କାଳିଆପାଣି, ୩୧।୭ (ଡି.ଏନ୍.ଏ.) ଯାଜପୁର ଜିଲା ସୁକିନ୍ଦା ଖଣି ଅଞ୍ଚଳର ଟମକା-ମଙ୍ଗଳପୁର ରାସ୍ତା ଏବେ ମରଣଯନ୍ତା ପାଲଟିଛି। ଏହି ରାସ୍ତାରେ ପ୍ରତିଦିନ ଏକାଧିକ ଛୋଟ ବଡ଼ ଦୁର୍ଘଟଣା ଘଟୁଥିବା ବେଳେ କରୋନା ପାଇଁ ଅନେକଙ୍କୁ ଠିକ୍ ଭାବେ ଚିକିତ୍ସା ମିଳିପାରୁନି। ଏହାକୁ ନେଇ ସ୍ଥାନୀୟ ଅଞ୍ଚଳରେ ଅସନ୍ତୋଷ ପ୍ରକାଶ ପାଇଛି। ଏହି ରାସ୍ତା ତୁରନ୍ତ ମରାମତି କରା ନ ଗଲେ ଆଗାମୀ ଦିନରେ ଅଞ୍ଚଳବାସୀ ଆନ୍ଦୋଳନ କରିବା ସହ ଖଣି ଅଞ୍ଚଳରୁ କ୍ରୋମାଇଟ୍ ପରିବହନ ବନ୍ଦ କରିଦିଆଯିବ ବୋଲି ସୁକିନ୍ଦା ଭାଜପା ଯୁବନେତା ଦିଲ୍ଲୀପ କୁମାର ପାତ୍ର, ଲମ୍ବୋଦର ମହାନ୍ତ, ସ୍ଥାନୀୟ ବଣିକ ସଂଘ ଓ ଟ୍ରକ ମାଲିକମାନେ ଚେତାବନୀ ଦେଇଛନ୍ତି।
ପ୍ରକାଶ ଯେ, କ୍ରୋମାଇଟ୍ ପରିବହନ ପାଇଁ ଟମକା-ମଙ୍ଗଳପୁର ରାସ୍ତା ଦେଇ ପ୍ରତିଦିନ ହଜାର ହଜାର ଟ୍ରକ ଯା’ଆସ କରୁଛି। ରାସ୍ତା ବିଭିନ୍ନ ସ୍ଥାନରେ ଦୁଇ ତିନି ଫୁଟର ବିରାଟ ଖାଲ ସୃଷ୍ଟି ହୋଇଛି। ଫଳରେ ଅନେକ ସମୟରେ ଏହି ରାସ୍ତାରେ ଦୁର୍ଘଟଣା ଘଟି ଲୋକମାନେ ମୃତାହତ ହେଉଥିବା ନଜିର ରହିଛି। ରାସ୍ତା ଅବସ୍ଥା ଅତି ଶୋଚନୀୟ ହୋଇ ପଡ଼ିଥିବାରୁ ଯାତ୍ରୀବାହୀ ଗାଡ଼ି ଯିବାଆସିବାରେ ଅସୁବିଧା ହେଉଥିବା ବେଳେ ଆମ୍ବୁଲାନ୍ସରେ ରୋଗୀ ଯିବା ବେଳେ ବହୁ ହୀନସ୍ତା ଭୋଗୁଛନ୍ତି। ଅନ୍ୟପଟେ ରାସ୍ତାରେ ଖାଲଖମା ଯୋଗୁ ବର୍ଷାପାଣି ଜମି ରହିବା ଫଳରେ ଗାଡ଼ିମୋଟର ଯିବା ଆସିବା ବେଳେ ଖାଲରେ ପଡ଼ି ଚାଳକମାନେ ଖଣ୍ଡିଆଖାବରା ହେଉଛନ୍ତି। ଖଣି ଅଞ୍ଚଳର ରାସ୍ତା, ଶିକ୍ଷା, ପାନୀୟଜଳ ଆଦିର ବ୍ୟବସ୍ଥା ପାଇଁ ଡିଏମ୍ଏଫ୍ (ଜିଲା ଖଣିଜ ପାଣ୍ଠି)ରୁ ଖର୍ଚ୍ଚ କରାଯିବା କଥା। ମାତ୍ର ତାହା କରାଯାଉନାହିଁ। ଏ ନେଇ ଅଞ୍ଚଳବାସୀ ଜିଲା ପ୍ରଶାସନ ଓ ସ୍ଥାନୀୟ ଲୋକ ପ୍ରତିନିଧିଙ୍କ ଦୃଷ୍ଟି ଆକର୍ଷଣ କରିଥିଲେ ବି ରାସ୍ତା ମରାମତି ବା ପୁନଃନିର୍ମାଣ କରାଯାଉ ନ ଥିବାରୁ ଅଞ୍ଚଳବାସୀ କ୍ଷୋଭ ପ୍ରକାଶ କରିଛନ୍ତି।
ସୂଚନାଥାଉ କି, ୨୦୧୭ ଫେବୃୟାରୀରେ ଟମକା-ମଙ୍ଗଳପୁର ଚାରିଥାକିଆ ରାସ୍ତା ନିର୍ମାଣ ନିମନ୍ତେ ଭିତ୍ତିପ୍ରସ୍ତର ସ୍ଥାପନ କରାଯାଇଥିଲା। ଚାରିଥାକିଆ ରାସ୍ତା ପାଇଁ ୨ ଥର ଟେଣ୍ଡର ହୋଇଥିଲେ ମଧ୍ୟ ତାହା କାର୍ଯ୍ୟକାରୀ ହୋଇପାରୁନି। କେଉଁ କାରଣରୁ ରାସ୍ତା ନିର୍ମାଣ ଅଟକି ରହିଛି, ସେ ନେଇ ସାଧାରଣରେ ପ୍ରଶ୍ନବାଚୀ ସୃଷ୍ଟି ହୋଇଛି। ଏ ସମ୍ପର୍କରେ ଆର୍ଆଣ୍ଡବି ଏସ୍ଡିଓ ମନୋଜ ମହାପାତ୍ରଙ୍କୁ ପଚାରିବାରେ କ’ଣ ହୋଇଛି ମୁଁ କହିପାରିବି ନାହିଁ ବୋଲି କହିଛନ୍ତି।
