ଛତ୍ରପୁର, ୨୯।୭(ଡି.ଏନ୍.ଏ.)- ଗଞ୍ଜାମ ଜିଲାରେ କରୋନା ଭୟାବହତାକୁ ନେଇ ଲୋକେ ଭୟଭୀତ ଅବସ୍ଥାରେ ଅଛନ୍ତି। ଦୈନିକ ଶତାଧିକ ଲୋକେ କରୋନାରେ ସଂକ୍ରମିତ ହେଉଛନ୍ତି। ବର୍ତ୍ତମାନ ସୁଦ୍ଧା କରୋନାରେ ଗଞ୍ଜାମର ୮୬ ଜଣଙ୍କ ଜୀବନ ଗଲାଣି। ଅପରପକ୍ଷରେ ଜ଼ିଲାରେ ଗତ ସପ୍ତାହ ତୁଳନାରେ କରୋନାରେ ଉଭୟ ପଜିଟିଭ୍ ଓ ମୃତ୍ୟୁ ସଂଖ୍ୟା କମୁଥିବା ନେଇ ଗଞ୍ଜାମ ଜ଼ିଲାପାଳ ବିଜୟ ଅମୃତା କୁଲାଙ୍ଗେ ତଥ୍ୟ ଦେଇଛନ୍ତି। ସେ କହିଛନ୍ତି, ଜ଼ିଲାରେ ଘରକୁ ଘର ଯାଇ ସ୍କ୍ରିନିଂ ହେଉଛି ଲକ୍ଷଣ ଚି଼ହ୍ନଟ ହେଉଛି। ଏହାପରେ କରୋନା ଟେଷ୍ଟିଂ କରାଯାଉଛି। ଏହାଫଳରେ ଗତ ସପ୍ତାହରେ ପଜିଟିଭ୍ ସଂଖ୍ୟା ବଢ଼ୁଥିଲା ଏବେ ବି କେତେକ ଲୋକ ଲକ୍ଷଣ ଲୁଚାଉଛନ୍ତି ବିଳମ୍ବରେ ଗୁରୁତର ହୋଇ ହସ୍ପିଟାଲକୁ ଆସୁଛନ୍ତି। ଫଳରେ ଶେଷ ସମୟରେ ଅମୁଲ୍ୟ ଜୀବନ ବଞ୍ଚାଇବାରେ ଅସୁବିଧା ହେଉଛି। ଏଣୁ ମୃତ୍ୟୁ ରୋକିବାକୁ ହେଲେ ପ୍ରାଥମିକ ଅବସ୍ଥାରେ ଲକ୍ଷଣ ଚି଼ହ୍ନଟ କରି ଚିକିତ୍ସାର ଆବଶ୍ୟକତା ରହିଥିବା ଜିଲାପାଳ କହିଛନ୍ତି। ଜ଼ିଲାରେ ୧ ପ୍ରତିଶତରୁ ୦.୮ ପ୍ରତିଶତକୁ କରୋନା ମୃତ୍ୟୁ ହାର ଖସିଛି। ଏଥିସହ କରୋନା ସୁସ୍ଥ ସଂଖ୍ୟା ୬୪ ପ୍ରତିଶତ କୁ ବୃଦ୍ଧି ହୋଇଛି। ୨୮ ତାରିଖରେ ୨୪୫ କରୋନା ପଜିଟିଭ ଚି଼ହ୍ନଟ ହୋଇଥିବା ବେଳେ ତାର ପୂର୍ବ ୨୪ ଘଣ୍ଟାରେ ୩୩୨ ଜଣ ପଜିଟିଭ ହୋଇଥିଲେ। ୨୦ ତାରିଖରେ ୨୨୫, ୨୧ ରେ ୩୭୧, ୨୨ ରେ ୭୪୧, ୨୩ ରେ ୭୩୨, ୨୪ ରେ ୫୬୦, ୨୫ ରେ ୪୮୪, ୨୬ ରେ ୪୯୧ ଜଣ ପଜିଟିଭ ହୋଇଥିବା ଜ଼ିଲାପାଳ କହିଛନ୍ତି। ଗ୍ରାମାଞ୍ଚଳରେ ଅକ୍ସିଜେନ ରହିତ ଆମ୍ବୁଲାନ୍ସର ବ୍ୟବସ୍ଥା କରାଯାଉଥିବା ମଧ୍ୟ ଜ଼ିଲାପାଳ ସୂଚନା ଦେଇଛନ୍ତି।
