ବ୍ରହ୍ମପୁର ଅଫିସ,୩ା୧୧: ବିସିସି ବ୍ୟାଙ୍କ ସମେତ ଜିଲା ସମବାୟ ସଂଘ ଓ ବ୍ରହ୍ମପୁର ଆଞ୍ଚଳିକ ବାଣିଜ୍ୟ ସମବାୟ ସମିତି ନିର୍ଦ୍ଦେଶକ ନିର୍ବାଚନ ଏବଂ ଫଳାଫଳ ଘୋଷଣା ପରେ ଏହି ୩ କେନ୍ଦ୍ରୀୟ ସମବାୟ ସଂସ୍ଥାରେ ସଭାପତି ନିର୍ବାଚନ ଲାଗି ବିଜ୍ଞପ୍ତି ପ୍ରକାଶ ପାଇଛି। ଆସନ୍ତା ୧୮ ତାରିଖ ସୁଦ୍ଧା ନିର୍ବାଚନ ସରିବ ଏବଂ ନୂଆ ସଭାପତି ନିର୍ବାଚିତ ହେବାର କାର୍ଯ୍ୟକ୍ରମ ରହିଛି। ତେଣୁ ପୁଣି ସମବାୟ ରାଜନୀତି ଚଳଚଞ୍ଚଳ ହୋଇଛି। ବିଜେଡିର ଗଞ୍ଜାମ ଜିଲା ପର୍ଯ୍ୟବେକ୍ଷକ ସୂଚନା ଓ ଲୋକ ସମ୍ପର୍କ ମନ୍ତ୍ରୀ ପ୍ରଦୀପ ଅମାତ ବୁଧବାର ବ୍ରହ୍ମପୁର ସର୍କିଟ ହାଉସ୍ରେ ବିଧାୟିକା ଓ ବିଧାୟକ ଏବଂ ଦଳ ସଭାପତି ଓ ଅନ୍ୟମାନଙ୍କ ସହ ଆଲୋଚନା କରିଛନ୍ତି।
ସୂଚନାଯୋଗ୍ୟ, ଗୁରୁତ୍ୱପୂର୍ଣ୍ଣ ବିସିସି ବ୍ୟାଙ୍କକୁ ନିର୍ବାଚିତ ହୋଇଥିବା ୧୫ ନିର୍ଦ୍ଦେଶକଙ୍କ ମଧ୍ୟରେ ୪ ମହିଳା ଅଛନ୍ତି। ସେଥିରୁ ରଙ୍ଗେଇଲୁଣ୍ଡା ବ୍ଲକର ବିଷ୍ଣୁପ୍ରିୟା ନାୟକ, ବ୍ରହ୍ମପୁର ଓ ପାଖ ବ୍ଲକକୁ ନେଇ ଗଠିତ ୬ନଂ. ଜୋନ୍ରୁ କୁନି କୁମାରୀ ଦାସ, ପାତ୍ରପୁର ବ୍ଲକର ୯ନଂ. ଜୋନ୍ର ଗୀତାଞ୍ଜଳି ପ୍ରଧାନ ଶାସକ ଦଳ ମନୋନୀତ ହୋଇଥିବା ବେଳେ ପୁରୁଷୋତ୍ତମପୁର ବ୍ଲକ ୩ନଂ. ଜୋନ୍ରୁ ନିର୍ବାଚିତ ସୁଷମା ବେହେରା ବିଦ୍ରୋହୀ ପ୍ରାର୍ଥୀ ଭାବେ ନିର୍ବାଚିତ ହୋଇଛନ୍ତି। ସେହିପରି ପୁରୁଷ ୧୧ ଜଣ ନିର୍ଦ୍ଦେଶକଙ୍କ ମଧ୍ୟରୁ ବିଜେଡି ବିଦ୍ରୋହୀ, ସିପିଆଇ ଓ ଭାଜପା ସମର୍ଥିତ ଓ ନିର୍ଦ୍ଦଳୀୟମାନେ ଅଛନ୍ତି।
ଅପରପକ୍ଷରେ ବିସିସି ବ୍ୟାଙ୍କ ଏକ ବୃହତ୍ତର ସମବାୟ ଅନୁଷ୍ଠାନ ହୋଇଥିବାରୁ ଏହାର ସଭାପତି ହେବାକୁ ଅନେକଙ୍କ ନଜର ରହିଛି। ତେବେ ଶାସକ ଦଳର ଅଧିକ ବିଦ୍ରୋହୀ ଜିତିଥିବାରୁ ସମସ୍ୟା ଦେଖାଦେଇଛି। ତଥାପି ବିଦ୍ରୋହୀଙ୍କୁ ମନାଇ ଯେ କୌଣସି ପ୍ରକାରେ ସଭାପତି ପଦ କ୍ଷମତାସୀନ ଦଳ ହାତେଇବାର ପଦକ୍ଷେପ ନିଆଯାଇଛି। ଶାସକ ଦଳ ସମର୍ଥିକ ୩ ମହିଳାଙ୍କ ମଧ୍ୟରୁ ଜଣେ ସଭାପତି ହେବାର ମଧ୍ୟ ଚର୍ଚ୍ଚାକୁ ଆସିଛି। ଏହା ଯଦି ସମ୍ଭବ ହୁଏ ତେବେ ଶତାଧିକ ବର୍ଷର ଏହି ବ୍ୟାଙ୍କରେ ପ୍ରଥମ କରି ମହିଳା ସଭାପତି ହେବେ। ନିର୍ବାଚନ ହେବାକୁ ୧୦ ରୁ ଅଧିକ ଦିନ ଥିବାରୁ ଜିଲା ବିଜେଡି ଅଙ୍କକଷା ଆରମ୍ଭ କରି ଦେଇଥିବା ସୂଚନା ମିଳିଛି।
ସେହିପରି ଜିଲା ସମବାୟ ସଂଘ ୧୫ ନିର୍ଦ୍ଦେଶକଙ୍କ ମଧ୍ୟରୁ ୧୨ ଜଣ ଅପ୍ରତିଦ୍ୱନ୍ଦ୍ୱି ଥିଲେ। ୨ଟି ଜୋନ୍ ଖାଲି ପଡ଼ିଛି। ୯ନଂ ଏକମାତ୍ର ଜୋନରେ ଗତ ୨୩ ତାରିଖରେ ହୋଇଥିବା ନିର୍ବାଚନରେ କଂଗ୍ରେସ ସମର୍ଥିତ ପ୍ରାର୍ଥୀ ଜିତିଛନ୍ତି। ତେଣୁ ସମବାୟ ସଂଘରେ ଶାସକ ଦଳ ସମର୍ଥିତ ସଭାପତି ହେବାର ସୁନିଶ୍ଚିତ ହୋଇଛି। ମନ୍ତ୍ରୀ ଅମାତ ଏ ସମ୍ପର୍କରେ ଜିଲା ବିଜେଡି ସଭାପତିଙ୍କ ସହ ଆଲାଚନା କରିଥିବା ଜଣାପଡ଼ିଛି। ବ୍ରହ୍ମପୁର ଆଞ୍ଚଳିକ ବାଣିଜ୍ୟ ସମବାୟ ସମିତିର ୧୫ ନିର୍ଦ୍ଦେଶକଙ୍କ ମଧ୍ୟରୁ ୧୨ ଜଣ ବିନା ପ୍ରତିଦ୍ୱନ୍ଦ୍ୱିତାରେ ନିର୍ବାଚିତ ହୋଇଥିଲେ। ଅବଶିଷ୍ଟ ୩ଟି ଜୋନ୍ ପାଇଁ ଗତ ୨୩ ତାରିଖରେ ହୋଇଥିବା ନିର୍ବାଚନରେ ଶାସକ ଦଳ ମନୋନୀତ ପ୍ରାର୍ଥୀମାନେ ଜିତିଛନ୍ତି। ତେଣୁ ଏହି ସଂସ୍ଥାରେ ମଧ୍ୟ ସଭାପତି ବିଜେଡି ଦଖଲକୁ ଯିବାର ସ୍ପଷ୍ଟ ହୋଇଛି। କାହାକୁ ଦଳ ଚୟନ କରିବ ସେନେଇ ଆଲୋଚନା ପରିସରକୁ ଆସିଛି। ଆସନ୍ତା ୧୦ ତାରିଖରେ ଏହି ଦୁଇଟି ଯାକ ସଂସ୍ଥାର ସଭାପତି ପଦ ପାଇଁ ନାମାଙ୍କନ ଦାଖଲ ହେବ। ଆବଶ୍ୟକସ୍ଥଳେ ୧୧ରେ ନିର୍ବାଚନ କରାଯିବ। ତେଣୁ ଉପରୋକ୍ତ ୩ ସମବାୟ ସଂସ୍ଥା ଉପରେ ବିଭିନ୍ନ ମହଲ ନଜର ପକାଇଛନ୍ତି।
