ଅନୁଗୋଳ ଅଫିସ, ୩।୧: ଅନୁଗୋଳ ଜିଲାର ଅନ୍ୟତମ ପ୍ରମୁଖ ପର୍ଯ୍ୟଟନସ୍ଥଳୀ ତଥା ଡେରେଜାଙ୍ଗ ଜଳଭଣ୍ଡାରକୁ ସଫାସୁତରା ରଖିବା ଲାଗି ଆରମ୍ଭ ହୋଇଥିବା ଅଭିଯାନରେ ନୂଆ ଫର୍ଦ୍ଦ ଯୋଡ଼ି ହୋଇଛି। ସୋମବାର ଦିନକରେ ଡ୍ୟାମରୁ ୧ ଟନ୍ରୁ ଊର୍ଦ୍ଧ୍ୱ ଆବର୍ଜନା ବାହାର କରାଯାଇଛି। ଏହି ଏକଦିବସୀୟ ସଫେଇ କାର୍ଯ୍ୟକ୍ରମରେ ନେହେରୁ ଯୁବକେନ୍ଦ୍ର, ସାଥୀ ପରିବାର, ପରତରା ୟଙ୍ଗ ଷ୍ଟାର କ୍ଲବର ସଦସ୍ୟ ସାମିଲ ହୋଇଥିଲେ।
ବ୍ୟସ୍ତବହୁଳ ଜୀବନକୁ ହାଲୁକା କରିବା ପାଇଁ ଅନୁଗୋଳ ସହରବାସୀଙ୍କ ପାଇଁ ସୁଲଭ ଡେଷ୍ଟିନେଶନ ପାଲଟିଛି ଡେରଜାଙ୍ଗ ଡ୍ୟାମ୍। ଜଳଭଣ୍ଡାରର ବିସ୍ତୀର୍ଣ୍ଣ ଜଳରାଶି, ଅପରୂପ ସୌନ୍ଦର୍ଯ୍ୟକୁ ଉପଭୋଗ କରିବା ଲାଗି ଜିଲାର ବିଭିନ୍ନ ସ୍ଥାନରୁ ବର୍ଷତମାମ ଏଠାକୁ ପର୍ଯ୍ୟଟକ ଆସିଥାଆନ୍ତି। ଜଳଭଣ୍ଡାର ଜମିକୁ ଜଳ ଯୋଗାଉଥିବାବେଳେ ଏଠାରେ ସୃଷ୍ଟିହୋଇଛି ଏକ ସୁଦୃଢ଼ ଆର୍ଦ୍ରଭୂମି। ଫଳରେ ଡ୍ୟାମ୍ ଏବଂ ଏହର ଆଖପାଖ ଅଞ୍ଚଳ ପାଲଟିଛି ବିଭିନ୍ନ ପ୍ରଜାତିର ପକ୍ଷୀ, ଜଳଚର ଜୀବଙ୍କ ପ୍ରାକୃତିକ ଆବାସସ୍ଥଳୀ। ତେବେ କେତେଜଣ ଦାୟିତ୍ୱହୀନ ପର୍ଯ୍ୟଟକଙ୍କ କାର୍ଯ୍ୟକଳାପ ଡ୍ୟାମ୍କୁ ପ୍ରଦୂଷିତ କରୁଛି। ପ୍ଲାଷ୍ଟିକ୍ ବୋତଲ, ଜରି, ଥଳି ଏବଂ ବିପଜ୍ଜନକ ବର୍ଜ୍ୟ ଜଳଭଣ୍ଡାର ଜୈବ ବିବିଧତାକୁ ନଷ୍ଟ କରୁଛି। ଏହାର ପ୍ରତିକାର ଲାଗି ସର୍ଦ୍ଦାର ବଲ୍ଲଭଭାଇ ପଟେଲଙ୍କ ୧୭୪ତମ ଜୟନ୍ତୀ ତଥା ‘ଏକତା ଦିବସ’ରୁ ଆରମ୍ଭ ହୋଇଛି ‘ନିର୍ମଳ ଡେରଜାଙ୍ଗ ଜଳଭଣ୍ଡାର ଅଭିଯାନ’। ବର୍ଷତମାମ ଡ୍ୟାମ ଏବଂ ଏହାର ଆଖପାଖ ଅଞ୍ଚଳରେ ସଫେଇ ଅଭିଯାନ ଜାରି ରହିଥିବାବେଳେ ନୂଆବର୍ଷର ଦ୍ୱିତୀୟ ଦିନରେ ଜଳଭଣ୍ଡାର ଭିତରୁ ୧ ଟନ୍ରୁ ଊର୍ଦ୍ଧ୍ୱ ପ୍ଲାଷ୍ଟିକ୍ ବର୍ଜ୍ୟ ସଂଗ୍ରହ କରାଯାଇଥିଲା।
ବିଶିଷ୍ଟ ପରିବେଶବିତ୍ ପ୍ରସନ୍ନ ବେହେରା, ଯୁବ ସାମାଜିକ କର୍ମୀ ସୁବ୍ରତ ସାହୁ, ପ୍ରକୃତିପ୍ରେମୀ ସୁଦର୍ଶନ ପ୍ରଧାନ ପ୍ରମୁଖ ସ୍ବେଚ୍ଛାସେବୀଙ୍କୁ ଉତ୍ସାହିତ କରାଇଥିଲେ। ଏହି ଅଭିଯାନ ବର୍ଷତମାମ ଚାଲିବ। ଜଳଭଣ୍ଡାର ପରିବେଶକୁ ସଫାସୁତରା ରଖିବା ଲାଗି ଜିଲା ପ୍ରଶାସନ ସହାୟତାରେ ପର୍ଯ୍ୟଟକଙ୍କୁ ସଚେତନ କରାଯିବ ବୋଲି ସାଥୀ ପରିବାର ପକ୍ଷରୁ ସୂଚନା ଦିଆଯାଇଛି।
