ବ୍ରହ୍ମପୁର ଅଫିସ,୮ା୩: ବ୍ରହ୍ମପୁର ମହାନଗର ନିଗମ(ବିଏମ୍ସି) କଂଗ୍ରେସର ମେୟର ପ୍ରାର୍ଥୀ ହୋଇଛନ୍ତି ମଞ୍ଜୁ ରଥ। ପୌର ନିର୍ବାଚନ ପାଇଁ ନାମାଙ୍କନର ଶେଷ ଦିନ ସୋମବାର ପ୍ରଦେଶ କଂଗ୍ରେସ କମିଟି (ପିସିସି) ପକ୍ଷରୁ ତାଙ୍କ ନାମ ଘୋଷଣା ହୋଇଛି। ସେ ନିର୍ବାଚନ ଅଧିକାରୀ ଉପଜିଲାପାଳଙ୍କ ଦପ୍ତରରେ ପ୍ରାର୍ଥିପତ୍ର ଦାଖଲ କରିଛନ୍ତି। ଗତ ତ୍ରିସ୍ତରୀୟ ପଞ୍ଚାୟତ ନିର୍ବାଚନରେ ଗଞ୍ଜାମ ଜିଲାରେ କଂଗ୍ରେସ ଶୋଚନୀୟ ପରାଜୟ ଯୋଗୁ ପ୍ରାର୍ଥୀ ଚୟନରେ ସମସ୍ୟା ଦେଖା ଦେଇଥିବା ବେଳେ ବ୍ରହ୍ମପୁର ମେୟର ପ୍ରାର୍ଥୀ ଖୋଜା ଚାଲିଥିଲା। ଭାଜପାରୁ ଇସ୍ତଫା ଦେଇଥିବା ଜଣେ ନାରୀ ନେତ୍ରୀଙ୍କ ସମେତ ମଞ୍ଜୁ ପ୍ରାର୍ଥୀ ହେବାକୁ ଆଗ୍ରହୀ ଥିଲେ। ହେଲେ ପିସିସି ପକ୍ଷରୁ ରଥଙ୍କୁ ଟିକେଟ ଦିଆଯାଇଛି।
ନାମାଙ୍କନ ଦାଖଲ ପରେ ମଞ୍ଜୁ କହିଛନ୍ତି, ସେ ଦୀର୍ଘଦିନରୁ ସମାଜସେବାରେ ବ୍ରତୀ ରହିଛନ୍ତି। କଂଗ୍ରେସ ତାଙ୍କୁ ମେୟର ପ୍ରାର୍ଥୀ କରିଥିବାରୁ ସେ ଉତ୍ସାହିତ। ମହାନଗରବାସୀଙ୍କ ଆଶୀର୍ବାଦରେ ଯଦି ନିର୍ବାଚିତ ହୁଅନ୍ତି ତେବେ ନଗରୀବାସୀଙ୍କୁ ମୌଳିକ ସୁବିଧା ଯୋଗାଇବାକୁ ପ୍ରାଥମିକତା ଦେବେ। ଏପରିକି ପାନୀୟ ଜଳ ଯୋଗାଣର ସ୍ଥାୟୀ ସମାଧାନ ଲାଗି ପ୍ରୟାସ କରିବେ। ବିପର୍ଯ୍ୟସ୍ତ ରାସ୍ତାଘାଟ ଓ ଡ୍ରେନ୍ ସମସ୍ୟା ଦୂର କରିବାକୁ ସେ କହିଛନ୍ତି।
ଅପରପକ୍ଷରେ ମହାନଗରରେ ୪୨ ୱାର୍ଡ ମଧ୍ୟରୁ ନାମାଙ୍କନର ଅନ୍ତିମ ଦିବସରେ କଂଗ୍ରେସରୁ କର୍ପୋରେଟର ପାଇଁ ୨୮ ଜଣ ପ୍ରାର୍ଥିପତ୍ର ଦାଖଲ କରିଥିବା ଜିଲା କମିଟି ଉପସଭାପତି ମହେଶ୍ୱର ପାତ୍ର କହିଛନ୍ତି। ଅବଶିଷ୍ଟ ୧୪ ୱାର୍ଡ ନିମନ୍ତେ କଂଗ୍ରେସକୁ ପ୍ରାର୍ଥୀ ମିଳି ନ ଥିବା ସେ ସୂଚନା ଦେଇଛନ୍ତି।
