ନୂଆଦିଲ୍ଲୀ,୯।୧୧: ହରିୟାଣାର ଗୁରୁଗ୍ରାମରେ ଏକ ଆଶ୍ଚର୍ଯ୍ୟଜନକ ଘଟଣା ସାମ୍ନାକୁ ଆସିଛି। ଏଠାରେ ଦୁଇଜଣ ନାବାଳକ ସେମାନଙ୍କର ୧୧ଶ ଶ୍ରେଣୀର ସହପାଠୀଙ୍କୁ ରାତ୍ରିଭୋଜନ ପାଇଁ ଡାକିବା ପରେ ତାଙ୍କୁ ଗୁଳି କରିଛନ୍ତି।
ଗୁରୁବାର ବିଳମ୍ବିତ ରାତିରେ ସେକ୍ଟର-୪୮ରେ ଏହି ଘଟଣା ଘଟିଥିଲା। ପୋଲିସ ନିୟନ୍ତ୍ରଣ କକ୍ଷରୁ ସୂଚନା ପାଇବା ପରେ ଘଟଣାସ୍ଥଳରେ ପହଞ୍ଚିଥିଲା। ତେବେ ପୀଡିତଙ୍କୁ ତାଙ୍କ ପରିବାର ଲୋକେ ଡାକ୍ତରଖାନା ନେଇସାରିଥିଲେ। ତଦନ୍ତ ସମୟରେ ପୋଲିସ ଘଟଣାସ୍ଥଳରୁ ଗୋଟିଏ ପିସ୍ତଲ, ଗୋଟିଏ ମାଗାଜିନ୍, ପାଞ୍ଚଟି ଜୀବନ୍ତ କାର୍ଟ୍ରିଜ୍ ଏବଂ ଗୋଟିଏ ଖାଲି କାର୍ଟ୍ରିଜ୍ ଜବତ କରିଛି। ଅଭିଯୁକ୍ତର ରୁମ୍ରୁ ମଧ୍ୟ ଅଧିକ ୬୫ଟି ଜୀବନ୍ତ କାର୍ଟ୍ରିଜ୍ ମିଳିଛି। ଘଟଣାର କିଛି ଘଣ୍ଟା ମଧ୍ୟରେ ପୋଲିସ ଦୁଇଜଣ ଅଭିଯୁକ୍ତ ନାବାଳକଙ୍କୁ ଗିରଫ କରିଛି।
ପୀଡିତଙ୍କ ମା’ଙ୍କ ଲିଖିତ ଅଭିଯୋଗ ଅନୁଯାୟୀ, ତାଙ୍କ ପୁଅକୁ ତା’ର ଜଣେ ସାଙ୍ଗ ଫୋନ୍ କରି ଦେଖା କରିବାକୁ ଡାକିଥିଲା। ପରେ ଅଭିଯୁକ୍ତର ଭଡ଼ା ଘରେ ଗୁଳିକାଣ୍ଡ ଘଟିଥିଲା। ପୋଲିସର ପ୍ରାରମ୍ଭିକ ଜେରା ବେଳେ ଜଣାପଡ଼ିଛି ଯେ ଦୁଇ ମାସ ପୂର୍ବରୁ ଉଭୟଙ୍କ ମଧ୍ୟରେ ହୋଇଥିବା ପୁରୁଣା ଝଗଡ଼ାର ପ୍ରତିଶୋଧ ନେବା ପାଇଁ ଏହି ଆକ୍ରମଣ କରାଯାଇଥିଲା ଏବଂ ଏହା ଏକ ପୂର୍ବ ଯୋଜନାବଦ୍ଧ ଷଡ଼ଯନ୍ତ୍ର ଥିଲା।
ଆକ୍ରମଣରେ ବ୍ୟବହୃତ ହୋଇଥିବା ପିସ୍ତଲ୍ଟି ଅଭିଯୁକ୍ତ ନାବାଳକମାନଙ୍କ ମଧ୍ୟରୁ ଜଣକର ପେସାଦାର ପ୍ରପର୍ଟି ଡିଲର ବାପାଙ୍କର ଲାଇସେନ୍ସପ୍ରାପ୍ତ ବନ୍ଧୁକ ଥିଲା। ପୋଲିସ ଏହି ଘଟଣାର ଅଧିକ ତଦନ୍ତ ଜାରି ରଖିଛି ଏବଂ ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରାଯାଉଛି।
