ପୁରୀ,୫ା୯(ଅଜିତ୍ କୁମାର ମହାନ୍ତି): ପୁରୀ ପୋଲିସ ଚଢ଼ାଉ କରି ବିପୁଳ ପରିମାଣର ଗଞ୍ଜେଇ ଜବତ କରିବା ସହ ଘଟଣାରେ ସମ୍ପୃକ୍ତ ୨ ଯୁବକଙ୍କୁ ଗିରଫ କରିଛି। ପୋଲିସ ଅଭିଯୁକ୍ତଙ୍କ ନିକଟରୁ ପୁଳା ପୁଳା ଟଙ୍କା ଜବତ କରିଛି। ଅଭିଯୁକ୍ତଦ୍ୱୟ ହେଲେ ତାଳବଣିଆ ଥାନା ଅନ୍ତର୍ଗତ ସିଦ୍ଧମହାବୀର ମୈତ୍ରୀ ବିହାର ଅଞ୍ଚଳର ଦେବେନ୍ଦ୍ର ସାହୁ (୫୫) ଓ ଟିକରପଡ଼ା ମହାନ୍ତି ସାହିର କାର୍ତ୍ତିକ ସାମନ୍ତରାୟ (୫୬)। ଚଢ଼ାଉ ସମୟରେ ପେଣ୍ଠକଟା ମେରାଇନ ଥାନା ପୋଲିସ ଏବଂ ସ୍ବତନ୍ତ୍ର ଟିମ୍ ଗୋପାଳପୁର ଅଞ୍ଚଳର ଏକ ଭଡ଼ାଘରୁ ୧୭୬ ପ୍ୟାକେଟ୍ର ୧.୮୩ କୁଇଣ୍ଟାଲ୍ ଗଞ୍ଜେଇ ଜବତ କରିଛି। ଏପରିକି ପୋଲିସ ଜଣେ ଅଭିଯୁକ୍ତଙ୍କ ଘରୁ ପ୍ରାୟ ୧ କୋଟିରୁ ଊର୍ଦ୍ଧ୍ୱ ଟଙ୍କା ଜବତ କରିଛି।
ପୋଲିସର ସୂଚନାନୁଯାୟୀ, ମେରାଇନ ଥାନା ଅନ୍ତର୍ଗତ ଗୋପାଳପୁର ପାଖରେ ଥିବା ଆଇଏମ୍ଟି ଫାର୍ମାସି କଲେଜ ନିକଟ ଏକ ଭଡ଼ାଘରେ ବେଆଇନ ମାଦକଦ୍ରବ୍ୟ କାରବାର ହେଉଥିବା ପୋଲିସ ବିଶେଷ ସୂତ୍ରରୁ ଖବରପାଇ ଉକ୍ତ ଘରେ ଉପରେ ନଜର ରଖିଥିଲା। ଶୁକ୍ରବାର ପେଣ୍ଠକଟା ମେରାଇନ ଥାନା ପକ୍ଷରୁ ଉକ୍ତ ଘରେ ଚଢ଼ାଉ କରାଯାଇଥିଲା। ଚଢ଼ାଉ ସମୟରେ ପୋଲିସ ବିପୁଳ ପରିମାଣର ଗଞ୍ଜେଇ ପ୍ୟାକେଟ୍ ଜବତ କରିଛି।
ଏନେଇ ଏସ୍ପି ପ୍ରତୀକ ସିଂ କହିଛନ୍ତି, ଶୁକ୍ରବାର ସକାଳୁ ବେଆଇନ ଭାବେ ଗଞ୍ଜେଇ ଏକ ଘରେ ରଖାଯାଇଥିବା ନେଇ ସୂଚନା ମିଳିଥିଲା। ପେଣ୍ଠକଟା ମେରାଇନ୍ ଥାନା, ସ୍ପେଶାଲ୍ ସ୍କ୍ବାଡ୍ ଓ ବରିଷ୍ଠ ଅଧିକାରୀ ମିଳିତ ଭାବେ ଚଢ଼ାଉ କରି ବିପୁଳ ପରିମାଣର ଗଞ୍ଜେଇ ଜବତ କରାଯାଇଛି। ଘଟଣାର ମୁଖ୍ୟ ଅଭିଯୁକ୍ତ କାର୍ତ୍ତିକ ସାମନ୍ତରାୟଙ୍କ ଇନ୍ଦ୍ରଦ୍ୟୁମ୍ନ ସ୍ଥିତ ଘରେ ଚଢ଼ାଉ କରାଯାଇ ବିପୁଳ ଟଙ୍କା ଜବତ କରାଯାଇଛି। ଏଥିସହ କିଛି କାଗଜପତ୍ର, ଏଟିଏମ୍ ସହ ବେପାର କରି ରଖିଥିବା ଟଙ୍କାଗୁଡ଼ିକୁ ଜବତ କରାଯାଇଛି। ବର୍ତ୍ତମାନ ୨ଜଣ ଗିରଫ ହୋଇଛନ୍ତି। ଏଥିରେ ଅନ୍ୟ କେହି ଜଡ଼ିତ ଅଛନ୍ତି କି ନାହିଁ ସେନେଇ ପୋଲିସ ପକ୍ଷରୁ ତଦନ୍ତ କରାଯାଉଛି। ପୋଲିସ ପକ୍ଷରୁ ନିଶା କାରବାର ଉପରେ ନଜର ରଖାଯାଇଛି। ବହୁଦିନ ହେବ ଅଭିଯୁକ୍ତଙ୍କ ଉପରେ ନଜର ରହିଥିଲା। ଅଭିଯୁକ୍ତଙ୍କର ଅନ୍ୟ ଯେଉଁସବୁ ସମ୍ପତ୍ତି ରହିଛି ତାହା ଉପରେ ମଧ୍ୟ ଚଢ଼ାଉ କରାଯାଇଛି। ଏହି ଗଞ୍ଜେଇକୁ ଭଲ ଭାବରେ ସିଲ୍ କରାଯାଇ ରଖାଯାଇଥିବା ବେଳେ ଘଟଣାକୁ ନେଇ ଅଧିକ ତଦନ୍ତ ଜାରି ରହିଛି ବୋଲି ଏସ୍ପି ସିଂ ସୂଚନା ଦେଇଛନ୍ତି। ଘଟଣାର ମୁଖ୍ୟ ଅଭିଯୁକ୍ତ କାର୍ତ୍ତିକ ସାମନ୍ତରାୟ କହିଛନ୍ତି, ସେ ସମ୍ପୂର୍ଣ୍ଣ ନିର୍ଦ୍ଦୋଷ। ଏହି ଘଟଣା ସମ୍ପର୍କରେ କିଛି ଜାଣିନାହାନ୍ତି। ସେ ଝିଅ ବାହାଘର କରିବା ପାଇଁ କିଛି ଦିନ ତଳେ ତାଙ୍କର ଏକ ଜାଗା ବିକ୍ରି କରି ୯୮ ଲକ୍ଷ ଟଙ୍କା ମିଳିଥିଲା। ପୋଲିସ ସେହି ଟଙ୍କା ଜବତ କରୁଛି। ପୁରୀ ଭଳି ଧାର୍ମିକ ଓ ପର୍ଯ୍ୟଟନ ସହରରେ ଲକ୍ଷାଧିକ ଟଙ୍କାର ଗଞ୍ଜେଇ କାରବାର ହେଉଥିବା ବେଳେ ଅବକାରୀ ବିଭାଗ କିପରି ଜାଣିପାରିଲା ନାହିଁ ସେ ନେଇ ପ୍ରଶ୍ନ ଉଠିଛି।
