କରୋନା ମହାମାରୀ ସମୟରେ ବିଶେଷକରି ପିଲାମାନଙ୍କ ପାଠପଢ଼ା ବ୍ୟାହତ ହୋଇଛି। ଏହି ଦୁଃସ୍ଥିତି ସମୟରେ ଏମିତି କେତେକ ଶିକ୍ଷକ ଅଛନ୍ତି, ଯେଉଁମାନେ ପିଲାମାନଙ୍କୁ ଉଚିତ୍ ଶିକ୍ଷା ଦେବାରେ ଆଦୌ ଅବହେଳା କରୁନାହାନ୍ତି। ଏହି ଦୃଶ୍ୟ ଦେଖିବାକୁ ମିଳିଛି ମଧ୍ୟପ୍ରଦେଶର ମନ୍ଦଶୌରରେ ଜଣେ ଦିବ୍ୟାଙ୍ଗ ଶିକ୍ଷକଙ୍କ କ୍ଷେତ୍ରରେ। ଯିଏକି କରୋନା ମହାମାରୀ ସମୟରେ ଛାତ୍ରୀଛାତ୍ରଙ୍କୁ ନିରନ୍ତର ଶିକ୍ଷା ପ୍ରଦାନ କରିଆସୁଛନ୍ତି। କରୋନା ଯୋଗୁ ସ୍କୁଲ ବନ୍ଦ। ତଥାପି ଛାତ୍ରୀଛାତ୍ରଙ୍କୁ ପାଠ ପଢ଼ାଇବା ସହ ଏବଂ ହୋମ୍ଓ୍ବାର୍କ ପୂର୍ବପରି ଚାଲୁରଖିଛନ୍ତି।
ସ୍କୁଲଗୁଡ଼ିକ ବନ୍ଦ ହେବା ପରଠାରୁ ରାଜ୍ୟ ସରକାର ଜୁଲାଇ ୭ରୁ ‘ନିଜ ଘର ନିଜ ବିଦ୍ୟାଳୟ’ ଯୋଜନା ଅଧୀନରେ ପିଲାମାନଙ୍କୁ ଘରେ ଶିକ୍ଷା ଦେବା ପାଇଁ ନିର୍ଦ୍ଦେଶ ଦେଇଥିଲେ। ବର୍ତ୍ତମାନ ସରକାରୀ ଆଦେଶନାମା କେତେଦୂର ପାଳନ ହେଉଛି ତାହା କାହାକୁ ଅଛପା ନାହିଁ। ତେବେ ଏହି ସମୟରେ ଜଣେ ଦିବ୍ୟାଙ୍ଗ ଶିକ୍ଷକ ପ୍ରତିଦିନ ପିଲାମାନଙ୍କୁ ନିଷ୍ଠା ସହକାରେ ପଢ଼ାଉଛନ୍ତି।
ଏହି ଶିକ୍ଷକଙ୍କ ନାମ ରାମେଶ୍ୱର। ପିଲାମାନଙ୍କୁ ପଢ଼ାଇବା ପାଇଁ ଦୃଢ଼ ଇଚ୍ଛାଶକ୍ତି ରହିଛି ରାମେଶ୍ୱରଙ୍କର। ପିଲାମାନେ ମଧ୍ୟ ଏମିତି ଶିକ୍ଷକଙ୍କୁ ପାଇବା ପାଇଁ ବ୍ୟାକୁଳ। ପ୍ରତିଦିନ ଚାହିଁ ରହିଥାନ୍ତି କେତେବେଳେ ସାର୍ ଆସି ତାଙ୍କୁ ପଢ଼ାଇବେ। ଏହି ଗରିବ ପିଲାମାନେ ଅନ୍ଲାଇନ୍ ପାଠପଢ଼ାରୁ ବଞ୍ଚିତ। ତେଣୁ ରାମେଶ୍ୱରଙ୍କ ଶିକ୍ଷାଦାନ ଏହି ସମୟରେ ବେଶ୍ ଆକୃଷ୍ଟ କରୁଛି। ସେ ପ୍ରତିଦିନ ସକାଳେ ସହରର ବିଭିନ୍ନ ଅଞ୍ଚଳରେ ଠିକ୍ ସମୟରେ ପହଞ୍ଚି ନିଜ ଗାଡ଼ିରେ ପହଞ୍ଚନ୍ତି। ସେଠାରେ ପିଲାମାନଙ୍କୁ ପଢ଼ାଇଥାନ୍ତି। ସମସ୍ତ ପିଲାଙ୍କୁ ହୋମ୍ଓ୍ବାର୍କ ଦିଅନ୍ତି ଏବଂ ଚେକ୍ ମଧ୍ୟ କରନ୍ତି। ଯେଉଁଠି ଖୋଲା ସ୍ଥାନ ଦେଖନ୍ତି ସେଠାରେ କିଛି ପିଲାଙ୍କୁ ଏକାଠି କରି ପଢ଼ାଇଥାନ୍ତି।
ରାମେଶ୍ୱର କୁହନ୍ତି, ସରକାରଙ୍କ ଯୋଜନା ‘ଆମ ଘର ଆମ ବିଦ୍ୟାଳୟ’ ଯୋଜନା ଅନୁଯାୟୀ ଜୁଲାଇ ୭ରୁ ସେ ପ୍ରତିଦିନ ସକାଳେ ପିଲାମାନଙ୍କୁ ଶିକ୍ଷା ଦେବାକୁ ନିଜ ଗାଡ଼ିରେ ବାହାରି ପଡ଼ନ୍ତି। ସକାଳ ୧୦ରୁ ଅପରାହ୍ନ ୧ଟା ପର୍ଯ୍ୟନ୍ତ ସେ ପିଲାମାନଙ୍କୁ ପଢ଼ାଇଥାନ୍ତି। ସିଏମ୍ ଶିବରାଜ ସିଂ ମଧ୍ୟ ରାମେଶ୍ୱରଙ୍କୁ ଟୁଇଟ୍ କରି ପ୍ରଶଂସା କରିଛନ୍ତି। ଚନ୍ଦ୍ରପୁରା ପ୍ରାଥମିକ ବିଦ୍ୟାଳୟରେ କାର୍ଯ୍ୟରତ ରାମେଶ୍ୱର ଅଧିକାଂଶ ଗରିବ ପିଲାଙ୍କୁ ଶିକ୍ଷାଦାନ କରିଥାନ୍ତି। ତାଙ୍କର ଏହି ମହତ୍ତ୍ୱପୂର୍ଣ୍ଣ କାର୍ଯ୍ୟ ପାଇଁ ବିଭିନ୍ନ ମହଲରୁ ପ୍ରଶଂସାର ସୁଅ ଛୁଟୁଛି।
