ବଲାଙ୍ଗୀର ଅଫିସ, ୨୨ା୧୨: କଣ୍ଟାବାଞ୍ଜି ସବ୍ଜେଲରେ ମଙ୍ଗଳବାର ମମିତା ମେହେର ହତ୍ୟା ମାମଲାର ମୁଖ୍ୟ ଅଭିଯୁକ୍ତ ଗୋବିନ୍ଦଙ୍କ ମୃତ୍ୟୁ ଘଟିଥିବାବେଳେ ତାଙ୍କ ପକେଟରୁ ଏକ ମାଟିଆ ରଙ୍ଗର ଲଫାପା ମିଳିଛି। ସେଥିରେ ଦୁଇପୃଷ୍ଟାର ଲେଖା ରହିଛି। ଏକଥା ପୋଲିସ କହିଥିବା ଗୋବିନ୍ଦଙ୍କ କାକା ଶ୍ୱଶୁର ମହେନ୍ଦ୍ର ସାହୁ କହିଛନ୍ତି। ଏପରି କି ସେହି ଦୁଇପୃଷ୍ଟାର ଲେଖା ପଢ଼ିବାକୁ ଚାହିଁଥିବାରୁ ତାଙ୍କୁ ପୋଲିସ ସୁଯୋଗ ଦେଇ ନ ଥିଲା ବୋଲି ମହେନ୍ଦ୍ର କହିଛନ୍ତି।
ଗୋବିନ୍ଦ ସାହୁଙ୍କ ମୃତଦେହକୁ ମଙ୍ଗଳବାର ରାତିରୁ ବଲାଙ୍ଗୀର ଭୀମ ଭୋଇ ମେଡିକାଲ କଲେଜ ଆଣ୍ଡ ହସ୍ପିଟାଲକୁ ଅଣାଯାଇ ଶବାଗାରରେ ରଖାଯାଇଥିଲା। ବୁଧବାର ପୂର୍ବାହ୍ନରେ ବୁର୍ଲା ଭିମ୍ସାର ମେଡିକାଲ କଲେଜ ଏଫ୍ଏମ୍ଟି ପ୍ରଫେସର ସତ୍ୟସାଇ ପଣ୍ଡା, ଆସିଣ୍ଟାଣ୍ଟ ପ୍ରଫେସର ବୀରେନ୍ ଖାଲ୍କୋ ଏବଂ ଭୀମ ଭୋଇ ମେଡିକାଲ କଲେଜ ହସ୍ପିଟାଲ ଏଫ୍ଏମ୍ଟି ବିଭାଗ ଡାକ୍ତର ସୁବଳ ନାଏକ ବ୍ୟବଚ୍ଛେଦ କରିଥିଲେ। ଜାତୀୟ ମାନବାଧିକାର କମିଶନ(ଏନ୍ଏଚ୍ଆର୍ସି)ଙ୍କ ନିର୍ଦ୍ଦେଶ ଏବଂ ଗାଇଡଲାଇନ୍ ମୁତାବକ୍ ମାଜିଷ୍ଟ୍ରେଟ୍ଙ୍କ ଉପସ୍ଥିତିରେ ବ୍ୟବଚ୍ଛେଦ କରାଯାଇଛି। ସମଗ୍ର ପ୍ରକ୍ରିୟାକୁ ଭିଡିଓ ରେକର୍ଡିଂ କରାଯାଇଛି। ଗୋବିନ୍ଦଙ୍କ କାକା ଶ୍ୱଶୁର ମହେନ୍ଦ୍ର ସାହୁ ଏବଂ ତାଙ୍କ ଶଳା ଟୁନା ସାହୁ ବ୍ୟବଚ୍ଛେଦ ଗୃହ ବାହାରେ ଉପସ୍ଥିତ ଥିଲେ। ମହେନ୍ଦ୍ର କହିଛନ୍ତି, ଗୋବିନ୍ଦଙ୍କ ଆତ୍ମହତ୍ୟା ବିଶ୍ୱାସଯୋଗ୍ୟ ନୁହେଁ। ସେ ଜଣେ ଷ୍ଟ୍ରଙ୍ଗ୍ ଲୋକ। ମମିତା ମେହେର ହତ୍ୟା ଘଟଣା ଏକ ସମ୍ବେଦନଶୀଳ ଘଟଣା ହୋଇଥିବାରୁ ତାଙ୍କୁ ମାରି ଦିଆଯାଇଥିବା ସନ୍ଦେହ ହେଉଛି ବୋଲି ସେ କହିଛନ୍ତି। ୪ ଘଣ୍ଟା ଧରି ବ୍ୟବଚ୍ଛେଦ ପ୍ରକ୍ରିୟା ଚାଲିବା ପରେ ମୃତଦେହକୁ ଗୋବିନ୍ଦଙ୍କ ସମ୍ପର୍କୀୟଙ୍କୁ ଦେବାକୁ ପୋଲିସ ଚାହିଁଥିଲା। ମାତ୍ର ଏହାକୁ ଗ୍ରହଣ କରିବାକୁ ମହେନ୍ଦ୍ର ଏବଂ ଶଳା ଟୁନା ମନା କରିଦେଇଥିଲେ। ଏହାପରେ ଗୋବିନ୍ଦଙ୍କ ଝିଅ ଲିପିକା ସାହୁ ଭୀମ ଭୋଇ ମେଡିକାଲ ଆସି ମୃତଦେହ ଗ୍ରହଣ କରି ମହାଲିଙ୍ଗ ଗଁାକୁ ନେଇଥିଲେ।
