ମଣିଷର ସଉକ ତାକୁ ଖୁସି ଦେଇଥାଏ। ଅନେକ ସମୟରେ ତ ସେଇ ସଉକକୁ ସେ ଜୀବନର ଆଧାର ଓ ଜୀବନର ଲକ୍ଷ୍ୟ ବି କରିନିଏ। ସେମିତି ଟେକ୍ସାସ୍ର ବୈରୀ ଇବାସ୍ ନାମକ ଜଣେ ବ୍ୟକ୍ତି ନିଜ ପିଲାଦିନର ସଉକକୁ ଏଭଳିଭାବେ ନିଜ ଭିତରେ ଜୀବନ୍ତ ରଖିଛନ୍ତି ଯେ, ଆଜି ତାଙ୍କ ଘର କଣ୍ଢେଇରେ ଭର୍ତ୍ତି ହୋଇଯାଇଛି। ବୟସ ତାଙ୍କୁ ପ୍ରାୟ ୫୦ ବର୍ଷ। ଭାବୁଥିବେ ଏ ବୟସରେ ବା ତାଙ୍କର କଣ୍ଢେଇ ସଉକ କେମିତି ରହିଛି। ତେବେ କହିବାକୁ ଗଲେ ତାଙ୍କର ସଉକ କଣ୍ଢେଇ ନୁହେଁ ବରଂ ଭିଡିଓ ଗେମ୍ ଚରିତ୍ରଗୁଡିକ ତାଙ୍କର ସଉକ। ଦୀର୍ଘ ୩୦ ବର୍ଷ ହେବ ସେ ଭିଡିଓ ଗେମ୍ ‘ସୋନିକ ଦ ହେଜହୋଗ’ର ଚରିତ୍ରର କଣ୍ଢେଇଗୁଡ଼ିକୁ ସଂଗ୍ରହ କରୁଛନ୍ତି। ଏବେ ତାଙ୍କ ପାଖରେ ୩୦୫୦ କ୍ୟାରେକ୍ଟର ଟୟ ଅଛି। ଏତେ ସଂଖ୍ୟକ ଭିଡିଓ ଗେମ୍ କ୍ୟାରେକ୍ଟର ଟୟ ରଖିଥିବାରୁ ତାଙ୍କ ନାମ ଗିନିଜ ଓ୍ବାର୍ଲଡ ରେକର୍ଡସ୍ରେ ବି ସ୍ଥାନ ପାଇଛି। ତାଙ୍କ ପାଖରେ କେବଳ ଖେଳନା ନୁହେଁ, ସେହି କ୍ୟାରେକ୍ଟରର ଚିତ୍ର ଥିବା କପ୍, ପୋଷ୍ଟର, ଚାବି ରିଂ, ଭିଡିଓ ଗେମ୍ର ମୁଭି ସିଡୀ ସହ ଭିଡିଓ ଗେମ୍ କ୍ୟାରେକ୍ଟରର ଖେଳନା ଗଢିବା ଛାଞ୍ଚ ଭଳି ଅନେକ ଜିନିଷ ଅଛି। ତାଙ୍କ ସଂଗ୍ରହରେ କିଛି ଦାମୀ ଜିନିଷ ବି ଅଛି ଯେମିତି କି ଟେଲ୍ସର ବିଶାଳ ମୂର୍ତ୍ତି ଓ ଓ୍ବାକି ଟକି। ବୈରୀ କେବଳ ଏହି ଆଇଟମ୍ କିଣନ୍ତି ନାହିଁ। ବରଂ ନିଜେ ଅନେକ ଜିନିଷ ତିଆରି ବି କରନ୍ତି। ଏଥିପାଇଁ ୧୯୯୩ ମସିହାରେ ସେ ଏ ଅର୍କିଡ ମେଶିନ୍ ବି ତିଆରି କରିଛନ୍ତି।
