ଦାରିଙ୍ଗବାଡି, ୭/୭ (ଅରୁଣ ସାହୁ ):କନ୍ଧମାଳ ଜିଲା ଦାରିଙ୍ଗବାଡି ପର୍ଯ୍ୟଟନ କ୍ଷେତ୍ର ପାଇଁ ରାଜ୍ୟ ତଥା ରାଜ୍ୟ ବାହାରେ ବେସ ପରିଚିତ। କଫି ବଗିଚା ଦାରିଙ୍ଗବାଡିକୁ ସ୍ବତନ୍ତ୍ର ପରିଚୟ ଦେଇଛି। ପର୍ଯ୍ୟଟକ କଫି ବଗିଚା ବୁଲିବାକୁ ନିୟମିତ ବର୍ଷା, ଖରା ଓ ଶୀତ ଦିନରେ ଆସୁଛନ୍ତି। ଆଜି ସେହି କଫି ବଗିଚା ସମ୍ମୁଖରେ ରହିଥିବା ୟୁକାଲ ପଟାସ ବଣରେ କୁଢ଼କୁଢ଼ ଅଳିଆ ଆବର୍ଜନା ପରିବେଶକୁ ନଷ୍ଟ କରିବାରେ ବସିଛି।
ଦାରିଙ୍ଗବାଡି ବଜାରରୁ ବାହାରୁଥୁବା ପ୍ଲାଷ୍ଟିକ, ଅଇଁଠା ଖଲି ପତ୍ର ସମେତ ବର୍ଜ୍ୟବସ୍ତୁକୁ ଲୋକମାନେ ଆଣି ସେହି ୟୁକାଲ ପଟାସ ବଣରେ ପକାଇ ପରିବେଶକୁ ସମ୍ପୂର୍ଣ୍ଣ ନଷ୍ଟ କରିସାରିଥିବା ଅଭିଯୋଗ ହେଉଛି। ଏବେ କୁଢ଼ କୁଢ଼ ଅଳିଆ ଏହି ଲଘୁଚାପଜନିତ ବର୍ଷା ଜଳରେ ପୁତ୍ତିମୟ ଗନ୍ଧ ସୃଷ୍ଟି ହୋଇଛି। ଫଳରେ କଫି ବଗିଚାକୁ ଆସୁଥିବା ପର୍ଯ୍ୟଟକ ଅସନ୍ତୋଷ ବ୍ୟକ୍ତ କରିଛନ୍ତି। କଫି ବଗିଚା ବୁଲିବାକୁ ଆସୁଥିବା ପର୍ଯ୍ୟଟକ ଉକ୍ତ ୟୁକାଲ ପଟାସ ବଣ ମଧ୍ୟ ବୁଲି ଫଟୋ ଉତ୍ତୋଳନ କରୁଥିବା ଓ ବୁଲିବାକୁ ପସନ୍ଦ କରୁଥିବାବେଳେ କୁଢ଼ କୁଢ଼ ଅଳିଆ ଯୋଗୁ ପର୍ଯ୍ୟଟକ ନିରାଶ ହେଉଛନ୍ତି। ଦାରିଙ୍ଗବାଡିର ଝରଣା, ଜଳ ପ୍ରପାତ, ଜଙ୍ଗଲକୁ ଭଲ ପାଉଥିବା ପର୍ଯ୍ୟଟକଙ୍କ ମନରେ ଅସନ୍ତୋଷ ଦେଖିବାକୁ ମିଳିଛି। ଏଥି ପ୍ରତି ଦାୟିତ୍ୱରେ ଥିବା ଅଧିକାରୀମାନେ ଗୁରୁତ୍ୱ ଦେବାକୁ ପର୍ଯ୍ୟଟକ କହିଛନ୍ତି। ଡମ୍ପିୟାର୍ଡ଼ ଶୀଘ୍ର ନିର୍ମାଣ କରାଯାଇ ବଜାରରୁ ବାହାରୁଥିବା ଅଳିଆକୁ ଡମ୍ପିୟାର୍ଡ଼ରେ ପକାଇବା ବ୍ୟବସ୍ଥା କରାଯାଇ ଏଣେ ତେଣେ ଅଳିଆ ନପକାଇବାକୁ ପର୍ଯ୍ୟଟକମାନେ ମତ ପ୍ରକାଶ କରିଛନ୍ତି।
