ଭୁବନେଶ୍ୱର,୪।୧୧: ଆସନ୍ତା ନଭେମ୍ବର ୫ରୁ ୧୨ ତାରିଖ ପର୍ଯ୍ୟନ୍ତ କଟକରେ ହେବାକୁ ଥିବା ଐତିହାସିକ ବାଲିଯାତ୍ରାକୁ ଦୃଷ୍ଟିରେ ରଖି କମିଶନରେଟ୍ ପୋଲିସ ପକ୍ଷରୁ ସହରରେ ଯାନବାହନ ଚଳାଚଳ ଉପରେ କଟକଣା ଲାଗୁ କରାଯାଇଛି। ସାତ ଦିନିଆ ଏହି ଉତ୍ସବରେ ପ୍ରବଳ ଭିଡ଼ ଆଶଙ୍କା କରି ଶୃଙ୍ଖଳିତ ଯାତାୟାତ ପାଇଁ ଏହି ନିଷ୍ପତ୍ତି ନିଆଯାଇଛି।
ଏହି କଟକଣା ନଭେମ୍ବର ୫ରୁ ୧୨ ତାରିଖ ପର୍ଯ୍ୟନ୍ତ ପ୍ରତିଦିନ ଅପରାହ୍ନ ୨ଟାରୁ ଭିଡ଼ ନ କମିବା ପର୍ଯ୍ୟନ୍ତ ବଳବତ୍ତର ରହିବ। ପୋଲିସ କମିଶନର ଏସ୍. ଦେବ ଦତ୍ତ ସିଂହ ଓଡ଼ିଶା ସହରାଞ୍ଚଳ ପୋଲିସ୍ ଅଧିନିୟମ, ୨୦୦୩ର ଧାରା ୨୮ ଅନୁଯାୟୀ ଏହି କଟକଣା ଲଗାଇଛନ୍ତି।
ଭିଡ଼ ସମୟରେ କଟକ ସହର ଭିତରେ ଭାରି ଓ ବାଣିଜ୍ୟିକ ଯାନବାହନ ଚଳାଚଳ ସମ୍ପୂର୍ଣ୍ଣ ବନ୍ଦ ରହିବ। ତେବେ ଆମ୍ବୁଲାନ୍ସ, ଅଗ୍ନିଶମ ଓ ପୋଲିସ ଭଳି ଜରୁରୀକାଳୀନ ସେବା ଗାଡ଼ିକୁ ପ୍ରାଧାନ୍ୟ ଦିଆଯିବ।
ଭୁବନେଶ୍ୱର ପଟୁ ଆସୁଥିବା ଗାଡ଼ି:
ହାଲୁକା ଯାନ (Light Vehicles): ନନ୍ଦନକାନନ, ବାରଙ୍ଗ, ତ୍ରିଶୂଳିଆ ଦେଇ ନେତାଜୀ ସେତୁକୁ ଆସୁଥିବା ଗାଡ଼ିଗୁଡ଼ିକ ବେଲଭ୍ୟୁ ଛକ (ଜୁଡିସିଆଲ୍ ଏକାଡେମୀ)ରୁ ବାମକୁ ବୁଲି CDA-11 ଦେଇ ବିଜୁ ପଟ୍ଟନାୟକ ପାର୍କ ନିକଟରେ ପହଞ୍ଚିବେ। ସେମାନେ ଭୁଆସୁଣି ପଡ଼ିଆ କିମ୍ବା କୃଷକ ବଜାର ପଡ଼ିଆରେ ଗାଡ଼ି ପାର୍କିଂ କରି ସେଠାରୁ ଶଟଲ୍ ବସ୍ ଯୋଗେ ବାଲିଯାତ୍ରା ପଡ଼ିଆକୁ ଯାଇପାରିବେ।
ଆଠଗଡ଼ ଓ ବାଙ୍କୀ ପଟୁ ଆସୁଥିବା ଗାଡ଼ି: ନରାଜ ବ୍ରିଜ୍ ଓ ମଧୁସୂଦନ ସେତୁ ଦେଇ ଆସୁଥିବା ହାଲୁକା ଯାନଗୁଡ଼ିକ ଭୁଆସୁଣି ପଡ଼ିଆ, ଗୋରାକବର ପଡ଼ିଆ କିମ୍ବା କ୍ରିଷ୍ଟିଆନ୍ ପଡ଼ିଆରେ ପାର୍କିଂ କରିବେ ଏବଂ ଶଟଲ୍ ବସ୍ ସେବା ନେବେ।
ଦୁଇଚକିଆ ଯାନ: ସତୀଚଉରା ଛକ, ସେଲଟର୍ ଛକ ଓ କନିକା ଛକ ଦେଇ ଆସୁଥିବା ଦୁଇଚକିଆ ଗାଡ଼ିଗୁଡ଼ିକ ଦୟାଶ୍ରମ ପାର୍କିଂ ପଡ଼ିଆ କିମ୍ବା ଉପର ବାଲିଯାତ୍ରା ପଡ଼ିଆ (ଜୋନ୍-I ଓ II)ରେ ପାର୍କ କରିପାରିବେ।
୪ ଚକିଆ ଓ ୩ ଚକିଆ ଯାନ: ଚାନ୍ଦି ଛକରୁ କେମ୍ବ୍ରିଜ୍ ସ୍କୁଲ୍ ଦେଇ ବାଲିଯାତ୍ରା ପଡ଼ିଆକୁ ଯିବାକୁ ଅନୁମତି ଦିଆଯିବ ନାହିଁ। ଏହି ଗାଡ଼ିଗୁଡ଼ିକ କନିକା ଛକ ଓ ବିଜୁ ପଟ୍ଟନାୟକ ଛକ ଦେଇ ଯାଇ କ୍ରିଷ୍ଟିଆନ୍ ପଡ଼ିଆ କିମ୍ବା ଗୋରାକବର ପାର୍କିଂ ଗ୍ରାଉଣ୍ଡରେ ପାର୍କ କରିବେ।
କେବଳ ଦୁଇଚକିଆ ଯାନ ଚାନ୍ଦି ଛକ ଦେଇ କେମ୍ବ୍ରିଜ୍ ସ୍କୁଲ୍ ପଟକୁ ଯାଇ PHD ଅଫିସ୍ ଛକରୁ ବାମକୁ ବୁଲି ଦୟାଶ୍ରମ/ଉପର ବାଲିଯାତ୍ରା ପାର୍କିଂରେ ପାର୍କ କରିବେ।
ଜୋବ୍ରା/ମତାମଠ ପଟୁ ଆସୁଥିବା ଗାଡ଼ି: ଏହି ପଟୁ ଆସୁଥିବା ଗାଡ଼ିଗୁଡ଼ିକୁ ମୁଖ୍ୟ ବିଚାରପତିଙ୍କ ବାସଭବନର ବିପରୀତ ପାର୍ଶ୍ୱରେ ଥିବା ବ୍ଲକିଂ ପଏଣ୍ଟ ପର୍ଯ୍ୟନ୍ତ ଯିବାକୁ ଅନୁମତି ମିଳିବ ଏବଂ ସେମାନେ ବାଲିଯାତ୍ରା ପଡ଼ିଆ ଭିତରେ ଥିବା ପାର୍କିଂ ୧, ୨, ୩, ୪ ରେ ଗାଡ଼ି ରଖିବେ।
ବାହାରିବା ବାଟ: କୌଣସି ଗାଡ଼ି ରିଙ୍ଗ ରୋଡ୍ ଦେଇ ଗଡ଼ଗଡ଼ିଆ ମନ୍ଦିର ପଟକୁ ଯାଇପାରିବେ ନାହିଁ। ସମସ୍ତ ଗାଡ଼ି ସିଲଭର୍ ସିଟି ବୋଟିଂ କ୍ଲବ ମୁଖ୍ୟ ଫାଟକ ଦେଇ ରିଙ୍ଗ ରୋଡ୍ ରାସ୍ତାରେ ମତାମଠ/ଜୋବ୍ରା ଛକ ଦେଇ ବାହାରିବେ।
ପ୍ରଶାସନ ପକ୍ଷରୁ ଭୁଆସୁଣି ପାର୍କିଂରୁ କ୍ୟାଣ୍ଟନମେଣ୍ଟ ଥାନା ପର୍ଯ୍ୟନ୍ତ ଶଟଲ୍ ବସ୍ ସେବା ଯୋଗାଇ ଦିଆଯିବ।
