ଭୁବନେଶ୍ୱର,୨୩ା୬, (ଅନିଲ ଦାସ): ସ୍ବାଧୀନତା ପରେ ପ୍ରଥମ ଥର ପାଇଁ ଓଡ଼ିଶାରେ ଭାଜପା ସରକାର ଗଠନ ହୋଇଛି । ହେଲେ ସରକାର ଶ୍ରମିକମାନଙ୍କ ପ୍ରତି କୌଣସି ସକାରାତ୍ମକ ମନୋଭାବ ପୋଷଣ କରିନାହାନ୍ତି। ରାଜ୍ୟରେ ଅନେକ ଶହ ଛୋଟ ବଡ କାରଖାନା ବନ୍ଦହୋଇ ରହିଛି। ସରକାର ଆସିବା ପରେ ସେସବୁ କାରଖାନା ଖୋଲିବା ପାଇଁ କୌଣସି ନିଷ୍ପତ୍ତି ନେଇନାହାନ୍ତି। ସରକାର ଶ୍ରୀଜଗନ୍ନାଥ ମନ୍ଦିର ଦ୍ୱାର ଖୋଲିବା ନେଇ ଅଧିକ ତତ୍ପରତା ଦେଖାଇଛନ୍ତି । ଗତ ଦୁଇଦିନ ଧରି ଖାରବେଳ ନଗରସ୍ଥିତ ଶ୍ରମିକ ଭବନଠାରେ ସିଆଇଟିୟୁ ପକ୍ଷରୁ ଅନୁଷ୍ଠିତ ରାଜ୍ୟ କାର୍ଯ୍ୟକାରିଣୀ ବୈଠକରେ ଏହି ମତ ପ୍ରକାଶ ପାଇଛି।
ଏହି କାର୍ଯ୍ୟକ୍ରମରେ ଯୋଗ ଦେଇ ସିଆଇଟିୟୁ ସର୍ବଭାରତୀୟ ସଭା ନେତ୍ରୀ କେ. ହେମଲତା କେନ୍ଦ୍ରରେ ମୋଦିଙ୍କ ନେତୃତ୍ୱରେ ଗଠିତ ନୂତନ ଏନ୍ଡିଏ ସରକାର ଶ୍ରମିକମାନଙ୍କ ବିରୋଧରେ ହୋଇଥିବା ନିଷ୍ପତ୍ତିଗୁଡିକ ଉପରେ ବିଶଦ ଆଲୋଚନା କରିଛନ୍ତି। କେନ୍ଦ୍ର ସରକାର ଗ୍ରହଣ କରିଥିବା ନବ ଉଦାରବାଦୀ ଅର୍ଥନୀତି ଫଳରେ ଦେଶର ସମସ୍ତ ଲାଭଜନକ ସରକାରୀ ସଂସ୍ଥାକୁ ଘରୋଇ କର୍ପୋରେଟରମାନଙ୍କ ହାତକୁ ଟେକିଦେବାର ଚକ୍ରାନ୍ତ ହୋଇଛି। ଠିକ୍ ସମୟରେ ନିଯୁକ୍ତିଦାତା ଶ୍ରମିକଙ୍କ ଇପିଏଫ୍ ପାଉଣା ଜମା ନ କଲେ ଯେଉଁ ହାରରେ ଜରିମାନା ଦେବାକୁ ଆଇନରେ ବ୍ୟବସ୍ଥା ଥିଲା, ତାହାକୁ ମୋଦିଙ୍କ ୩ୟ ପାଳି ସରକାର ଏକ ପଞ୍ଚମାଂଶ ହ୍ରାସ କରି ମାଲିକଙ୍କୁ ରକ୍ଷାକବଚ ଯୋଗାଇ ଦେଉଛନ୍ତି ବୋଲି ସେ ଅଭିଯୋଗ କରିଛନ୍ତି। ସରକାର ଶପଥ ନେବାର କିଛିଦିନ ନ ଯାଉଣୁ ବାଲେଶ୍ୱରରେ ସାମ୍ପ୍ରଦାୟିକ ତିକ୍ତତା ସୃଷ୍ଟି ହୋଇଛି। ସିଆଇଟିୟୁ ରାଜ୍ୟ କମିଟି ଏଥିରେ ଘୋର ଉଦ୍ବେଗ ପ୍ରକାଶ କରିଛି। ରାଜ୍ୟରେ ସାମ୍ପ୍ରଦାୟିକ ସଦ୍ଭାବ ବଜାୟ ରଖିବାକୁ ନିବେଦନ କରିଛି।
ଏହି ପରିପ୍ରେକ୍ଷୀରେ ରାଜ୍ୟରେ ବନ୍ଦ ଥିବା କାରଖାନା ଚଲାଇବା, ଘରୋଇକରଣ ବନ୍ଦ କରିବା, ଶ୍ରମିକଙ୍କ ମଜୁରି ୨୬ ହଜାର କରିବା, ସ୍ଥାୟୀ କାର୍ଯ୍ୟରେ ଠିକା ନିଯୁକ୍ତି ବନ୍ଦ କରିବା, ସମାନ କାମକୁ ସମାନ ମଜୁରି, ଶ୍ରମ ବୋର୍ଡ ବାତିଲ କରିବା, ସ୍ବାସ୍ଥ୍ୟ ବୀମା ଉପରେ ଜିଏସ୍ଟି ଲାଗୁ ନ କରିବା, ଅବସର କର୍ମଚାରୀଙ୍କୁ ପୁନଃ ନିଯୁକ୍ତି ନ ଦେବା ଆଦି ୧୫ ଦଫା ଦାବି କରାଯାଇଛି। ଏହି ଦାବିପତ୍ର ଆସନ୍ତା ଜୁଲାଇ ୧୧ରେ ସମସ୍ତ ଜିଲାର ଜିଲାପାଳ ଓ ମୁଖ୍ୟମନ୍ତ୍ରୀଙ୍କୁ ପ୍ରଦାନ କରାଯିବ ବୋଲି ସିଆଇଟିୟୁ ରାଜ୍ୟ ସଭାପତି ଜନାର୍ଦ୍ଦନ ପତି ଓ ସାଧାରଣ ସମ୍ପାଦକ ବିଷ୍ଣୁ ଚରଣ ମହାନ୍ତି ସୂଚନା ଦେଇଛନ୍ତିି।
