ଜଗତ୍ସିଂହପୁର ଅଫିସ,୨୦ା୧୨:ଜଗତ୍ସିଂହପୁର ଜିଲା ପ୍ରଶାସନ ପକ୍ଷରୁ ବିଭିନ୍ନ ବ୍ଲକ ଅଞ୍ଚଳର ଲୋକଙ୍କ ସମସ୍ୟାଗୁଡିକର ସମାଧାନ ନିମନ୍ତେ ପ୍ରତିମାସରେ ଯୁଗ୍ମ ଜନ ଅଭିଯୋଗ ଶୁଣାଣି ଶିବିର କରାଯାଉଛି। ଏହାର ଉଦ୍ଦେଶ୍ୟ ହେଉଛି ଶିବିର ମାଧ୍ୟମରେ ସହଜରେ ଏବଂ କମ୍ ସମୟ ମଧ୍ୟରେ ଲୋକଙ୍କ ଅଭିଯୋଗଗୁଡିକର ଫଇସଲା କରାଯାଇ ସେମାନଙ୍କୁ ଆଶ୍ୱସ୍ତ କରିବା। କିନ୍ତୁ ଶିବିରଗୁଡିକରେ ଅଭିଯୋଗ ଉପରେ ଶୁଣାଣି ହେଉଥିଲେ ସୁଦ୍ଧା ଆଶାଜନକ ଫଇସଲା ହୋଇପାରୁନାହିଁ । ଏହାର ଦୃଷ୍ଟାନ୍ତ ସୋମବାର ଜିଲାପାଳଙ୍କ କାର୍ଯ୍ୟାଳୟ ପରିସର ସଦ୍ଭାବନା ସଭାଗୃହରେ ଜିଲା ପ୍ରାଶାସନ ପକ୍ଷରୁ ଅନୁଷ୍ଠିତ ଯୁଗ୍ମ ଜନ ଅଭିଯୋଗ ଶୁଣାଣି ଶିବିରରେ ଦେଖିବାକୁ ମିଳିଛି । ଏଥିରେ ଜିଲାପାଳ ପାରୁଲ ପଟୁୱାରୀଙ୍କ ସମେତ ଅତିରିକ୍ତ ଜିଲାପାଳ ସଚ୍ଚିଦାନନ୍ଦ ସାହୁ, ଉପଜିଲାପାଳ ଧର୍ମେନ୍ଦ୍ର ମଲ୍ଲିକ, ଉପଖଣ୍ଡ ଆରକ୍ଷୀ ଅଧୀକ୍ଷକ ରମେଶ ଚନ୍ଦ୍ର ସିଂହ, ତହସିଲଦାର ଅଞ୍ଜଳି ତରାଇ, ଜିଲାସ୍ତରୀୟ ଅଧିକାରୀ, କ୍ଷେତ୍ରୀୟ ଅଧିକାରୀ ଓ ବ୍ଲକସ୍ତରୀୟ ଅଧିକାରୀମାନେ ଉପସ୍ଥିତ ରହି ଆପତ୍ତି ଓ ଅଭିଯୋଗର ଶୁଣାଣି କରିଥିଲେ। ଶିବିରରେ ମୋଟ ୭୯ଟି ଅଭିଯୋଗ ପଞ୍ଜୀକୃତ ହୋଇଥିଲା। ସେଗୁଡିକ ମଧ୍ୟରୁ ବ୍ୟକ୍ତିଗତ ସମସ୍ୟା ସମ୍ପର୍କିତ ୭୪, ଗୋଷ୍ଠୀଗତ ତଥା ଗ୍ରାମ ସମସ୍ୟା ସମ୍ପର୍କିତ ୫ଟି ଥିଲା। ବ୍ୟକ୍ତିଗତ ଅଭିଯୋଗଗୁଡିକ ମଧ୍ୟରୁ ଆବାସ ଯୋଜନା ନିମନ୍ତେ ୨୮, ରାଶନ କାର୍ଡ ୫, ଜମିଜମା ସମସ୍ୟା ୯, ରେଡକ୍ରସ୍ ପାଣ୍ଠିରୁ ସହାୟତା ପାଇଁ ୨, ମୁଖ୍ୟମନ୍ତ୍ରୀଙ୍କ ରିଲିଫ ପାଣ୍ଠିରୁ ସହାୟତା ନିମନ୍ତେ ୧, ଭତ୍ତା ୬, ପୋଲିସ ସହାୟତା ୨ ଓ ଅନ୍ୟାନ୍ୟ ୧୨ଟି ଅଭିଯୋଗ ସମ୍ପର୍କରେ ଶୁଣାଣି ହୋଇଥିଲା । କିନ୍ତୁ ସେଥିରୁ ମାତ୍ର ୯ଟିର ତତ୍କାଳ ଫଇସଲା ସମ୍ଭବ ହୋଇଥିଲା। ଏ ସମ୍ପର୍କରେ ସ୍ଥାନୀୟ ଅଞ୍ଚଳର କେତେଜଣ ବୁଦ୍ଧିଜୀବୀ ପ୍ରତିକ୍ରିୟାରେ କହିଛନ୍ତି, ରାଜ୍ୟ ସରକାର ଏହି ଶିବିର ମାଧ୍ୟମରେ ଜନସାଧାରଣଙ୍କ ଆପତ୍ତି ଓ ଅଭିଯୋଗର ଫଇସଲା କରି ଆସ୍ଥାଭାଜଗ ପାଇଁ ମହତ ଲକ୍ଷ୍ୟ ରଖିଛନ୍ତି। କିନ୍ତୁ ଅନେକ ସମୟରେ ଦେଖାଯାଉଛି ଏହା କେବଳ ଔପଚାରିକତା ପୂରଣ ପାଇଁ କରାଯାଉଛି । ଅର୍ଥାତ୍ କେବଳ ବିଭାଗୀୟ ଅଧିକାରୀଙ୍କୁ ସମାଧାନ ପାଇଁ ନିର୍ଦ୍ଦେଶରେ ସୀମିତ ରହୁଛି । ବିଭାଗୀୟ ଅଧିକାରୀମାନେ ସମାଧାନ କଲେ କି ନାହିଁ ତା’ଉପରେ ଅନୁଧ୍ୟାନ ହେଉନାହିଁ । ଏହାଦ୍ୱାରା ଅଭିଯୋଗକାରୀମାନେ ଫଳ ନ ପାଇ ବାରମ୍ବାର ଅଭିଯୋଗ କରିବାକୁ ବାଧ୍ୟ ହେଉଛନ୍ତି । ଏ ସମ୍ପର୍କରେ ଜିଲାପାଳ ପାରୁଲ ପଟୁୱାରୀଙ୍କ ସହ ଯୋଗାଯୋଗ ପାଇଁ ଚେଷ୍ଟା କରାଯାଇଥିଲେ ସୁଦ୍ଧା ସମ୍ଭବ ହୋଇ ନ ଥିଲା ।
