ମୁମ୍ବାଇ,୧୨।୨: ଟି୨୦ ବିଶ୍ୱକପ ୨୦୨୬ରେ ଦେଖିବାକୁ ମିଳିଛି ଏକ ବଡ଼ ବିପର୍ଯ୍ୟୟ। ପ୍ରଥମ ଥର ପାଇଁ ବିଶ୍ୱକପ ଖେଳୁଥିବା ଇଟାଲୀ, ନେପାଳ ଭଳି ଶକ୍ତିଶାଳୀ ଦଳକୁ ୧୦ ୱିକେଟରେ ପରାସ୍ତ କରି ନିଜ କ୍ରିକେଟ ଇତିହାସର ପ୍ରଥମ ବିଶ୍ୱକପ ବିଜୟ ହାସଲ କରିଛି। ମୁମ୍ବାଇର ୱାଙ୍ଖେଡେ ଷ୍ଟାଡିୟମରେ ଅନୁଷ୍ଠିତ ଏହି ମ୍ୟାଚରେ ଇଟାଲୀର ଉଭୟ ବୋଲିଂ ଓ ବ୍ୟାଟିଂ ବିଭାଗରେ କ୍ଲିନିକାଲ ପ୍ରଦର୍ଶନ ଦେଖିବାକୁ ମିଳିଥିଲା।
ନେପାଳ ପକ୍ଷରୁ ମିଳିଥିବା ୧୨୪ ରନର ସାମାନ୍ୟ ଲକ୍ଷ୍ୟକୁ ଇଟାଲୀ ମାତ୍ର ୧୨.୪ ଓଭରରେ କୌଣସି ୱିକେଟ ନହରାଇ ହାସଲ କରିନେଇଥିଲା। ଦୁଇ ଭାଇ ଆନ୍ଥୋନୀ ମୋସ୍କା ଓ ଜଷ୍ଟିନ୍ ମୋସ୍କା ନେପାଳ ବୋଲରଙ୍କୁ ନିର୍ଧୁମ ପ୍ରହାର କରିଥିଲେ। ଆନ୍ଥୋନୀ ମୋସ୍କା ମାତ୍ର ୩୨ ବଲରୁ ୬୨ ରନ ଏବଂ ଜଷ୍ଟିନ୍ ମୋସ୍କା ୪୪ ବଲରୁ ୬୦ ରନ କରିଥିଲେ।
ପୂର୍ବରୁ ଟସ୍ ଜିତି ଇଟାଲୀ ପ୍ରଥମେ ବୋଲିଂ କରିବାକୁ ନିଷ୍ପତ୍ତି ନେଇଥିଲା। ଇଟାଲୀର ସ୍ପିନରମାନେ ନେପାଳର ବ୍ୟାଟିଂ ମେରୁଦଣ୍ଡ ଭାଙ୍ଗି ଦେଇଥିଲେ, ଫଳରେ ନେପାଳ ୧୨୩ ରନରେ ଅଲ୍-ଆଉଟ୍ ହୋଇଯାଇଥିଲା। ଇଟାଲୀର କ୍ରିସାନ କାଲୁଗାମାଗେ ୧୮ ରନ ଦେଇ ୩ଟି ୱିକେଟ ନେଇ ‘ପ୍ଲେୟାର ଅଫ୍ ଦି ମ୍ୟାଚ୍’ ବିବେଚିତ ହୋଇଛନ୍ତି। ବେନ୍ ମାନେଣ୍ଟି ୪ ଓଭରରେ ମାତ୍ର ୯ ରନ ଦେଇ ୨ଟି ଗୁରୁତ୍ୱପୂର୍ଣ୍ଣ ୱିକେଟ ହାସଲ କରିଥିଲେ।
ନେପାଳ ପକ୍ଷରୁ ଆରିଫ୍ ଶେଖ୍ (୨୭) ଏବଂ ଅଧିନାୟକ ରୋହିତ ପୌଡେଲ (୨୩) କିଛି ସମୟ ସଂଘର୍ଷ କରିଥିଲେ ମଧ୍ୟ ଦଳକୁ ବଡ଼ ସ୍କୋର ପର୍ଯ୍ୟନ୍ତ ନେଇପାରିନଥିଲେ।
ନିଜର ପ୍ରଥମ ମ୍ୟାଚରେ ସ୍କଟଲ୍ୟାଣ୍ଡଠାରୁ ପରାସ୍ତ ହୋଇଥିବା ଇଟାଲୀ, ଦ୍ୱିତୀୟ ମ୍ୟାଚରେ ଯେଉଁଭଳି ପ୍ରତ୍ୟାବର୍ତ୍ତନ କଲା ତାହା ସମସ୍ତଙ୍କୁ ଚକିତ କରିଛି। ଅନ୍ୟପଟେ ଇଂଲଣ୍ଡ ବିପକ୍ଷରେ ଭଲ ପ୍ରଦର୍ଶନ କରିଥିବା ନେପାଳ, ଏହି ମ୍ୟାଚରେ ସମ୍ପୂର୍ଣ୍ଣ ବିଫଳ ହୋଇଛି। ଏହି ବିଜୟ ସହ ଇଟାଲୀ ଗ୍ରୁପ୍-ସି ରେ ନିଜର ସ୍ଥିତି ସୁଦୃଢ଼ କରିଛି।
