ଭୁବନେଶ୍ୱର,୧୮ା୬(ବ୍ୟୁରୋ): କଂଗ୍ରେସ ନେତା ରାହୁଲ ଗାନ୍ଧୀଙ୍କୁ ଇଡି(ପ୍ରବର୍ତ୍ତନ ନିର୍ଦ୍ଦେଶାଳୟ) ପକ୍ଷରୁ କରାଯାଉଥିବା ଜେରାକୁ ନେଇ ଦେଶବ୍ୟାପୀ ବିରୋଧର ସ୍ବର ତେଜିବାରେ ଲାଗିଛି। ସମାନଭାବେ ଓଡ଼ିଶାରେ ମଧ୍ୟ ପ୍ରଦେଶ କଂଗ୍ରେସ କମିଟି(ପିସିସି) ପକ୍ଷରୁ କେନ୍ଦ୍ର ସରକାରଙ୍କ ଏଭଳି କାର୍ଯ୍ୟକଳାପକୁ ଜୋର୍ଦାର ବିରୋଧକରି ପ୍ରତିବାଦ ସଭା ଓ ଧାରଣା ଜାରି ରହିଛି। ଗୁରୁବାର ଦଳ ତରଫରୁ ରାଜଭବନ ସମ୍ମୁଖରେ ପ୍ରତିବାଦ ସଭାର ଆୟୋଜନ କରାଯାଇଥିବା ବେଳେ ଶୁକ୍ରବାର ରାଜ୍ୟବ୍ୟାପୀ ବିରୋଧ ଏବଂ ଆନ୍ଦୋଳନ କରାଯାଇଛି। ବିଭିନ୍ନ ଜିଲାରେ କଂଗ୍ରେସ କର୍ମୀମାନେ ଏକତ୍ରିତ ହୋଇ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ବ୍ୟାନର ଜାଳିଥିବା ବେଳେ କେନ୍ଦ୍ର ବିରୋଧୀ ନାରା ଦେଇଥିଲେ। ସେହିପରି ଆସନ୍ତା ୨୦ ଏବଂ ୨୧ ତାରିଖରେ ଦଳ ପକ୍ଷରୁ ରାଜ୍ୟର ସମସ୍ତ ନଗର ଏବଂ ବ୍ଲକ କଂଗ୍ରେସ କମିଟି ତରଫରୁ ବିକ୍ଷୋଭ କରିବା ପାଇଁ ପିସିସି ସଭାପତି ଶରତ ପଟ୍ଟନାୟକ ଆହ୍ବାନ ଦେଇଛନ୍ତି।
କଂଗ୍ରେସ ରାଜ୍ୟବ୍ୟାପୀ କରିଥିବା ଆନ୍ଦୋଳନ ଭିତରେ ଭୁବନେଶ୍ୱର ଜିଲା କଂଗ୍ରେସ କମିଟି ମଧ୍ୟ ପ୍ରତିବାଦ ସଭା କରିଛି। ଏଥିରେ ପିସିସି ସଭାପତିଙ୍କ ସମେତ ଦଳର ବହୁ ବରିଷ୍ଠ ନେତା ଯୋଗଦେଇ ଅଭିଯୋଗ କରିଥିଲେ, ଏନ୍ଡିଏ ନେତୃତ୍ୱାଧୀନ ଭାଜପା ସରକାର କଂଗ୍ରେସ ନେତୃବର୍ଗଙ୍କ ପ୍ରତି ଯେଉଁ ପ୍ରତିଶୋଧ ଓ ଆକ୍ରୋଶମୂଳକ କାର୍ଯ୍ୟକଳାପ ଚଳାଇଛି ତା’ର ଉଚିତ ଜବାବ ଦିଆଯିବ। କେନ୍ଦ୍ର ସରକାର କେନ୍ଦ୍ରୀୟ ତଦନ୍ତକାରୀ ସଂସ୍ଥାକୁ ବ୍ୟବହାରକରି କଂଗ୍ରେସ ଶୀର୍ଷ ନେତୃବର୍ଗଙ୍କୁ ନିନ୍ଦିତ ଓ ଦୁର୍ନୀତିଗ୍ରସ୍ତ ବୋଲି ପ୍ରମାଣ କରିବାର ଯେଉଁ ମିଛ ନାଟକ ଚଳାଇଛନ୍ତି ସେକଥା ଲୋକମାନେ ବୁଝିସାରିଲେଣି। ଇଡି ମାଧ୍ୟମରେ ନ୍ୟାଶନାଲ ହେରାଲ୍ଡ ମନି ଲଣ୍ଡରିଂ କଥାର ଯେଉଁ ମିଛ ନାଟକ ରଚାଯାଇଛି ସେହି ଘଟଣାର ପର୍ଦ୍ଦାଫାଶ ଖୁବ୍ଶୀଘ୍ର କରାଯିବ ବୋଲି ଦଳ ଯୁକ୍ତି ରଖିଛି।
ଭୁବନେଶ୍ୱର ଜିଲା କଂଗ୍ରେସ ପକ୍ଷରୁ ପିଏମ୍ଜି ଛକ ସ୍ଥିତ ମୁଖ୍ୟ ପ୍ରବନ୍ଧକ ଡାକଘର କାର୍ଯ୍ୟାଳୟ ସମ୍ମୁଖରେ ବିଶ୍ୱଜିତ୍ ଦାସଙ୍କ ସଭାପତିତ୍ୱରେ ଏକ ପ୍ରତିବାଦ ସଭା କରାଯାଇଛି। ଏହି ଅବସରରେ ଶରତ ପଟ୍ଟନାୟକ କହିଥିଲେ, ଆସନ୍ତା ଦିନରେ ମୋଦି ସରକାରଙ୍କ ଏହି ଆକ୍ରୋଶମୂଳକ ରାଜନୀତି ବିରୋଧରେ ଉଚିତ ଜବାବ ଦିଆଯିବ। କଂଗ୍ରେସ ନେତୃବର୍ଗଙ୍କ ଉପରେ ଦିଲ୍ଲୀ ପୋଲିସର ବର୍ବରୋଚିତ ଆକ୍ରମଣ ଏବଂ ଇଡି ମାଧ୍ୟମରେ ରାହୁଲ ଓ ସୋନିଆ ଗାନ୍ଧୀଙ୍କ ଛବିକୁ ମଳିନ କରିବା ଲାଗି ଯେଉଁ ହୀନ ଉଦ୍ୟମ ଚାଲିଛି ତାକୁ ସଫଳ ହେବାକୁ ଦେବୁ ନାହିଁ। ସାରା ରାଜ୍ୟରେ କଂଗ୍ରେସ ବର୍ତ୍ତମାନ ଏକତ୍ରିତ ହୋଇଛି। ମୋଦି ସରକାରଙ୍କ ଜନବିରୋଧୀ କାର୍ଯ୍ୟକଳାପ ବିରୋଧରେ ଲଢ଼େଇ କରିବା ଲାଗି ଦଳ ସମ୍ପୂର୍ଣ୍ଣ ପ୍ରସ୍ତୁତ ବୋଲି ସେ କହିଛନ୍ତି। ଶିବାନନ୍ଦ ରାୟ କହିଥିଲେ, ସମୁଦାୟ ଘଟଣାରେ ରାଜନୈତିକ ଚାଲ ଖେଳିବା ପାଇଁ କେନ୍ଦ୍ରୀୟ ତଦନ୍ତକାରୀ ସଂସ୍ଥାକୁ ବ୍ୟବହାର କରାଯାଉଛି। ବିଧାୟକ ସୁରେଶ ରାଉତରାୟ କହିଥିଲେ, ବର୍ତ୍ତମାନ ସାରା ରାଜ୍ୟରେ କଂଗ୍ରେସ ଲୋକ ଜାଗିଲେଣି। କେନ୍ଦ୍ର ସରକାରଙ୍କ ଏଭଳି କାର୍ଯ୍ୟରେ ସାଧାରଣ ଲୋକ ଅତିଷ୍ଠ ହୋଇଗଲେଣି। ଛାତ୍ର କଂଗ୍ରେସ ସଭାପତି ୟାସିର ନୱାଜ କହିଥିଲେ, ଛାତ୍ର ଓ ଯୁବ ସମାଜ ମୋଦିଙ୍କ ଷଡ଼ଯନ୍ତ୍ରର ଉପଯୁକ୍ତ ଜବାବ ଦେବା ପାଇଁ ପ୍ରସ୍ତୁତ।
