ବତନ ମୁଖ୍ୟମନ୍ତ୍ରୀ ଉଦ୍ଧବ ଠାକରେ ଶିବସେନାର ନାମ ଏବଂ ନିର୍ବାଚନ ପ୍ରତୀକ ଉପରେ ପ୍ରତିବନ୍ଧକ ଲଗାଇବା ପାଇଁ ନିର୍ବାଚନ ଆୟୋଗଙ୍କର ମଧ୍ୟବର୍ତ୍ତୀକାଳୀନ ଆଦେଶ ବିରୋଧରେ କରାଯାଇଥିବା ଆବେଦନ ଉପରେ ଶୁଣାଣି କରିଥିଲେ। ଏହି ସମୟ ମଧ୍ୟରେ ଦଳ ଦଳ ମଧ୍ୟରେ ବିବାଦକୁ ନେଇ ପୋଲ ପ୍ୟାନେଲର ଚୂଡ଼ାନ୍ତ ନିଷ୍ପତ୍ତିକୁ କାହିଁକି ଅପେକ୍ଷା କରିବା ଉଚିତ ନୁହେଁ ବୋଲି କୋର୍ଟ ପ୍ରଶ୍ନ କରିଥିଲେ।
ଅଦାଲତ କହଥିଲେ ଯେ ପୂର୍ବ ଇସିଙ୍କ ଆଦେଶ ଉପ-ନିର୍ବାଚନକୁ ଲକ୍ଷ୍ୟ ରଖି କରାଯାଇଥିଲା। ଏହା ଏକ ଅନ୍ତିମ ନିଷ୍ପତ୍ତି ନୁହେଁ। ଯେତେବେଳେ ଉପ-ନିର୍ବାଚନ ଅନୁଷ୍ଠିତ ହୋଇସାରିଛି, ମଧ୍ୟବର୍ତ୍ତୀକାଳୀନ ଆଦେଶ ଆଉ ନାହିଁ। ତେବେ ନିର୍ବାଚନ ଆୟୋଗଙ୍କର ଅନ୍ତିମ ନିଷ୍ପତ୍ତି ପାଇଁ କୋର୍ଟ କାହିଁକି ଅପେକ୍ଷା କରିବେ ନାହିଁ?
ଶୁଣାଣି ସମୟରେ ଜଷ୍ଟିସ ସଞ୍ଜୀବ ନରୁଲା କହିଛନ୍ତି ଯେ ଧନୁ ଓ ତୀର ପ୍ରତୀକ ଆବଣ୍ଟନ ପ୍ରସଙ୍ଗରେ କୋର୍ଟ ନିର୍ବାଚନ ଆୟୋଗଙ୍କୁ ନିଷ୍ପତ୍ତି ନେବାକୁ କହିବେ। ସେ ଆହୁରି ମଧ୍ୟ କହିଛନ୍ତି ଯେ ଉଭୟ ଦଳ ନିର୍ବାଚନ ଆୟୋଗଙ୍କ ନିକଟରେ ନିଜର ଯୁକ୍ତି ଉପସ୍ଥାପନ କରିପାରିବେ।
ଏଥିପାଇଁ ନିର୍ବାଚନ ଆୟୋଗଙ୍କ ପକ୍ଷରୁ ହାଜର ହୋଇଥିବା ଆଇନଜୀବୀ ସିଦ୍ଧନ୍ତ କୁମାର ଯୁକ୍ତି ବାଢ଼ିଛନ୍ତି ଯେ ଆୟୋଗ ଏକ ସାମ୍ବିଧାନିକ ସଂସ୍ଥା ଏବଂ କୌଣସି ଏକ ନିଷ୍ପତ୍ତିରେ ପହଞ୍ଚିବା ପାଇଁ ଏକ ନିର୍ଦ୍ଦିଷ୍ଟ ସମୟସୀମା ଧାର୍ଯ୍ୟ କରାଯାଇପାରିବ ନାହିଁ।
