ଅହମଦାବାଦ,୫।୧୦: ଅହମଦାବାଦସ୍ଥିତ ନରେନ୍ଦ୍ର ମୋଦି ଷ୍ଟାଡିୟମରେ ଗୁରୁବାର ଖେଳାଯାଇଥିବା ୨୦୨୩ ବିଶ୍ୱକପର ଉଦ୍ଘାଟନୀ ମ୍ୟାଚ୍ରେ ଓପନର ଡେଭନ କନୱେ ଏବଂ ଅଲ୍ରାଉଣ୍ଡର ରଚିନ ରବୀନ୍ଦ୍ରଙ୍କ ଦମ୍ଦାର ଶତକ ବଳରେ ନ୍ୟୁଜିଲାଣ୍ଡ ଡିଫେଣ୍ଡିଂ ଚାମ୍ପିୟନ ଇଂଲଣ୍ଡକୁ ହରାଇ ଦେଇଛି। ଫଳରେ ୨୦୧୯ ବିଶ୍ବକପ ଫାଇନାଲ ପରାଜୟର ପ୍ରତିଶୋଧ ନେଇଛି ନ୍ୟୁଜିଲାଣ୍ଡ । ନ୍ୟୁଜିଲାଣ୍ଡ ୯ ଉଇକେଟ୍ରେ ବିଜୟୀ ହୋଇ ବିଶ୍ୱକପ୍ ଅଭିଯାନ ଆରମ୍ଭ କରିଛି। ନ୍ୟୁଜିଲାଣ୍ଡ ଟସ୍ ଜିତି ପ୍ରଥମେ ବୋଲିଂ କରିବାକୁ ନିଷ୍ପତ୍ତି ନେଇଥିଲା। ଫଳରେ ଆମନ୍ତ୍ରଣ ପାଇ ପ୍ରଥମ ବ୍ୟାଟିଂ କରିଥିବା ଇଂଲଣ୍ଡ ଦଳ ନିର୍ଦ୍ଧାରିତ ୫୦ ଓଭରରେ ୯ ଉଇକେଟ ହରାଇ ୨୮୨ ରନ୍ କରିଥିଲା। ହେଲେ ନ୍ୟୁଜିଲାଣ୍ଡ ୩୭ତମ ଓଭରରେ ଗୋଟିଏ ଉଇକେଟ ହରାଇ ବିଜୟ ଲକ୍ଷ୍ୟ ହାସଲ କରିନେଇଥିଲା । ଦଳ ପକ୍ଷରୁ ଦଓ୍ବେନ କନଓ୍ବେ ଅପରାଜିତ ୧୫୨ କରିଥିବା ବେଳେ ରଚିନ ରବୀନ୍ଦ୍ର ଅପରାଜିତ ୧୨୩ ରନ୍ କରିଥିଲେ।
୨୮୩ ରନ୍ର ଟାର୍ଗେଟ୍ର ଯବାବରେ ନ୍ୟୁଜିଲ୍ୟାଣ୍ଡ ୧୦ ରନ୍ରେ ୱିଲ ୟଙ୍ଗ(୦)ଙ୍କୁ ହରାଇଥିଲା। ତାଙ୍କୁ ପ୍ରଥମ ବଲରେ ସାମ କୁରାନ ଆଉଟ କରିଥିଲେ। ଏହାପରେ ରବୀନ୍ଦ୍ର ଓ କନୱେ ସ୍ଥିତି ସମ୍ଭାଳିଥିଲେ। ଉଭୟ ବଡ଼ ବଡ଼ ଶଟ ଖେଳି ଦ୍ରୁତ ଗତିରେ ନ୍ୟୁଜିଲାଣ୍ଡର ସ୍କୋର ବୋର୍ଡକୁ ଆଗକୁ ନେଇଥିଲେ। ବିଶେଷ କରି ରବୀନ୍ଦ୍ରଙ୍କ ବ୍ୟାଟରୁ ଆକର୍ଷଣୀୟ ସଟ୍ ଦେଖିବାକୁ ମିଳିଥିଲା।
