ପୁରୀ ଅଫିସ, ୩ା୮: ଶ୍ରୀଜଗନ୍ନାଥଙ୍କ ଉପାସନା, ରୀତିନୀତି ଓ ଯାନିଯାତ୍ରା ଭାରତରେ ସ୍ବତନ୍ତ୍ର। ଶାସ୍ତ୍ରୀୟ ସିଦ୍ଧାନ୍ତ ଉପରେ ବିକଶିତ ମହାପ୍ରଭୁଙ୍କ ଉପାସନାରେ ପରମ୍ପରା ଜଡ଼ିତ ହୋଇଛି। ସାମାଜିକ ପରମ୍ପରା ସହିତ ମାନବିକ ମୂଲ୍ୟବୋଧ ଏହାର ଆଧାର ସ୍ତମ୍ଭ। କିନ୍ତୁ ଅନେକ ସମୟରେ ବାସ୍ତବ ରହସ୍ୟ ନ ଜାଣି ଭ୍ରମଯୁକ୍ତ ତଥ୍ୟ ସମ୍ବଳିତ ଲେଖା ବିଭିନ୍ନ ଭାଷାରେ ପ୍ରକାଶିତ ହେଉଛି। ଭୁଲ୍କୁ ଭୁଲ୍ ବୋଲି କହିବା ପାଇଁ ଆମର ସେପରି ବିଧି ସମ୍ମତ ବ୍ୟବସ୍ଥା କାହାରି ପକ୍ଷରୁ ବି କରାଯାଇନାହିଁ। ଶ୍ରୀମନ୍ଦିର ପ୍ରଶାସନର ଏ ଦିଗରେ ଭୂମିକା ରହିବା କଥା। ଭୁଲ୍ ବୋଲି ନ ଦେଖାଇଲେ ସେହି ଭୁଲ୍ ତଥ୍ୟକୁ ଲୋକେ ଗ୍ରହଣ କରିଯିବେ। ସେହିଭଳି ଶ୍ରୀପୁରୀ ଧାମ ଶୀର୍ଷକ ଏକ ଲେଖା କଲ୍ୟାଣୀ ପତ୍ରିକାର ୨୦୨୨ ମସିହା ଜୁନ୍ ସଂଖ୍ୟାରେ ପ୍ରକାଶ ପାଇଛି। ଏଥିରେ ମୁଖ୍ୟ ଭାବେ ୭ଟି ଭ୍ରମାତ୍ମକ ତଥ୍ୟ ରହିଛି। ବିଦ୍ୟାପତି ନୀଳମାଧବଙ୍କ ମୂର୍ତ୍ତିକୁ ଉଜ୍ଜୟିନୀ ନେଇଯାଇଥିବା ଏବଂ ଶ୍ରୀକ୍ଷେତ୍ରର ପଞ୍ଚତୀର୍ଥ ପ୍ରସଙ୍ଗରେ ଗରୁଡ଼ ଦର୍ଶନ ଓ ଉଗ୍ରସେନ ଦର୍ଶନକୁ ଗ୍ରହଣ କରାଯାଇଥିବା ଦେଖାଯାଏ ବୋଲି ଉଲ୍ଲେଖ ରହିଛି, ଯାହା କଦାପି ଗ୍ରହଣୀୟ ନୁହେଁ ଏବଂ ଅଶାସ୍ତ୍ରୀୟ ବୋଲି ଶ୍ରୀନୀଳାଚଳ ତତ୍ତ୍ୱ ସନ୍ଧାନ ପରିଷଦର ସମ୍ପାଦକ ଡ. ଶ୍ରୀନିବାସ ଆଚାର୍ଯ୍ୟ ମତ ଦେଇଛନ୍ତି। ସେହିପରି ଗବେଷକ ଡ. ନରେଶ ଚନ୍ଦ୍ର ଦାଶ ମଧ୍ୟ ଏହି ଲେଖାରେ ସ୍ଥାନ ପାଇଥିବା ମହାପ୍ରଭୁଙ୍କ ଆବିର୍ଭାବ ପ୍ରସଙ୍ଗ, ଶ୍ରୀଗୁଣ୍ଡିଚା ମନ୍ଦିର ବର୍ଣ୍ଣନା ମିଥ୍ୟା ତଥ୍ୟ ଉପରେ ଉପସ୍ଥାପନ କରାଯାଇଥିବା ମତ ଦେଇଛନ୍ତି। ଏହି ଲେଖାର ଲେଖକ ଆଚାର୍ଯ୍ୟ ଶ୍ରୀଜଗନ୍ନାଥ ପ୍ରସାଦ ଜୀ ଗୁପ୍ତଙ୍କ ଠିକଣା କଲ୍ୟାଣୀ ପତ୍ରିକାରେ ନାହିଁ। କଲ୍ୟାଣୀର ପ୍ରକାଶକ ଗୋରଖପୁରର ଗୀତା ପ୍ରେସ୍। ପୂର୍ବରୁ ଗୀତା ପ୍ରେସ୍ ଦ୍ୱାରା ପ୍ରକାଶିତ ଏହି ପତ୍ରିକାରେ ଅନେକ ମନଗଢ଼ା କଥା ପ୍ରକାଶ ପାଇଥିବାର ନଜିର ଅଛି। ଦେବୀ ବିମଳାଙ୍କ ସମ୍ବନ୍ଧରେ ୨ବର୍ଷ ତଳେ ଭୁଲ୍ ତଥ୍ୟ ପ୍ରକାଶିତ ହୋଇଥିଲା। ଏପରି କି ଶ୍ରୀପୁରୁଷୋତ୍ତମ ଦେବୀଙ୍କ ପାଦପୀଠ ନୁହେଁ, କାଞ୍ଚତ୍ ହେଉଛି ପାଦପୀଠ ବୋଲି ପ୍ରଚାର କରାଯାଇଥିଲା। ଚଳିତ ସଂଖାରେ ଦେବୀ ବିମଳା ଓ ମହାପ୍ରସାଦକୁ ନେଇ ମଧ୍ୟ କାଳ୍ପନିକ ବର୍ଣ୍ଣନା କରାଯାଇଛି ବୋଲି ଐତିହ୍ୟ ବିଶାରଦ ଡ. ସୁରେନ୍ଦ୍ର କୁମାର ମିଶ୍ର ମତବ୍ୟକ୍ତ କରି ଅସନ୍ତୋଷ ପ୍ରକାଶ କରିଛନ୍ତି। ଏଭଳି ଭ୍ରମାତ୍ମକ ଲେଖାର ପ୍ରତିବାଦ ନ ହେଲେ ବିକୃତ ଇତିହାସ ସୃଷ୍ଟି ହେବ ବୋଲି ଡ. ମିଶ୍ର କହିଛନ୍ତି। ଅନ୍ୟପକ୍ଷରେ ଏ ନେଇ ସମ୍ପୃକ୍ତ ପ୍ରକାଶନ ସଂସ୍ଥା ପକ୍ଷରୁ କୌଣସି ପ୍ରତିକ୍ରିୟା ମିଳିପାରିନାହିଁ।
