ଭୁବନେଶ୍ୱର, ୧୦।୧୧(ବ୍ୟୁରୋ): କେନ୍ଦ୍ରର କୃଷି ଆଇନକୁ ପଞ୍ଜାବ ଏବଂ ହରିୟାଣାରେ ଜୋରଦାର ବିରୋଧରେ ପରେ ଓଡିଶାରେ ମଧ୍ୟ କଂଗ୍ରେସ ସମାନ ପନ୍ଥା ଆପଣାଇଛି। ଏହାକୁ ବିରୋଧ କରି ପ୍ରଦେଶ କଂଗ୍ରେସ କମିଟି ପକ୍ଷରୁ କ୍ଷେତ ବଞ୍ଚାଓ ଯାତ୍ରା କରାଯାଇଛି। ଏହାକୁ ନେଇ ସୋମବାର ଭୁବନେଶ୍ୱରରୁ ଦଳର ନେତା ଓ କର୍ମୀମାନେ ଏକ ଟ୍ରାକ୍ଟର ରାଲି କରିଛନ୍ତି। ଏକାଧିକ ଟ୍ରାକ୍ଟର ଯୋଗେ କଂଗ୍ରେସ ଭବନରୁ ନେତା ଓ କର୍ମୀମାନେ ବାହାରି କଟକ କଂଗ୍ରେସ ଅଫିସରେ ପହଞ୍ଚିଥିଲେ। ଏଥିରେ ଓଡିଶା ପ୍ରଭାରୀ ଏ ଚେଲ୍ଲା କୁମାର, ପିସିସି ସଭାପତି ନିରଞ୍ଜନ ପଟ୍ଟନାୟକଙ୍କ ସହ ଅନ୍ୟ ନେତାମାନେ ଉପସ୍ଥିତ ଥିଲେ। କେନ୍ଦ୍ର ସରକାର ଦେଶର କୃଷି, କୃଷକ ଓ ଶ୍ରମିକମାନଙ୍କ ସ୍ବାର୍ଥକୁ ସମ୍ପୂର୍ଣ୍ଣ ଅଣଦେଖା ସହ ୩ ବିଧେୟକ ପାର୍ଲାମେଣ୍ଟରେ ଗୃହୀତ କରି ଆଇନ୍ରେ ପରିଣତ କରିଛନ୍ତି। ଏହି ଅବସରରେ ପିସିସି ସଭାପତି ଉଭୟ କେନ୍ଦ୍ର ଓ ରାଜ୍ୟ ସରକାରଙ୍କ ଚାଷୀମାରଣ ନୀତି ବିରୋଧରେ କହିଥିଲେ, ଯଦି ଚାଷୀଙ୍କ ପ୍ରତି ସରକାରଙ୍କ ଆନ୍ତରିକତା ଅଛି, ତେବେ ଛତିଶଗଡ ସରକାରଙ୍କ ଭଳି ଧାନର ସର୍ବନିମ୍ନ ସହାୟକ ମୂଲ୍ୟ ଓଡିଶାରେ ୨୫୦୦ ଟଙ୍କା କରାଯାଉ। ୨୫୦୦ ଟଙ୍କା ତଳକୁ ଯିଏ କିଣିବ ବା ବିକ୍ରି କରିବ, ସେମାନଙ୍କ ପ୍ରତି ଜେଲ୍ ସହିତ ଅର୍ଥ ଦଣ୍ଡାଦେଶର ନିୟମ ପାର୍ଲାମେଣ୍ଟରେ ଗୃହୀତ ହୋଇଥିବା କୃଷି ବିଧେୟକରେ ଆଣାଯିବ କି ବୋଲି ସେ ପ୍ରଶ୍ନ କରିଛନ୍ତି। ରାଜ୍ୟବାସୀ ଜାଣିସାରିଲେଣି, ବିଜେଡି ଓ ଭାଜପା ଏବେ ମିଶି ଏକ। ସେମିତି ହୋଇ ନ ଥିଲେ କେନ୍ଦ୍ର ସରକାରଙ୍କ ଯେ କୌଣସି ପ୍ରସ୍ତାବକୁ ବିଜେଡି ସମର୍ଥନ କରନ୍ତା ନାହିଁ ବୋଲି ନିରଞ୍ଜନ କହିଛନ୍ତି। କଟକ କଂଗ୍ରେସ କାର୍ଯ୍ୟାଳୟରେ ରାଲି ପହଞ୍ଚିବା ପରେ ନୂତନ କାର୍ଯ୍ୟାଳୟକୁ ଚେଲାକୁମାର ଉଦ୍ଘାଟନ କରିଥିଲେ।
