ଭଞ୍ଜନଗର,୧୮।୮(ବାବୁଲା ପ୍ରଧାନ):ଗଞ୍ଜାମ ଜିଲା ଭଞ୍ଜନଗରସ୍ଥିତ କବି ସମ୍ରାଟ ଉପେନ୍ଦ୍ର ଭଞ୍ଜ ମହାବିଦ୍ୟାଳୟରେ ମଙ୍ଗଳବାର ‘ନିଶାମୁକ୍ତ ଭାରତ’ ଉପରେ ଏକ ସଚେତନତା ସଭା ଅନୁଷ୍ଠିତ ହୋଇଯାଇଛି। କଲେଜ ଅଧ୍ୟକ୍ଷ ଡ. ଗଗନ ବିହାରୀ ପୁରୋହିତ ସଭାରେ ଅଧ୍ୟକ୍ଷତା କରି ମନକୁ ଦୃଢ଼ ଓ ନିୟନ୍ତ୍ରଣରେ ରଖିଲେ ନିଶା ଭଳି ଅଭ୍ୟାସଠାରୁ ଦୂରେଇ ରହିବା ସମ୍ଭବ ବୋଲି କହିଥିଲେ। ନିଶା କେବଳ ଜଣେ ବ୍ୟକ୍ତିର ଜୀବନକୁ ନଷ୍ଟ କରେ ନାହିଁ, ଏହା ପରିବାର ଓ ସମାଜ ଉପରେ ମଧ୍ୟ ନକାରାତ୍ମକ ପ୍ରଭାବ ପକାଇଥାଏ। ତେଣୁ ଯୁବପିଢ଼ି ନିଶାଠାରୁ ଦୂରେଇ ରହି ସୁସ୍ଥ ଓ ସୁନ୍ଦର ଜୀବନ ଗଢ଼ିବା ଆବଶ୍ୟକ ବୋଲି ସେ କହିଥିଲେ।
ଭଞ୍ଜନଗର ଓମ ଶାନ୍ତି ଶାଖା କାର୍ଯ୍ୟାଳୟର ମୁଖ୍ୟ ସଂଯୋଜିକା ସନ୍ତୋଷିନୀ ଭଉଣୀ ସମ୍ମାନିତ ଅତିଥି ଭାବେ ଯୋଗଦେଇ ଆଧ୍ୟାତ୍ମିକ ଚେତନା ଦ୍ୱାରା ନିଶାଠାରୁ ଦୂରେଇ ରହିହେବ ବୋଲି କହିଥିଲେ।
ଏହି ଅବସରରେ ପ୍ରଶାସନିକ ଅଧିକାରୀ କୁମୁଦ ଚନ୍ଦ୍ର ମହାପାତ୍ର, ବଟନି ବିଭାଗର ମୁଖ୍ୟ ଅଧ୍ୟାପିକା ସୁନିତା ରାଣୀ ଖଣ୍ଡୁଆଳ, ଅଧ୍ୟାପିକା ସ୍ମରଣିକା ପାଢ଼ୀ, ସାମାଜିକ କର୍ମୀ ଶୁଳପାଣି ଶତପଥି, ବ୍ରହ୍ମକୁମାର ବୈକୁଣ୍ଠ ଭାଇ, ଅଧ୍ୟାପକ ଆର୍. ହରିଶ, ଏନ୍ସିସି ଆର୍ମି ୱିଙ୍ଗର ସିଟିଓ ଅର୍ପଣ ପ୍ରଧାନ, ନାଭାଲ ୱିଙ୍ଗର ସିଟିଓ ବିଦେଶୀ ରାଉତ, ଜାତୀୟ ସେବା ଯୋଜନା କୋ-ୟୁନିଟ ଅଧିକାରୀ ବି. ପ୍ରଧାନ, ମହିଳା ଶାଖା ଯୋଜନା ଅଧିକାରୀ ସସ୍ମିତା କୁମାରୀ ଦାସ ଓ ଯୁବ ରେଡକ୍ରସ ଅଧିକାରୀ ଡ. ସୀମାଞ୍ଚଳ ବେହେରା ପ୍ରମୁଖ ଯୋଗଦେଇ ନିଶାର କୁପ୍ରଭାବ ଏବଂ ଏଥିରୁ ଦୂରେଇ ରହିବାର ଉପାୟ ସମ୍ପର୍କରେ ନିଜ ନିଜର ବକ୍ତବ୍ୟ ରଖିଥିଲେ।
ପ୍ରଜାପିତା ବ୍ରହ୍ମାକୁମାରୀ ଈଶ୍ୱରୀୟ ବିଶ୍ୱବିଦ୍ୟାଳୟ, ଭଞ୍ଜନଗର ଶାଖା, ଜାତୀୟ ସେବା ଯୋଜନା, ଏନ୍ସିସି ଏବଂ ଯୁବ ରେଡକ୍ରସ ପକ୍ଷରୁ ମିଳିତ ଭାବେ ଏହି ସଚେତନତା କାର୍ଯ୍ୟକ୍ରମ ଆୟୋଜିତ ହୋଇଥିଲା। ଏହି ଅବସରରେ ଅଧ୍ୟାପିକା ସୋନିଆ ବିଷୋୟୀ, ବାଣିଜ୍ୟ ବିଭାଗର ମୁଖ୍ୟ ଅଧ୍ୟାପକ ଦୁର୍ଗା ପ୍ରସାଦ ସାହୁ, ଆଇ କ୍ୟୁଏସି ସଂଯୋଜକ ଡ ଦେବାଶିଷ ସ୍ୱାଇଁ ପ୍ରମୁଖ ଉପସ୍ଥିତ ଥିଲେ।