ନୂଆଦିଲ୍ଲୀ,୨୯।୯: ମହାମାରୀ କରୋନାର ପ୍ରାଦୁର୍ଭାବ ଦିନକୁ ଦିନ ବଢ଼ି ଚାଲିଥିବାବେଳେ ୨୦୨୧ ମାର୍ଚ୍ଚ ମାସ ସୁଦ୍ଧା ଭାରତରେ ପ୍ରଥମ କରୋନା ଟିକା ଉପଲବ୍ଧ ହେବ ବୋଲି କେନ୍ଦ୍ର ସ୍ବାସ୍ଥ୍ୟ ଓ ପରିବାର କଲ୍ୟାଣ ମନ୍ତ୍ରୀ ହର୍ଷବର୍ଦ୍ଧନ ସୋମବାର ପ୍ରକାଶ କରିଛନ୍ତି। ଏଥିଲାଗି ଯୁଦ୍ଧକାଳୀନ ଭିତ୍ତିରେ ପ୍ରୟାସ ଜାରି ରହିଛି ବୋଲି ମିଡିଆକୁ ସମ୍ବୋଧନ କରି କହିଛନ୍ତି। ଭାରତରେ ୩ଟି କରୋନା ଟିକା ଲାଗି ଗବେଷଣା ଜାରି ରହିଛି। ପର୍ଯ୍ୟାୟକ୍ରମେ ପରୀକ୍ଷା ନିରୀକ୍ଷା ମଧ୍ୟ କରାଯାଉଛି। କ୍ଲିନିକାଲ ଟ୍ରାଏଲ ସଫଳ ହେବା ପରେ ଟିକା ଭାରତରେ ଉପଲବ୍ଧ ହେବ ବୋଲି ହର୍ଷବର୍ଦ୍ଧନ ପ୍ରକାଶ କରିଛନ୍ତି।
ଭାରତରେ ବିଶ୍ୱର ଦ୍ୱିତୀୟ ସର୍ବାଧିକ କରୋନା ରୋଗୀ ରହିଥିବାବେଳେ ଆକ୍ରାନ୍ତଙ୍କ ସଂଖ୍ୟା ୬୦.୮୦ ଲକ୍ଷ ଛୁଇଁଲାଣି। ୯୫,୬୦୬ ବ୍ୟକ୍ତିଙ୍କ ଜୀବନ ଗଲାଣି। ଯଦିଓ ୫୦.୧୭ ଲକ୍ଷ ଭୂତାଣୁ ଆକ୍ରାନ୍ତ ସୁସ୍ଥ ହୋଇ ଘରକୁ ଫେରିଛନ୍ତି, ତଥାପି ଭାରତରେ ୯.୬୫ ଲକ୍ଷ ଆକ୍ଟିଭ୍ ମାମଲା ରହିଛି। ଗତ ୨୪ ଘଣ୍ଟା ମଧ୍ୟରେ ୮୨,୧୭୦ ନୂଆ ମାମଲା ସାମ୍ନାକୁ ଆସିଛି। ମହାରାଷ୍ଟ୍ରରେ ସର୍ବାଧିକ ୧୩.୩୯ ଲକ୍ଷ କରୋନା ରୋଗୀ ରହିଥିବାବେଳେ ୩୫,୫୭୧ ଜଣଙ୍କ ପ୍ରାଣ ଗଲାଣି। ଏଥିସହ ଆନ୍ଧ୍ରପ୍ରଦେଶ, ତାମିଲନାଡ଼ୁ, କର୍ନାଟକ, ଉତ୍ତରପ୍ରଦେଶ, ଦିଲ୍ଲୀ, ପଶ୍ଚିମବଙ୍ଗ ଆଦି ରାଜ୍ୟରେ ରୋଗୀ ସଂଖ୍ୟା ବଢ଼ିବାରେ ଲାଗିଛି। ବିଭିନ୍ନ ପଦକ୍ଷେପ ସତ୍ତ୍ୱେ ସଂକ୍ରମଣ କମିବାର ନାଁ ନେଉନାହିଁ। ବିଶ୍ୱର ବିଭିନ୍ନ ଦେଶ ଟିକା ପ୍ରସ୍ତୁତିରେ ଲାଗିଥିବାବେଳେ ମାର୍ଚ୍ଚ ସୁଦ୍ଧା ଭାରତୀୟ ଟିକା ଉପଲବ୍ଧ ହେବ ବୋଲି ସ୍ବାସ୍ଥ୍ୟମନ୍ତ୍ରୀ ପ୍ରକାଶ କରିଛନ୍ତି। ଇଣ୍ଡିଆନ୍ କାଉନ୍ସିଲ ଅଫ୍ ମେଡିକାଲ ରିସର୍ଚ୍ଚ (ଆଇସିଏମ୍ଆର୍)ର ୧୦୦ ବର୍ଷର ଘଟଣାକ୍ରମ ସମ୍ପର୍କରେ କହିବା ଅବସରରେ ସଂସ୍ଥା ସହ ଯୋଡ଼ି ହୋଇ ରହିଥିବା ବୈଜ୍ଞାନିକଙ୍କ କାର୍ଯ୍ୟଧାରା ଅତୁଳନୀୟ ବୋଲି ହର୍ଷବର୍ଦ୍ଧନ କହିଛନ୍ତି।
