ଦୋହା, ୨୫ା୯ (ଏପି)-କରୋନା ଭାଇରସ୍ ସଂକ୍ରମଣ ଯୋଗୁ ଏହାର ସମ୍ପୂର୍ଣ୍ଣ ଦଳ ଛିଡ଼ା କରିବା ସମ୍ଭବପର ନ ଥିବାରୁ ଗତଥରର ଚାମ୍ପିୟନ ଅଲ୍-ହିଲାଲ ଏସିଆନ ଚାମ୍ପିୟନ୍ସ ଲିଗ୍ରୁ ଓହରିଯାଇଛି। ଏସିଆର ପ୍ରିିମିୟର କ୍ଲବ ପ୍ରତିଯୋଗିତାରେ ଏହି ସୌଦି ଆରବର ଟିମର ଖେଳାଳି ଓ ଅଫିସିଆଲ ମିଶାଇ ମୋଟ ୩୧ଜଣଙ୍କର କୋଭିଡ୍-୧୯ ଟେଷ୍ଟରେ ପଜିଟିଭ ଆସିଛି। ସଂଯୁକ୍ତ ଆରବ ଏମିରେଟ୍ସ (ୟୁଏଇ)ର ଶାବାବ୍ ଅଲ୍ ଆହଲି ଦୁବାଇ ବିପକ୍ଷ ଫାଇନାଲ ଗ୍ରୁପ୍ ବି’ ମ୍ୟାଚ ପାଇଁ ଦଳର କେବଳ ୯ଜଣ ପ୍ରମୁଖ ଖେଳାଳି ଓ ଦୁଇ ବିକଳ୍ପ ଗୋଲ୍କିପର ଫିଟ୍ ରହିଥିଲେ। ଟୁର୍ନାମେଣ୍ଟର ନିୟମାନୁସାରେ ଯେଉଁ ଦଳର୧୩ଜଣ ଖେଳାଳି ପଡ଼ିଆକୁ ଓହ୍ଲାଇ ପାରିବେ ନାହିଁ ତାହାର ସମସ୍ତ ଗେମ୍କୁ ରଦ୍ଦ କରିଦିଆଯିବ। ପୂର୍ବ ଫଳାଫଳକୁ ନେଇ ଅଲ୍-ହିଲାଲ୍ ନକ୍ଆଉଟ୍ ପର୍ଯ୍ୟାୟ ପାଇଁ ନିଜ ସ୍ଥାନ ସୁରକ୍ଷିତ ରଖିସାରିଥିଲା। କିନ୍ତୁ ବର୍ତ୍ତମାନ ଏହି ଦଳ ଟାଇଟଲ ବଜାୟ ରଖିବାକୁ ଅସମର୍ଥ ହେବ।
