ତରଭା, ୨୨ା୧(ଡି.ଏନ.ଏ.): ବିଦ୍ୟୁତ୍ ବ୍ୟବହାର କରି ନ ଥିବା ଚାଷୀଙ୍କ ନାମରେ ଆସୁଛି ବିଲ୍। ସେହିପରି ଦେୟ ବାକି ଥିବା କାରଣରୁ ବିଦ୍ୟୁତ୍ ସଂଯୋଗ ଛିନ୍ନ କରି ଦିଆଯାଉଛି। ଏହାର ପ୍ରତିବାଦ କରି ଟାଟା ପାଓ୍ବାର କମ୍ପାନୀ ବିରୋଧରେ ବରିଷ୍ଠ ନେତା ବଳଦେବ ବେଦବାକଙ୍କ ନେତୃତ୍ୱରେ ରବିବାର ସୁବର୍ଣ୍ଣପୁର ଜିଲା ତରଭା ଥାନା ଆଗରେ ଧାରଣା ଦିଆଯାଇଥିଲା। ଏଥିରେ ଖାରୀ ସେକ୍ସନ ଅନ୍ତର୍ଗତ ବଲାଡି, ଡୁଙ୍ଗୁରିପାଲି, କୁଟାସିରା ଆଦି ଗ୍ରାମର ଉପଭୋକ୍ତା ଥାନାରେ ୧୮ଟି ଏତଲା ଦେଇଥିଲେ। ବଲାଡି ଗଣ୍ଡାପଡାର ଉପଭୋକ୍ତାମାନଙ୍କ ବିଜୁଳିକୁ ଆକ୍ରୋଶମୂଳକ ଭାବେ କାଟି ଦେଇଥିବାରୁ ସେମାନେ ମଧ୍ୟ ଏତଲା ଦେଇଛନ୍ତି। କୌଣସି ଜାଗାରେ କମ୍ପାନୀ ତରଫରୁ ମିଟର ଲଗା ଯାଇ ନ ଥିବା ବେଳେ ହଠାତ ୪୫୦୦୦, ୬୦୦୦୦ ଟଙ୍କା ଲେଖାଏର ଏରିଅର ଥିବା କୁହାଯାଉଛି। ପୁଣି ଏହି ଅର୍ଥ ଆଦାୟ ପାଇଁ ଜୋର ଦିଆଯାଉଛି। ଅନ୍ୟଥା ଖୁଣ୍ଟରୁ ସଂଯୋଗ ବିଚ୍ଛିନ୍ନ କରି ଦିଆଯାଉଛି। ବଲାଡି ଗ୍ରାମର କ୍ଷୀରୋଦ୍ର ସେଠ, ଈଶ୍ୱର ସାହୁ, ପଞ୍ଚା ବରିହା ଓ ବେଦ ଖଣ୍ଡଗିରି ଲିଫ୍ଟ ଇରିଗେସନ ବିଭାଗରୁ ଗଭୀର ନଳକୂପ ଖୋଳିଥିଲେ। କିନ୍ତୁ ସେମାନଙ୍କ କୂଅରୁ ପାଣି ବାହାରୁ ନ ଥିଲା। ଟାଟା ପାୱାର୍ ତରଫରୁ ମିଥ୍ୟା କନେକ୍ସନ ଦର୍ଶାଇ ୪୮,୦୦୦ ଟଙ୍କାରୁ ୫୦,୦୦୦ ଟଙ୍କାର ବିଲ ଦିଆଯାଇଛି। ବିଜୁଳି ବିଭାଗର ଅଧିକାରୀମାନଙ୍କୁ କହିଲେ ସିଧା ସଳଖ ଏମ୍ଡି ଜାଣିବେ ଆମେ କିଛି କରିପାରିବୁ ନାହିଁ ବୋଲି କହୁଥିବା ଲୋକେ ପ୍ରକାଶ କରିଛନ୍ତି। ପରେ ଟାଟା ପାୱାର ଏମ୍ଡି ଗଜାନନ ଏସ୍.କାଲେଙ୍କ ନାମରେ ଏତଲା ଦିଆଯାଇଥିଲା।
