ନୂଆଦିଲ୍ଲୀ,୧୨ ।୧୨: କଂଗ୍ରେସର ‘ଭାରତ ଯୋଡୋ ଯାତ୍ରା’ ସୋମବାର ମହିଳା ଶକ୍ତି ନାମରେ ପରିଚତ ହେବ । ସୋମବାର ଏହି ଯାତ୍ରାରେ ରାହୁଲ ଗାନ୍ଧୀଙ୍କ ସହ କେବଳ ମହିଳାମାନେ ଚାଲିବେ । ଏହାକୁ ‘ନାରୀ ଶକ୍ତି ପଦଯାତ୍ରା’ ନାମ ଦିଆଯାଇଛି । କଂଗ୍ରେସ ମହାସଚିବ ପ୍ରିୟଙ୍କା ଗାନ୍ଧୀ ଓ ତାଙ୍କ ଝିଅ ମିରାୟା ବି ଏହି ଯାତ୍ରାରେ ସାମିଲ ହେବେ । ଉଭୟ ରବିବାର ଅର୍ଥାତ୍ ୧୧ ଡିସେମ୍ବର ସନ୍ଧ୍ୟାରୁ ଏହି ଯାତ୍ରାରେ ସାମିଲ ହୋଇଛନ୍ତି । ଏଥିରେ କେବଳ ମହିଳାମାନେ ସାମିଲ ହେବେ ।
ସୂଚନାଯୋଗ୍ୟ, ଭାରତ ଯୋଡୋ ଯାତ୍ରା ଏବେ ରାଜସ୍ଥାନରେ ଚାଲିଛି । ସୋମବାର ବୁନ୍ଦିର ତେଜାଜି ମନ୍ଦିରରୁ ଯାତ୍ରାର ଆରମ୍ଭ କରାଯାଇଛି । ଯାତ୍ରାରେ ମହିଳାଙ୍କ ଭିଡ ଦେଖିବାକୁ ମିଳିଛି । ଏହି ଯାତ୍ରା ମାଧ୍ୟମରେ ରାହୁଲ ଗାନ୍ଧୀ ଲଗାତାର ଭାବେ ଲୋକଙ୍କ ସହ ଯୋଡି ହେଉଛନ୍ତି ଓ ସେମାନଙ୍କ ସମସ୍ୟାକୁ ଦେଶ ସାମ୍ନାରେ ରଖୁଛନ୍ତି । ଏଥର ବି ସେ ଜଣେ ଛାତ୍ର ଅମିତ ଦୁବେଙ୍କ ସହ ରାହୁଲ ସାକ୍ଷାତ୍ କରିଛନ୍ତି । ଅମିତ କହିଛନ୍ତି ସେ ଆର୍ମି ପାଇଁ ୨ ବର୍ଷ ପ୍ରସ୍ତୁତ ହେଲେ । ଫିଜିକାଲ ଓ ମେଡିକାଲ ଟେଷ୍ଟରେ ପାସ ବି ହେଲେ । ହେଲେ ନିଯୁକ୍ତି ରଦ୍ଦ କାରଣରୁ ପେପର ରଦ୍ଦ ହୋଇଗଲା ।
ତେବେ ସୋମବାର ‘ନାରୀ ଶକ୍ତି ପଦଯାତ୍ରା’କୁ ସଫଳ କରିବାକୁ ବହୁ ସଂଖ୍ୟାରେ ମହିଳା ଏଥିରେ ଯୋଗ ଦେବାକୁ କଂଗ୍ରେସ ଚେଷ୍ଟା କରିଛି ।
