ଭଞ୍ଜନଗର,୨୫।୪(ବାବୁଲା ପ୍ରଧାନ)- ପୁରୀ ଶ୍ରୀଜଗନ୍ନାଥ ମହାପ୍ରଭୁଙ୍କ ମନ୍ଦିରର ରତ୍ନଭଣ୍ଡାର ରୁ ତିନୋଟି ରତ୍ନ ଅଳଙ୍କାର ନିଖୋଜ ବା ଚୋରି ହୋଇଥିବା ନେଇ କଂଗ୍ରେସ ପକ୍ଷରୁ ଅଭିଯୋଗ ହୋଇଛି। ଏନେଇ ଗଞ୍ଜାମ ଜିଲା କଂଗ୍ରେସ ପଶ୍ଚିମ ସାଙ୍ଗଠନିକ ଜିଲା ପକ୍ଷରୁ ଶନିବାର ଭଞ୍ଜନଗର ଥାନାରେ ଏତଲା ଦିଆଯାଇଛି। ଜିଲା କଂଗ୍ରେସ ସଭାପତି ବି ଦଣ୍ଡପାଣି ପାତ୍ରଙ୍କ ନେତୃତ୍ୱରେ ଏହି ଏତଲା ଦିଆଯାଇଥିଲା। ଏତଲାରେ ଦର୍ଶାଯାଇଛି ଯେ ଶ୍ରୀମନ୍ଦିର ଆମ ଓଡ଼ିଆଙ୍କର ପରିଚୟ ଓ ପ୍ରାଣକେନ୍ଦ୍ର ତଥା ମହାପ୍ରଭୁ ଶ୍ରୀଜଗନ୍ନାଥ ଆମର ଆରାଧ୍ୟ ଦେବତା ହୋଇଥିବାରୁ ଏଇ ଚୋରି କଥା ଶୁଣି କୋଟିକୋଟି ଓଡ଼ିଆ ତଥା ଜଗନ୍ନାଥ ପ୍ରେମୀଙ୍କର ଧାର୍ମିକ ଭାବନାକୁ ଗଭୀର ଆଘାତ ଲାଗିଛି ।
ଅନ୍ୟ ପକ୍ଷରେ ବହୁ-ପ୍ରତୀକ୍ଷିତ ଗଣତିମଣତିରୁ ଉପରୋକ୍ତ ଜାତୀୟ ଅପରାଧ ଧରାପଡ଼ିଥିବା ବେଳେ ଏହାର ତଦନ୍ତ ନ କରି ଏହାକୁ ଘଣ୍ଟ ଘୋଡ଼ାଇବାକୁ ଯାଇ ଶ୍ରୀମନ୍ଦିର କର୍ତ୍ତୃପକ୍ଷ ମିଛର ଆଶ୍ରୟ ନେଇଥିବା ସ୍ପଷ୍ଟ ହୋଇଛି। ଜଣେ ନ୍ୟାୟମୂର୍ତିଙ୍କ ତତ୍ତ୍ୱାବଧାନରେ ଗଣତିମଣଡି ହେଉଥିବା ବେଳେ ଓ ସେ ନିଜେ ତିନୋଟି ବହୁମୂଲ୍ୟ ରତ୍ନ ଅଳଙ୍କାର ହଜିଛି ବୋଲି କହିଥିବା ବେଳେ ଶ୍ରୀମନ୍ଦିର ପ୍ରଶାସନ ପକ୍ଷରୁ ଉଭୟ ହାଇକୋର୍ଟ ଓ ସୁପ୍ରିମକୋର୍ଟରେ ସତ୍ୟପାଠ ଦାଖଲ କରି ରତ୍ନଭଣ୍ଡାର ସୁରକ୍ଷିତ ଅଛି ବୋଲି କହିବା କେତେ ଦୂର ଯୁକ୍ତିଯୁକ୍ତ ? ଏହି ଚୋରୀ ପାଇଁ ମନ୍ଦିର ପ୍ରଶାସନ ଦାୟୀ ନ ହେବ କାହିଁକି ବୋଲି ପ୍ରଶ୍ନ କରାଯାଇଛି । ତେଣୁ ଜିଲା କଂଗ୍ରେସ କମିଟି ପକ୍ଷରୁ ବିନୀତ ପ୍ରାର୍ଥନା କରୁଅଛି ଏହି ଚୋରି ଓ ଧାର୍ମିକ ଭାବନା ଆଘାତର ବିଧିବଦ୍ଧ ତଦନ୍ତ କରାଯାଇ ଦୋଷୀଙ୍କ ବିରୁଦ୍ଧରେ ଭାରତୀୟ ନ୍ୟାୟ ସଂହିତାର ଦଫା ୨୯୯, ୩୦୩, ୩୫୧ ଓ ୩ (୫) ଧାରା ମତେ ମାମଲା କରି ଅଭିଯୁକ୍ତ ମାନଙ୍କୁ ଗିରଫ କରିବା ପାଇଁ ଦା ବି କରାଯାଇଛି ।