କଲମ୍ବିଆ, ୩୧।୩:ନାମିବ୍ୟା ଏବଂ ଦକ୍ଷିଣ ଆଫ୍ରିକାରୁ ଚିତାବାଘ ଆସିବା ପରେ ଏବେ କଲମ୍ବିଆରୁ ଜଳହସ୍ତୀ ଭାରତ ଆସିବେ। କଲମ୍ବିଆ ଅଭୟାରଣ୍ୟରେ ଜଳହସ୍ତୀଙ୍କ ସଂଖ୍ୟା ଦ୍ରୁତ ବେଗରେ ବୃଦ୍ଧି ପାଇବା ଯୋଗୁ ସଂଖ୍ୟା ନିୟନ୍ତ୍ରଣ ପାଇଁ ସ୍ଥାନୀୟ ସରକାର ଏକ ଅଭିଯାନ ଆରମ୍ଭ କରିଛନ୍ତି। ପ୍ରାୟ ୭୦ ଜଳହସ୍ତୀଙ୍କୁ କଲମ୍ବିଆ ବିଦେଶ ପଠାଇବାକୁ ଯାଉଛି। ଏଥିରୁ ପାଖାପାଖି ୬୦ଟି ଜଳହସ୍ତୀ ଭାରତକୁ ପଠାଇବ।
୧୯୮୦ ଦଶକରେ କୋକେନ୍ ବ୍ୟବସାୟୀ ପାବଲୋ ଇସ୍କୋବାର ଆଫ୍ରିକାରୁ ଏକାଧିକ ଜଳହସ୍ତୀ କଲମ୍ବିଆ ଆଣିିଥିଲେ। ୧୯୯୩ରେ ପାବଲୋଙ୍କ ମୃତ୍ୟୁ ଘଟିଥିଲା। ଏହାପରେ ଜଳହସ୍ତୀଗୁଡ଼ିକ ଚାରଣ ଭୂମିରେ ଅବାଧରେ ରହିବା ସହ ବଂଶ ବିସ୍ତାର କରିଥିଲେ। ଜଳହସ୍ତୀଙ୍କ ସଂଖ୍ୟା ବୃଦ୍ଧିକୁ ନେଇ ସ୍ଥାନୀୟ ଏନଭାଇରନ୍ମେଣ୍ଟ ଅଥରିଟି ଉପାୟହୀନ ହୋଇଯାଇଥିବା କହିଛନ୍ତି। ବର୍ତ୍ତମାନ ସମୟରେ ପାବଲୋ ଆଣିଥିବା ଆଫ୍ରିକୀୟ ଜଳହସ୍ତୀଙ୍କ ସଂଖ୍ୟା ୧୫୦ରେ ପହଞ୍ଚତ୍ଛି। ଆସନ୍ତା ମାସରେ କଲମ୍ବିଆ ପାଖାପାଖି ୧୦ ଜଳହସ୍ତୀଙ୍କୁ ନର୍ଦ୍ଦର୍ନ ମେକ୍ସିକୋରେ ଥିବା ଓଷ୍ଟୋକ୍ ଅଭୟାରଣ୍ୟକୁ ଏବଂ ୬୦ ଜଳହସ୍ତୀଙ୍କୁ ଭାରତ ପଠାଇବ। ଅନ୍ୟପକ୍ଷେ ଭାରତର କେଉଁ ଅଭୟାରଣ୍ୟରେ ଏହି ଜଳହସ୍ତୀଙ୍କୁ ରଖାଯିବ ସେ ନେଇ କୌଣସି ନିର୍ଦ୍ଦିଷ୍ଟ ସୂଚନା ମିଳିପାରି ନାହିଁ। ତେବେ ଏହି ଅଭିଯାନରେ ମୋଟ ୩.୫ ମିଲିୟନ୍ ଡଲାର ଖର୍ଚ୍ଚ ହେବ ବୋଲି ଓଷ୍ଟକ ଅଭୟାରଣ୍ୟ ମାଲିକ ଇର୍ନେଷ୍ଟୋ ଜାଜୁଏଟା କହିଛନ୍ତି।
ଜଳହସ୍ତୀଙ୍କ ସଂଖ୍ୟା ନିୟମନ୍ତ୍ରଣକୁ ଆଣିବା ପାଇଁ କଲମ୍ବିଆ ସରକାର ବନ୍ଧ୍ୟାକରଣ ଉପାୟ ଅବଲମ୍ବନ କରି ବିଫଳ ହେବାପରେ ସେମାନଙ୍କୁ ମାରିବା ଲାଗି ମଧ୍ୟ ଯୋଜନା ପ୍ରସ୍ତୁତ କରିଥିଲେ। ଦେଶରେ ଜଳହସ୍ତୀଙ୍କ ସଂଖ୍ୟା ଦ୍ରୁତ ବେଗରେ ବଢ଼ିଚାଲିଥିବା ଗତବର୍ଷ କଲମ୍ବିଆ ପରିବେଶ ମନ୍ତ୍ରଣାଳୟ ପକ୍ଷରୁ କୁହାଯାଇଥିଲା। ବହୁ ବିଫଳତା ପରେ ଜଳହସ୍ତୀଙ୍କ ସଂଖ୍ୟା କମାଇବା ପାଇଁ ସେମାନଙ୍କୁ ସ୍ଥାନାନ୍ତର କରାଯିବା ସବୁଠାରୁ ନିରାପଦ ଏବଂ ସୁରକ୍ଷିତ ପଦକ୍ଷେପ ବୋଲି ସରକାର କହିଛନ୍ତି।
