ରଗଡି,୯ା୪(ଡି.ଏନ.ଏ.): କଟକ ବନଖଣ୍ଡ ଯାଜପୁର ରୋଡ୍ ରେଞ୍ଜ ପଛିକୋଟ ଡିପିଏଫ ଅଧୀନ ରଗଡ଼ି ବିଟ୍ ନିକଟରେ ସଂରକ୍ଷିତ ଗୋଚର ଜମି(ଖାତା ନଂ. ୩୯୩ ପ୍ଲଟ ସଂଖ୍ୟା ୧୭୬୬)ରେ ଏକ ଫରେଷ୍ଟ କ୍ବାର୍ଟର୍ସ ନିର୍ମାଣ କରାଯାଉଛି। ଏହି ବେଆଇନ କାର୍ଯ୍ୟକୁ ନେଇ ସ୍ଥାନୀୟ ଅଞ୍ଚଳବାସୀ ତୀବ୍ର ଅସନ୍ତୋଷ ପ୍ରକାଶ କରିଛନ୍ତି। ସ୍ଥାନୀୟ ଲୋକଙ୍କ ଅଭିଯୋଗ ଅନୁଯାୟୀ ପଛିକୋଟ ଡିପିଏଫ୍ ଅଧୀନରେ ୭୫୦ ହେକ୍ଟରରୁ ଊର୍ଦ୍ଧ୍ୱ ଜଙ୍ଗଲ ଜମି ରହିଥିବା ବେଳେ ସେଥିରୁ ପ୍ରାୟ ୩୦% ଜମିକୁ କିଛି ଗୋଷ୍ଠୀ ଜବରଦଖଲ କରି ନେଲେଣି। ତାହାକୁ ଉଚ୍ଛେଦ କରିବାକୁ ବନବିଭାଗ ସାହସ ଜୁଟାଇ ପାରୁନାହିଁ। ଏଭଳିସ୍ଥଳେ ରଗଡି ଛକ ନିକଟରେ ଥିବା ବିଟ୍ ହାଉସ୍ଟି ସମ୍ପୂର୍ଣ୍ଣ ଗୋଚର ଜମିରେ ଅସ୍ଥାୟୀ ଭାବେ ଚାଲିଆସୁଛି। ତାହାକୁ ବନବିଭାଗ ନିଜ ହାତକୁ ନେବା ପାଇଁ ଆବଶ୍ୟକ ପଦକ୍ଷେପ ଗ୍ରହଣ କରିନାହିଁ। କିନ୍ତୁ ଏବେ ସେହି ଗୋଚର ଜମିରେ କିପରି ଜଣେ ଠିକାଦାର ବ୍ୟାସନଗର ତହସିଲ ଅଫିସ୍ ଅଗୋଚରରେ ଫରେଷ୍ଟ କ୍ବାର୍ଟର୍ସ ନିର୍ମାଣ କରୁଛନ୍ତି ତାହା ପ୍ରଶ୍ନବାଚୀ ସୃଷ୍ଟି କରିଛି। ଜଙ୍ଗଲ ଜମି ଛାଡି ସଂରକ୍ଷିତ ଗୋଚର ଜମିରେ ବନବିଭାଗ ଜବରଦସ୍ତ କିଭଳି ଏହି ଅଟ୍ଟାଳିକା ନିର୍ମାଣ କରୁଛି ତାହାକୁ ନେଇ ଖୁବ୍ଶୀଘ୍ର ଜିଲାପାଳଙ୍କ ଦୃଷ୍ଟି ଆକର୍ଷଣ କରାଯିବ ବୋଲି ରଗଡ଼ି ଅଞ୍ଚଳର କେତେଜଣ ସଚେତନ ନାଗରିକ କହିଛନ୍ତି। ବ୍ୟାସନଗର ଅତିରିକ୍ତ ତହସିଲଦାର ବିକ୍ରମ କୁମାର ମଲ୍ଲିକଙ୍କୁ ପଚାରିବାରୁ ଏନେଇ କୌଣସି ଖବର ନ ଥିବା କହିଛନ୍ତି। ଅନ୍ୟପକ୍ଷରେ ଯାଜପୁର ରୋଡ୍ ବନାଞ୍ଚଳ ଅଧିକାରୀ ଜ୍ୟୋତିରଞ୍ଜନ ମହାପାତ୍ରଙ୍କୁ ପଚାରିବାରୁ ପୂର୍ବରୁ ଅନୁମତି ମିଳିଥିଲା। ଏବେ ସେମିତି କିଛି ଅନୁମତି ନାହିଁ ବୋଲି ସେ ସ୍ବୀକାର କରିଛନ୍ତି। ତେବେ ରାଜସ୍ବ ବିଭାଗ ଏଥିପ୍ରତି ଦୃଷ୍ଟି ଦେବାକୁ ସ୍ଥାନୀୟବାସୀ ଦାବି କରିଛନ୍ତି।
