ନୂଆଦିଲ୍ଲୀ : କୋଭିଡ୍-୧୯ ଯୋଗୁ ଦେଶର ଅନେକ ସମବାୟ ବ୍ୟାଙ୍କ ବର୍ତ୍ତମାନ ଚାପଗ୍ରସ୍ତ ହୋଇଛନ୍ତି। ସେମାନଙ୍କ ଆର୍ଥତ୍କ ସ୍ଥିତିକୁ ରିଜର୍ଭ ବ୍ୟାଙ୍କ ବର୍ତ୍ତମାନ ତର୍ଜମା କରୁଥିବା ଅର୍ଥମନ୍ତ୍ରୀ ନିର୍ମଳା ସୀତାରାମନ ମଙ୍ଗଳବାର ସୂଚନା ଦେଇଛନ୍ତି। ୧୯୬୫ ପରଠାରୁ ନିୟନ୍ତ୍ରଣାଧୀନ ସଂସ୍ଥାଗୁଡ଼ିକ ଏହା ପରିସରରେ ଆସୁଛନ୍ତି। ୨୭୭ ଅର୍ବାନ କୋଅପରେଟିଭ ବ୍ୟାଙ୍କ କ୍ଷତି ସାମ୍ନା କରିଛନ୍ତି। ଏହା ମଧ୍ୟରୁ ୧୦୫ ଅର୍ବାନ କୋଅପରେଟିଭ ବ୍ୟାଙ୍କ ନୂ୍ୟନତମ ନିୟାମକ ପୁଞ୍ଜି ଆବଶ୍ୟକତା ନିୟମ ପାଳନ କରିବାକୁ ସକ୍ଷମ ହେଉନାହାନ୍ତି। ୪୭ଟିରେ ନେଗେଟିଭ୍ ନେଟ୍ଓର୍ଥ ରହିଛି। ୩୨୮ ଅର୍ବାନ କୋଅପରେଟିଭ ବ୍ୟାଙ୍କରେ ୧୫% ମୋଟ୍ ଏନ୍ପିଏ ରହିଛି। ମହାମାରୀ ଯୋଗୁ ଏହି ବ୍ୟାଙ୍କଗୁଡିକର ଚାପ ଆହୁରି ବଢ଼ିଯାଇଛି। ବ୍ୟାଙ୍କଗୁଡିକର ମୋଟ ଏନ୍ପିଏ ଅନୁପାତ ମାର୍ଚ୍ଚ ୨୦୧୯ରେ ୭.୨୭% ରହିଥିବା ବେଳେ ଏହା ୨୦୨୦ ମାର୍ଚ୍ଚରେ ୧୦%କୁ ବୃଦ୍ଧି ଘଟିଥିବା ଲୋକ ସଭାରେ ସୀତାରାମନ ଏହି ସୂଚନା ଦେଇଛନ୍ତି। ବ୍ୟାଙ୍କିଙ୍ଗ୍ ରେଗୁଲେଶନ ସଂଶୋଧନ ବିଲ୍କୁ ସଂସଦରେ ଅନୁମୋଦନ ମିଳିଛି। ଏହି ବିଲ୍କୁ ରାଜ୍ୟ ସଭା ମଙ୍ଗଳବାର ମଞ୍ଜୁରୀ ପ୍ରଦାନ କରିଥିଲା। ସୀତାରାମନ କହିଛନ୍ତି ଯେ, ନିୟମ ସଂଶୋଧନ ଦ୍ୱାରା ଆର୍ବିଆଇ ପରିସରକୁ ସମବାୟ ବ୍ୟାଙ୍କଗୁଡିକ ଆସିବେ। ଏହାଦ୍ୱାରା ନିବେଶକଙ୍କ ସ୍ବାର୍ଥ ରକ୍ଷା ହୋଇପାରିବ।
