ନୂଆଦିଲ୍ଲୀ, ୨୧ା୩(ପି.ଟି.): ଅବସରପ୍ରାପ୍ତ ସେନା କର୍ମଚାରୀମାନଙ୍କ ଓ୍ବାନ୍ ର଼୍ୟାଙ୍କ୍ ଓ୍ବାନ୍ ପେନ୍ସନ(ଓଆର୍ଓପି)ର ବକେୟା ପ୍ରାପ୍ୟ ପୈଠ କରିବା ଲାଗି ସର୍ବୋଚ୍ଚ ଅଦାଲତ ପୂର୍ବରୁ ଦେଇଥିବା ରାୟକୁ ଅନୁପାଳନ କରିବା ଲାଗି କେନ୍ଦ୍ର ସରକାର ବାଧ୍ୟ ବୋଲି ପ୍ରଧାନ ବିଚାରପତି ଡି.ଓ୍ବାଇ. ଚନ୍ଦ୍ରଚୂଡ଼ଙ୍କ ଅଧ୍ୟକ୍ଷତାରେ ଗଠିତ ଖଣ୍ଡପୀଠ କହିଛନ୍ତି। ୨୦୧୯ରୁ ୨୦୨୨ମଧ୍ୟରେ ସେମାନଙ୍କ ବକେୟା ରହିଥିବା ୨୮,୦୦୦ କୋଟି ଟଙ୍କା ପେନ୍ସନ ରାଶି ଆସନ୍ତାବର୍ଷ ଫେବୃୟାରୀ ସୁଦ୍ଧା ପୈଠ କରିବାକୁ ଖଣ୍ଡପୀଠ ନିର୍ଦ୍ଦେଶ ଦେଇଛନ୍ତି। ଏଥିସହିତ ଓଆର୍ଓପି ଦେୟ ପ୍ରସଙ୍ଗରେ କେନ୍ଦ୍ର ଜଉମୁଦ ଲଫାପାରେ ଦାଖଲ କରିଥିବା ନୋଟ୍କୁ ସିଜେଆଇ ଗ୍ରହଣ କରିବାକୁ ମନା କରିଦେଇଛନ୍ତି। ଗୋପନରେ ରିପୋର୍ଟ ଦାଖଲ ନ କରି ଏହାକୁ ଅଦାଲତରେ ପଢ଼ ନଚେତ୍ ଫେରାଇନିଅ ବୋଲି ସିଜେଆଇ ଆଟର୍ନି ଜେନେରାଲ ଆର୍. ଭେଙ୍କଟରମଣୀଙ୍କୁ କହିଥିଲେ। ସୁପ୍ରିମକୋର୍ଟରେ ଜଉମୁଦ ଲଫାପା ଧାରା ବନ୍ଦ ହେବା ଆବଶ୍ୟକ। ଏହା ମୂଳତଃ ନିରପେକ୍ଷ ନ୍ୟାୟ ପ୍ରକ୍ରିୟାର ପରିପନ୍ଥୀ ବୋଲି ସିଜେଆଇ କହିଛନ୍ତି। ବ୍ୟକ୍ତିଗତ ଭାବେ ସେ ସିଲ୍ଡ କଭରର ବା ଜଉମୁଦ ଲଫାପାର ବିରୋଧୀ। କୋର୍ଟରେ ସବୁକିଛି ସ୍ବଚ୍ଛ ହେବା ଆବଶ୍ୟକ। ନିର୍ଦ୍ଦେଶ କାର୍ଯ୍ୟକାରିତାରେ ଗୋପନୀୟତା କ’ଣ ବୋଲି ସିଜେଆଇ ପ୍ରଶ୍ନ କରିଥିଲେ। ତେବେ ଯଦି କୌଣସି ତଥ୍ୟ ବା ରିପୋର୍ଟ କାହାର ବ୍ୟକ୍ତିଗତ ଜୀବନ ପ୍ରତି ଭୟ ଥିବ, ସେଠାରେ ଏହାକୁ ଗୋପନୀୟ ରଖାଯାଇପାରେ ବୋଲି ଜଷ୍ଟିସ୍ ଚନ୍ଦ୍ରଚୂଡ କହିଛନ୍ତି। ଖଣ୍ଡପୀଠରେ ଜଷ୍ଟିସ୍ ପି.ଏସ୍. ନରସିଂ ଏବଂ ଜେ.ବି. ପର୍ଡିଓ୍ବାଲା ରହିଛନ୍ତି।
ଖଣ୍ଡପୀଠ କହିଥିଲେ, ସୈନ୍ୟବାହିନୀର ୨୫ ଲକ୍ଷ ପେନ୍ସନଭୋଗୀଙ୍କ ମଧ୍ୟରୁ ୪ ଲକ୍ଷ ଓଆର୍ଓପି ଯୋଜନାରେ ଆସୁନାହାନ୍ତି। କାରଣ ସେମାନେ ବର୍ଦ୍ଧିତ ପେନ୍ସନ ପାଉଛନ୍ତି। ୬ ଲକ୍ଷ ଫାମିଲି ପେନ୍ସନର ଏବଂ ବୀରତା ପୁରସ୍କାର ବିଜେତାଙ୍କୁ ଆସନ୍ତା ଏପ୍ରିଲ ୩୦ ସୁଦ୍ଧା ଓଆର୍ଓପି ପ୍ରାପ୍ୟ ପୈଠ କରିବାକୁ ଖଣ୍ଡପୀଠ ନିର୍ଦ୍ଦେଶ ଦେଇଥିଲେ। ୭୦ ବର୍ଷ କିମ୍ବା ତଦୂର୍ଦ୍ଧ୍ୱ ବୟସର ୪ରୁ ୫ ଲକ୍ଷ ଅବସରପ୍ରାପ୍ତ ସେନା କର୍ମଚାରୀଙ୍କୁ ଜୁନ୍ ୩୦ ସୁଦ୍ଧା ଗୋଟିଏ କିମ୍ବା ଦୁଇଟି କିସ୍ତିରେ ବକେୟା ଓଆର୍ଓପି ପୈଠ କରିବାକୁ କୁହାଯାଇଛି। ଅବଶିଷ୍ଟ ୧୦ରୁ ୧୧ ଲକ୍ଷ ପେନ୍ସନଧାରୀଙ୍କୁ ଆସନ୍ତା ବର୍ଷ ଫେବୃୟାରୀ ୨୮ ସୁଦ୍ଧା ୩ଟି ସମାନ କିସ୍ତିରେ ବକେୟା ପେନ୍ସନ ପ୍ରଦାନ କରିବା ଲାଗି ଖଣ୍ଡପୀଠ ନିର୍ଦ୍ଦେଶ ଦେଇଛନ୍ତି।
