କଟକସଦର,୧୯।୩(ଡି.ଏନ୍.ଏ.): ୨୦୨୦-୨୧ ଆର୍ଥିକ ବର୍ଷରେ ରାଜ୍ୟ ବିଦ୍ୟାଳୟ ଓ ଗଣଶିକ୍ଷା ବିଭାଗ ତରଫରୁ ପ୍ରାଥମିକ, ଉଚ୍ଚ ପ୍ରାଥମିକ ଓ ଉଚ୍ଚ ବିଦ୍ୟାଳୟଗୁଡ଼ିକୁ ପାଠାଗାର ପୁସ୍ତକ କିଣିବା ପାଇଁ ଆର୍ଥିକ ସହାୟତା ପ୍ରଦାନ କରିଛନ୍ତି। ଏହିସବୁ ପୁସ୍ତକ ରାଜ୍ୟ ବାହାରର ପୁସ୍ତକ ବିକ୍ରେତାମାନଙ୍କଠାରୁ କିଣାଯାଇଛି। ୫ ହଜାର ଟଙ୍କାର ପୁସ୍ତକ ପ୍ୟାକେଟରେ ୧୩ଶହରୁ ୧୫ଶହ ଟଙ୍କାର ପୁସ୍ତକ ରହିଛି। ଏଭଳି ଅନେକ ପୁସ୍ତକ କିଣାରେ ହେରଫେର ହୋଇଥିବା ଜଣାପଡ଼ିଛି। ତେବେ ଉକ୍ତ ପାଠାଗାର ପୁସ୍ତକ କିଣାରେ ବ୍ୟାପକ ଦୁର୍ନୀତି ହୋଇଛି ବୋଲି ରାଜ୍ୟ ଭାଜପା କାର୍ଯ୍ୟକାରିଣୀ ସଦସ୍ୟ ତଥା କଟକସଦର ନିର୍ବାଚନମଣ୍ଡଳୀର ନେତା ଦିଲୀପ ମଲ୍ଲିକ ଅଭିଯୋଗ କରିଛନ୍ତି। ରାଜ୍ୟରେ ବହୁ ପୁସ୍ତକ ପ୍ରକାଶକ ଥିବାବେଳେ ମହୀଶୂର, ମୁମ୍ବାଇ ଭଳି ବାହାର ବିକ୍ରେତାଙ୍କ ସରକାର ଅହେତୁକ ଅନୁକମ୍ପା ଦେଖାଇଛନ୍ତି ବୋଲି ମଲ୍ଲିକ ଏହି ବିବୃତିରେ ଜଣାଇଛନ୍ତି। କଟକ ସଦର ବ୍ଲକ ଶିକ୍ଷାଧିକାରୀଙ୍କ ଅଧୀନରେ ୧୩୦ରୁ ଅଧିକ ପ୍ରାଥମିକ, ଉଚ୍ଚ ପ୍ରାଥମିକ ଓ ଉଚ୍ଚ ବିଦ୍ୟାଳୟକୁ ଗୁରୁବାର ସୁଦ୍ଧା ପୁସ୍ତକ ପ୍ୟାକେଟ ଯୋଗାଇ ଦିଆଯାଇଛି। ପ୍ରାଥମିକ ବିଦ୍ୟାଳୟକୁ ୫ହଜାର, ଉଚ୍ଚ ପ୍ରାଥମିକ ବିଦ୍ୟାଳୟକୁ ୧୩ହଜାର ଓ ଉଚ୍ଚ ବିଦ୍ୟାଳୟକୁ ୧୫ହଜାର ଟଙ୍କା ଲେଖାଏ ସର୍ବଶିକ୍ଷା ଅଭିଯାନ ପାଣ୍ଠିରୁ ସରକାର ମଞ୍ଜୁର କରିଛନ୍ତି। ହେଲେ ପ୍ୟାକେଟ ଖୋଲିବା ପରେ ସେଥିରେ ଯଥାକ୍ରମେ ୧୩ଶହ, ୭ହଜାର ଓ ୯ହଜାର ଟଙ୍କାର ବହି ରହିଛି। ଫଳରେ ଛାତ୍ରୀଛାତ୍ରମାନଙ୍କୁ ଆବଶ୍ୟକ ଅନୁଯାୟୀ ପୁସ୍ତକ ନ ମିଳିବାରୁ ପାଠପଢ଼ାରେ ବ୍ୟାହତ ହେଉଛି। ତେଣୁ ଏହାର ଉଚ୍ଚସ୍ତରୀୟ ତଦନ୍ତ କରିବା ପାଇଁ ଗୁରୁବାର ରାଜ୍ୟ ସରକାରଙ୍କୁ ମଲ୍ଲିକ ଦାବି ଜଣାଇଛନ୍ତି। ପୋଷାକ କିଣା, ଯୋଗ କିଣା, ସ୍କୁଲ ସରଞ୍ଜାମ କିଣା ଭଳି ଏହି ପୁସ୍ତକ କିଣାରେ ଦୁର୍ନୀତି ଥିବା ସେ ଦର୍ଶାଇଛନ୍ତି। ଏ ସମ୍ପର୍କରେ ପଞ୍ଚାୟତସ୍ତରୀୟ ଶିକ୍ଷା କମିଟି ପ୍ୟାକେଟରେ କମ୍ ମୂଲ୍ୟର ବହି ଥିବା ଅଭିଯୋଗ କଲେ ଜିଲାସ୍ତରୀୟ ଅଧିକାରୀମାନେ ଶୁଣୁନାହାନ୍ତି ବୋଲି ଭାଜପା ପକ୍ଷରୁ କୁହାଯାଇଛି। ଅଭିଯୋଗକୁ ନେଇ କଟକ ଜିଲା ଭାରପ୍ରାପ୍ତ ଶିକ୍ଷାଧିକାରୀ ସୁସ୍ମିତା ସାହୁ କହିଛନ୍ତି, ପୁସ୍ତକ ପ୍ୟାକେଟର ମୂଲ୍ୟ ଯଥାକ୍ରମେ ୫ହଜାର, ୧୩ହଜାର ଓ ୧୫ହଜାର ଟଙ୍କା ବୋଲି କୌଣସି ବିଦ୍ୟାଳୟକୁ କୁହାଯାଇନାହିଁ।
