ଭୁବନେଶ୍ୱର,୧୪।୨(ବ୍ୟୁରୋ): ରାଜ୍ୟରେ ସ୍କୁଲ୍ଗୁଡ଼ିକ ପର୍ଯ୍ୟାୟକ୍ରମେ ଖୋଲୁଛି। ଅଷ୍ଟମରୁ ଦ୍ୱାଦଶ ପାଠପଢ଼ା ଆରମ୍ଭ ହୋଇଛି। ସେହିଭଳି ସୋମବାରଠାରୁ ପ୍ରଥମରୁ ସପ୍ତମ ଶ୍ରେଣୀ ପର୍ଯ୍ୟନ୍ତ ସ୍କୁଲ ଖୋଲୁଥିଲେ ମଧ୍ୟ ପାଠପଢ଼ା ୨୮ରୁ ଆରମ୍ଭ ହେବ। ସେ ପର୍ଯ୍ୟନ୍ତ ଅନ୍ଲାଇନ୍ରେ କ୍ଲାସ୍ ଚାଲୁଥିବ। ତେବେ ସ୍କୁଲ୍ ଖୋଲିବା ପରେ ବି କାହାକୁ ଅଫ୍ଲାଇନ୍ କ୍ଲାସ୍ ପାଇଁ ବାଧ୍ୟ କରାଯିବ ନାହିଁ। ଅନ୍ୟପକ୍ଷରେ କ୍ଲାସ୍ ପ୍ରମୋଶନ ପରୀକ୍ଷା ଅନ୍ଲାଇନ୍ ନା ଅଫ୍ଲାଇନ୍ରେ ହେବ, ତାହାକୁ ନେଇ ଛାତ୍ରୀଛାତ୍ର, ଅଭିଭାବକ ଓ ଶିକ୍ଷକମାନେ ଦ୍ୱନ୍ଦ୍ୱରେ ଥିବାବେଳେ ବିଦ୍ୟାଳୟ ଓ ଗଣଶିକ୍ଷା ବିଭାଗ ପକ୍ଷରୁ ଏନେଇ ସ୍ପଷ୍ଟ କରାଯାଇଛି। ବିଭାଗରୁ ମିଳିଥିବା ସୂଚନାନୁସାରେ, ରାଜ୍ୟରେ ସମସ୍ତ ସରକାରୀ ସ୍କୁଲ, ଘରୋଇ, ସ୍ବିକୃତୀପ୍ରାପ୍ତ ସ୍କୁଲରେ ଅଫ୍ଲାଇନ୍ ପରୀକ୍ଷା ଲାଗି କେହି ପିଲାଙ୍କୁ ବାଧ୍ୟ କରିବେ ନାହିଁ। ପରୀକ୍ଷା ଲାଗି ଉଭୟ ଅଫ୍ଲାଇନ୍ ଏବଂ ଅନ୍ଲାଇନ୍ ବ୍ୟବସ୍ଥା କରାଯିବ। ଯେଉଁ ଅଭିଭାବକମାନେ ଚାହିଁବେ ସେମାନଙ୍କ ପିଲାମାନେ ସ୍କୁଲରେ ଆସି ପରୀକ୍ଷା ଦେଇପାରିବେ। ଯେଉଁ ଛାତ୍ରୀଛାତ୍ରମାନେ ସ୍କୁଲ ଆସିବେ ନାହିଁ ସେମାନଙ୍କ ଲାଗି ଅନ୍ଲାଇନ୍ରେ ପ୍ରଶ୍ନପତ୍ର ପଠାଇ ପରୀକ୍ଷା କରାଯିବ। ଯଦି କୌଣସି ସ୍କୁଲ କର୍ତ୍ତୃପକ୍ଷ ପରୀକ୍ଷା ଲାଗି କେବଳ ଅଫ୍ଲାଇନ୍ ବ୍ୟବସ୍ଥା କରନ୍ତି, ତେବେ ସମ୍ପୃକ୍ତ ସ୍କୁଲ କର୍ତ୍ତୃପକ୍ଷଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ଜଣାପଡ଼ିଛି।
ଶିକ୍ଷାଦାନ ସହ ସମସ୍ତ ପରୀକ୍ଷା ପରିଚାଳନାରେ ସ୍ବଚ୍ଛତା ଆଣିବାକୁ ଗଣଶିକ୍ଷା ବିଭାଗ ପକ୍ଷରୁ ନିର୍ଦ୍ଦେଶ ଦିଆଯାଇଛି। ପ୍ରଥମରୁ ଅଷ୍ଟମ ପର୍ଯ୍ୟନ୍ତ ସମସ୍ତ ଷାଣ୍ମାସିକ ଓ ବାର୍ଷିକ ପରୀକ୍ଷା ଅଫ୍ଲାଇନ୍ ସହ ଅନ୍ଲାଇନ୍ରେ କରିବାକୁ ବ୍ୟବସ୍ଥା କରାଯାଇଛି। ସବୁ ଶ୍ରେଣୀର ବାର୍ଷିକ ରେଜଲ୍ଟ ପ୍ରକାଶ ପାଇବା ପରେ ଜିଲାୱାରୀ ସବୁ ପିଲାଙ୍କ ମାର୍କ ୱେବ୍ସାଇଟ୍ରେ ଅପ୍ଲୋଡ୍ କରାଯିବ। ଫଳରେ ଏଣିକି ସମସ୍ତ ଛାତ୍ରୀଛାତ୍ରଙ୍କ ରେଜଲ୍ଟକୁ ସରକାର ସମୀକ୍ଷା କରିପାରିବେ। ପରୀକ୍ଷା ଶେଷ ହେବା ପରେ ରେଜଲ୍ଟ ମଧ୍ୟ ଅଫ୍ଲାଇନ୍ ଓ ଅନ୍ଲାଇନ୍ରେ ଉପଲବ୍ଧ ହେବ। ରେଜଲ୍ଟ କାର୍ଡ ଅଭିଭାବକଙ୍କୁ ଦିଆଯିବ। ଯେଉଁ ଅଭିଭାବକମାନେ କାର୍ଡ ନେଇ ନ ପାରିବେ ସେମାନଙ୍କୁ ରେଜଲ୍ଟର ଫଟୋ କପି ହ୍ବାଟ୍ସଆପ୍ କିମ୍ବା ମେଲ୍ରେ ଯୋଗାଇ ଦିଆଯିବ। ସେହିପରି ଯେଉଁ ସ୍କୁଲରେ କୋର୍ସ ଶେଷ ହୋଇପାରି ନାହିଁ, ସମ୍ପୃକ୍ତ ସ୍କୁଲର ଶିକ୍ଷକମାନେ ନିୟମିତ ଅଫ୍ଲାଇନ୍ କିମ୍ବା ଅନ୍ଲାଇନ୍ରେ ଶିକ୍ଷାଦାନ କରିବା ସହ ଡାଉଟ୍ କ୍ଲିୟର କ୍ଲାସ୍ ମଧ୍ୟ କରିବେ। ଯେଉଁ ଛାତ୍ରୀଛାତ୍ରଙ୍କ ଅନ୍ଲାଇନ୍ କ୍ଲାସ କରିବାକୁ ସମସ୍ୟା ରହିଛି, ହେଲେ ସେମାନେ ସ୍କୁଲ ଆସିପାରୁନାହାନ୍ତି, ସେହି ପିଲାଙ୍କ ଲାଗି ସ୍ବତନ୍ତ୍ର ବ୍ୟବସ୍ଥା କରିବାକୁ ସମ୍ପୃକ୍ତ ସ୍କୁଲର ପ୍ରଧାନ ଶିକ୍ଷକ ଏବଂ ଶ୍ରେଣୀ ଶିକ୍ଷକ ଉଦ୍ୟମ କରିବାକୁ ବିଭାଗ ପକ୍ଷରୁ ପରାମର୍ଶ ଦିଆଯାଇଛି।
