ନୂଆଦିଲ୍ଲୀ,୩।୧ : ବିଶ୍ୱର ଅନେକ ଦେଶରେ କରୋନା ସଂକ୍ରମଣ ବୃଦ୍ଧି ପାଉଥିବା ବେଳେ ଭାରତରେ କରୋନା ଟିକାର ଦ୍ୱିତୀୟ ବୁଷ୍ଟର ଡୋଜ ଅର୍ଥାତ୍ ଚତୁର୍ଥ ଡୋଜ ବିଷୟରେ ଆଲୋଚନା ହେଉଛି। ଏହି ସମୟରେ ସରକାରୀ ସୂତ୍ରରୁ ପ୍ରକାଶ ଯେ କରୋନା ଟିକାର ଦ୍ୱିତୀୟ ବୁଷ୍ଟର ଡୋଜର ଆବଶ୍ୟକତା ସମ୍ପର୍କିତ ଯୋଜନା ଏପର୍ଯ୍ୟନ୍ତ ସରକାରଙ୍କ କାର୍ଯ୍ୟସୂଚୀରେ ନାହିଁ। କରୋନା ଟିକାର ଚତୁର୍ଥ ଡୋଜ ବିଷୟରେ କୌଣସି ପଦକ୍ଷେପ ନିଆଯାଉ ନାହିଁ। କାରଣ ଦେଶର ଅଧିକାଂଶ ଲୋକ ଏପର୍ଯ୍ୟନ୍ତ ଟିକାକରଣର ତୃତୀୟ ଡୋଜ ଅର୍ଥାତ ପ୍ରଥମ ବୁଷ୍ଟର ଡୋଜ ପାଇ ନାହାଁନ୍ତି।
ଏହା ବ୍ୟତୀତ ବର୍ତ୍ତମାନ ବ୍ୟବହୃତ ହେଉଥିବା ଟିକା ପାଇଁ ଦ୍ୱିତୀୟ ବୁଷ୍ଟରର ଉପଯୋଗୀତା ଉପରେ କୌଣସି ତଥ୍ୟ ଉପଲବ୍ଧ ନାହିଁ ବୋଲି ସୂତ୍ରରୁ ପ୍ରକାଶ। ଜାନୁଆରୀ ୨୦୨୨ ରେ ଭାରତରେ ପ୍ରଥମ ବୁଷ୍ଟର ଡୋଜ ଦିଆଯିବା ଆରମ୍ଭ ହୋଇଥିଲା। ଏପର୍ଯ୍ୟନ୍ତ ଯୋଗ୍ୟ ଜନସଂଖ୍ୟାର ମାତ୍ର ୨୮ ପ୍ରତିଶତଙ୍କୁ ଏହା ଦିଆଯାଇଛି।
ଆମେରିକା ଏବଂ ବ୍ରିଟେନ ପରି ଦେଶଗୁଡିକ ସମ୍ପୂର୍ଣ୍ଣ ର୍ ଟିକାକରଣ କରିଥିବା ବ୍ୟକ୍ତିଙ୍କୁ ତୃତୀୟ ଏବଂ ଚତୁର୍ଥ ବୁଷ୍ଟର୍ ଡୋଜ ଦେଉଛନ୍ତି । ଏହା ସହିତ ସେହି ଲୋକମାନଙ୍କୁ ଅତିରିକ୍ତ ଟିକା ମଧ୍ୟ ଦିଆଯାଉଛି, ଯେଉଁମାନଙ୍କର ପ୍ରାରମ୍ଭିକ ଡୋଜ ପରେ ମଧ୍ୟ ରୋଗ ପ୍ରତିରୋଧକ ଶକ୍ତି ସୁଦୃଢ଼ ହୋଇନାହିଁ ।
