ବ୍ରହ୍ମପୁର ଅଫିସ,୬ା୩- କରୋନା ସହ ଜନସାଧାରଣ ସଂଘର୍ଷ କରିଆସିଥିବା ବେଳେ ଏବେ ଘରେ ଘରେ ଥଣ୍ଡାକାଶ ଓ ଜ୍ୱର ଯୋଗୁ ଲୋକେ ଚିନ୍ତାରେ ପଡିଛନ୍ତି। ଗତ ଡିସେମ୍ବର ୧୦ରୁ ଏଯାବତ ହୋଇଥିବା ନିରୀକ୍ଷଣରୁ ଏଭଳି ସୂଚନା ମିଳିଛି। ଶ୍ୱାସ ସଂକ୍ରମଣ ଲକ୍ଷଣ ଥିବା ରୋଗୀମାନଙ୍କଠାରେ ଏହି ରୋଗ ଲାଗି ରହୁଛି।
ଇନ୍ଫ୍ଲୁଏଞ୍ଜା କାରଣରୁ ଜ୍ୱର, ଥଣ୍ଡାକାଶ ଓ ଶରୀର ଯନ୍ତ୍ରଣା ଲାଗି ରହୁଛି। ଅଧିକାଂଶ ରୋଗୀ ଦୀର୍ଘଦିନ ଧରି ଔଷଧ ଖାଇ ମଧ୍ୟ ଅସୁସ୍ଥ ରହୁଛନ୍ତି। ସେମାନଙ୍କଠାରେ କରୋନାର ସମସ୍ତ ଲକ୍ଷଣ ଦେଖାଯାଉଛି। ଏହା କୌଣସି ସିଜନାଲ ଡିଜିଜ୍ ନୁହେଁ ବରଂ ଏଚ୍୩ଏନ୍୨ ଭୂତାଣର ଉପପ୍ରଜାତି ଇନ୍ଫ୍ଲୁଏଞ୍ଜା ବୋଲି ଇଣ୍ଡିଆନ କାଉନ୍ସିଲ ଅଫ୍ ମେଡିକାଲ ରିସର୍ଚ୍ଚ ପକ୍ଷରୁ ସତର୍କ ସୂଚନା ଦିଆଯାଇଛି। ଏହି ଆଧାରରେ ଜିଲା ମୁଖ୍ୟ ଚିକିତ୍ସାଧିକାରୀ ଡା. ଉମାଶଙ୍କର ମିଶ୍ର ଗ୍ରାମାଞ୍ଚଳରେ ଥିବା ୯୩ ପ୍ରାଥମିକ ସ୍ବାସ୍ଥ୍ୟକେନ୍ଦ୍ର, ୨୮ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର, ୪ ଉପଖଣ୍ଡସ୍ତରୀୟ ହସ୍ପିଟାଲ, ମହାନଗର ନିଗମରେ ଥିବା ସମସ୍ତ ସ୍ବାସ୍ଥ୍ୟ କେନ୍ଦ୍ର, ସିଟି ହସ୍ପିଟାଲ, ବଡ଼ ମେଡିକାଲକୁ ସତର୍କ ସୂଚନା ଦେଇଥିବା କହିଛନ୍ତି।
ରୋଗୀ ସୁସ୍ଥ ହେଲେ ବି ଏହି ଲକ୍ଷଣ ଦୀର୍ଘଦିନ ପର୍ଯ୍ୟନ୍ତ ରହୁଛି। ଏହି ନୂଆ ପ୍ରଜାତିର ଇନ୍ଫ୍ଲୁଏଞ୍ଜା ଜୀବନ ପ୍ରତି ବିପଜ୍ଜନକ ନୁହେଁ। ଏଥିପାଇଁ କେହି ଭୟଭୀତ ନ ହୋଇ ଡାକ୍ତରଙ୍କ ପରାମର୍ଶ କ୍ରମେ ଔଷଧ ସେବନ କରିବାକୁ ସେ କହିଛନ୍ତି। ବହୁ କ୍ଷେତ୍ରରେ ଏହି ଥଣ୍ଡାକାଶରୁ ବାନ୍ତିି ଲାଗିବା, ଗଳା ଦରଜ, ଦେହବିନ୍ଧା ଓ ତରଳ ଝାଡ଼ା ହେଉଛି। ଏହା ଏଚ୍୩ଏନ୍୨ ଭୂତାଣୁ ଯୋଗୁ ହେଉଛି। ଜ୍ୱର ୨/୩ ଦିନ ଯାଏ ରହୁଥିବା ବେଳେ କାଶ ପ୍ରାୟ ୩ ସପ୍ତାହ ପର୍ଯ୍ୟନ୍ତ ରହୁଛି। ବାୟୁ ପ୍ରଦୂଷଣ ଯୋଗୁ ମଧ୍ୟ ଭୂତାଣୁ ସଂକ୍ରମଣ ହୋଇପାରେ ବୋଲି ମଧ୍ୟ ଅନୁମାନ କରାଯାଉଛି। କାଶ ଓ ଛିଙ୍କ ବେଳେ ମୁହଁକୁ ଘୋଡାଇ ରଖିବା, ଯାତାୟାତ ବେଳେ ମାସ୍କ ପିନ୍ଧିବା, ଗହଳି ସ୍ଥାନକୁ ନ ଯିବା, ଲକ୍ଷଣ ଥିଲେ ହାତ ଭଳଭାବେ ଧୋଇବା ସହ ରୋଗୀମାନଙ୍କୁ ଏ ଦିଗରେ ବିଶେଷ ସତର୍କ ରହିବାକୁ ସେ ପରାମର୍ଶ ଦେଇଛନ୍ତି।
