ନୂଆଦିଲ୍ଲୀ, ୧୬।୭: ଆସନ୍ତା ୩ ବର୍ଷ ପର୍ଯ୍ୟନ୍ତ କରୋନା ମହାମାର ସଂକ୍ରମଣ ରହିବ। ଏହାଦ୍ୱାରା ଭାରତୀୟ ବିମାନ କମ୍ପାନୀ ଗୁଡ଼ିକର କ୍ଷତି ପରିମାଣ ଲକ୍ଷେ ୧୦ ହଜାର କୋଟିରୁ ଲକ୍ଷେ ୩୦ ହଜାର କୋଟି ମଧ୍ୟରେ ହେବ ବୋଲି କ୍ରିସିଲ୍ ରେଟିଂ ଏଜେନ୍ସି ପକ୍ଷରୁ ପ୍ରକାଶିତ ରିପୋର୍ଟରେ ଉଲ୍ଲେଖ କରାଯାଇଛି। କରୋନା ସଂକ୍ରମଣ ଯୋଗୁ ସାରା ପୃଥିବୀରେ ଭିଜା ଏବଂ ବିମାନ ଯାତ୍ରା ଉପରେ ପ୍ରତିବନ୍ଧକ ଲାଗିଛି। ୨୦୨୦ରୁ ୨୦୨୨ ମଧ୍ୟରେ ଭାରତୀୟ ବିମାନ କମ୍ପାନୀ ଗୁଡ଼ିକର ରାଜସ୍ବରେ ହାନି ହେବ ବୋଲି ରିପୋର୍ଟ ଦର୍ଶାଯାଇଛି। ତେବେ ୨୦୨୧ରେ ଅଶୋଧିତ ତୈଳ ଦାମ ବ୍ୟାରେଲ୍ ପିଛା ୩୮ରୁ ୪୨ ଡଲାର ମଧ୍ୟରେ ରହିଲେ ବିମାନ କମ୍ପାନୀ ଗୁଡ଼ିକର କ୍ଷତି ପରିମାଣ କମିପାରେ ବୋଲି ରିପୋର୍ଟ କୁହାଯାଇଛି। ବିମାନରେ ୩୦ରୁ ୪୫ ପ୍ରତିଶତ ଖର୍ଚ୍ଚ କେବଳ ଇନ୍ଧନ ପାଇଁ ହୋଇଥାଏ। କରୋନା ସଂକ୍ରମଣ ଯୋଗୁ ଘରୋଇ ଯାତ୍ରୀଙ୍କ ସଂଖ୍ୟା ୪୦ରୁ ୪୫ ପ୍ରତିଶତ କମିବାର ଅନୁମାନ କରାଯାଇଛି। ସେହିପରି ବିଦେଶୀ ଯାତ୍ରୀଙ୍କ ସଂଖ୍ୟାରେ ୬୦ରୁ ୬୫ ପ୍ରତିଶତ ପର୍ଯ୍ୟନ୍ତ ହ୍ରାସ ଆକଳନ କରାଯାଇଛି।
