ଓ୍ବାଶିଂଟନ, ୨୩।୪: ଆମେରିକାର ଫାଇଜର ଏବଂ ବାୟୋଏନ୍ଟେକ୍ କମ୍ପାନୀ ଦ୍ୱାରା ପ୍ରସ୍ତୁତ କୋଭିଡ୍ ଟିକାର ବିଶ୍ୱବ୍ୟାପୀ ଚାହିଦା ବଢ଼ିଥିବାବେଳେ ସେହି ଅନୁଯାୟୀ ଯୋଗାଇବା ସମ୍ଭବ ହେଉନାହିଁ। ଅପରାଧୀମାନେ ଏହାକୁ ସୁଯୋଗ ଭାବେ ନେଇ ଅର୍ଥ ଉପାର୍ଜନ କରିବା ପାଇଁ ିଫାଇଜର କମ୍ପାନୀ ନାମରେ ନକଲି ଟିକା ବଜାରକୁ ଛାଡ଼ୁଛନ୍ତିି। ମେକ୍ସିକୋ, ପୋଲାଣ୍ଡ ଆଦି ଦେଶରେ ଟିକାର ଜାଲ୍ ଭର୍ସନ ଉପଲବ୍ଧ ହେଉଥିବା ଫାଇଜର ମୁଖପାତ୍ର କହିଛନ୍ତି। ଏ ସମ୍ପର୍କରେ ସେ ସିବିଏସ୍ ମନିଓ୍ବାଚ୍କୁ ଇମେଲ୍ ଜରିଆରେ ଜଣାଇଛନ୍ତି।
ଟିକା ଜାଲ୍ ହେଉଥିବା ସମ୍ପର୍କରେ ପୂର୍ବରୁ ଓ୍ବାଲ୍ ଷ୍ଟ୍ରିଟ୍ ଜର୍ନାଲରେ ପ୍ରକାଶ ପାଇଥିବାବେଳେ ଫାଇଜର କମ୍ପାନୀ ଏହାକୁ ସ୍ପଷ୍ଟ କରିଛି। ମେକ୍ସିକୋରେ ଉପଲବ୍ଧ ଟିକାରେ ଜାଲ୍ ଲେବଲ୍ ଲଗାଯାଇଥିବାବେଳେ ପୋଲାଣ୍ଡରେ ମିଳୁଥିବା ଟିକା ଲୋଚାକୋଚା ଚର୍ମର ଚିକିତ୍ସା ପାଇଁ ଉଦ୍ଦିଷ୍ଟ ବୋଲି କମ୍ପାନୀ କହିଛି। ଏହି ବେଆଇନ କାରବାର ରୋକିବା ପାଇଁ ଫାଇଜର କମ୍ପାନୀ ବିଭିନ୍ନ ଦେଶର ସରକାର, ଆଇନ ପ୍ରବର୍ତ୍ତନକାରୀ ସଂସ୍ଥା, ସ୍ବାସ୍ଥ୍ୟସେବା ପ୍ରଦାନକାରୀ ଓ ଅନ୍ୟମାନଙ୍କ ସହ ଉଦ୍ୟମ ଚଳାଇଛି। ଅନ୍ଲାଇନରେ ଫାଇଜର ଟିକା ନ କିଣିବା ଲାଗି କମ୍ପାନୀ ପକ୍ଷରୁ ପରାମର୍ଶ ଦିଆଯାଇଛି। କେବଳ ସରକାରୀ ଟିକାକରଣ କେନ୍ଦ୍ର ଓ ସାର୍ଟିଫିକେଟପ୍ରାପ୍ତ ସ୍ବାସ୍ଥ୍ୟସେବା ପ୍ରଦାନକାରୀଙ୍କ ପାଖରେ ନିରାପଦ ଓ ବୈଧ ଟିକା ଉପଲବ୍ଧ ବୋଲି କୁହାଯାଇଛି। ଇ-ବାଣିଜ୍ୟ ବା ଇଣ୍ଟରନେଟ ମାଧ୍ୟମରେ ବ୍ୟବସାୟ କାରବାର ସହଜ ହେଉଥିବାରୁ ଏହାର ଦ୍ରୁତ ବୃଦ୍ଧି ଘଟୁଛି। ଏଭଳି ପରିବେଶରେ ଟିକା ଏବଂ କୋଭିଡ୍ ଔଷଧ ଆଦିର ଜାଲିଆତି ଓ ବେଆଇନ କାରବାର ବଢ଼ିଚାଲିଥିବା ଫାଇଜର ମୁଖପାତ୍ର କହିଛନ୍ତି।
ଗତ ମାସରେ ଚାଇନା ଓ ଦକ୍ଷିଣ ଆଫ୍ରିକାର ଓ୍ବେର୍ହାଉସ୍ ଏବଂ କାରଖାନାରୁ ବିପୁଳ ପରିମାଣର ନକଲି ଫାଇଜର ଟିକା ଜବତ ହୋଇଥିଲା। ଏହି ଘଟଣାରେ ୮୦ରୁ ଊର୍ଦ୍ଧ୍ୱ ଲୋକଙ୍କୁ ଗିରଫ କରାଯାଇଥିବା ଇଣ୍ଟରପୋଲ୍ କହିଛି। ନକଲି ଟିକାକୁ ନେଇ ଇଣ୍ଟରପୋଲ୍ ଏବଂ ହୋମ୍ଲ୍ୟାଣ୍ଡ ସିକ୍ୟୁରିଟି ଡିପାର୍ଟମେଣ୍ଟ ତଦନ୍ତ କରିବା ସହ ଅନ୍ଲାଇନରେ କୋଭିଡ୍ ଟିକା ନ କିଣିବାକୁ ପରାମର୍ଶ ଦେଇଥିଲେ। ଅପରାଧୀ ସଂଗଠନଗୁଡ଼ିକ ଜାଲ୍ ଟିକା ପ୍ରସ୍ତୁତ କରି ଏହାକୁ ବଜାରକୁ ଛାଡ଼ୁଥିବାରୁ ଲୋକଙ୍କ ଜୀବନ ପ୍ରତି ବିପଦ ସୃଷ୍ଟି ହୋଇଛି। ଏହି ଟିକା କରୋନା କବଳରୁ ସୁରକ୍ଷା ଦେବନାହିଁ, ବରଂ ଗୁରୁତର ସ୍ବାସ୍ଥ୍ୟ ସମସ୍ୟା ସୃଷ୍ଟି କରିବ। କାରଣ ଉକ୍ତ ଟିକାର କୌଣସି ପରୀକ୍ଷା କରାଯାଇ ନାହିଁ। ଟିକା ବ୍ୟବସାୟରେ ଅପରାଧୀ ସଂଗଠନର ସମ୍ପୃକ୍ତିକୁ ନେଇ ଗତମାସରେ ବିଶ୍ୱ ସ୍ବାସ୍ଥ୍ୟ ସଂଗଠନ (ଡବ୍ଲ୍ୟୁଏଚ୍ଓ) ଉଦ୍ବେଗ ପ୍ରକାଶ କରିଥିଲା। ଉକ୍ତ ସଂଗଠନକୁ ମଧ୍ୟ ସେଭଳି ଟିକା ଯୋଗାଇବା ପାଇଁ ପ୍ରସ୍ତାବ ଆସିଥିଲା।
