ପୁରୁଣାକଟକ,୩୧ା୧୨(ଡି.ଏନ୍.ଏ.): ବୌଦ୍ଧ ଜିଲା ହରଭଙ୍ଗା ବ୍ଲକ ରାମଗଡ଼ ପଞ୍ଚାୟତ କୋଇଲିସୁତା ଗ୍ରାମର ଯୁବ ଚାଷୀ ରଶ୍ମି ରଞ୍ଜନ ବାଘ(୩୫)। ବର୍ତ୍ତମାନ ସେ ଚାକିରି ଛାଡି ଚାଷ କାର୍ଯ୍ୟ କରି ଆର୍ଥତ୍କ ସ୍ବାବଲମ୍ବୀ ହେବା ସହ ଅନ୍ୟମାନଙ୍କ ପାଇଁ ପ୍ରେରଣା ସାଜିଛନ୍ତି। ଆଧୁନିକ ପ୍ରଣାଳୀରେ କଲରା ଚାଷ ସାଙ୍ଗକୁ ଅନ୍ୟାନ୍ୟ ପରିବା ଚାଷ କରି ଲାଭବାନ ହୋଇ ପାରିଥିବା ରଶ୍ମି ପ୍ରକାଶ କରିଛନ୍ତି ।
ପାଠପଢା ଶେଷ ପରେ ରଶ୍ମି ବରଗଡ଼ ଜିଲାର ଏକ ବିହନ କେନ୍ଦ୍ରରେ ଆକାଉଣ୍ଟାଣ୍ଟ ଭାବେ ୨୦୦୭ରୁ ୨୦୧୪ ପର୍ଯ୍ୟନ୍ତ କାମ କରିଥିଲେ। ସେତିକିବେଳେ ସେ ବିଭିନ୍ନ କମ୍ପାନୀର ବିହନ ସମ୍ପର୍କରେ ଜାଣିବାକୁ ପାଇଥିଲେ । ପରେ ଚାଷ ପ୍ରତି ତାଙ୍କର ମନ ବଳିଥିଲା। ସେ ଚାକିରି ଛାଡି ଗାଁକୁ ଆସି ଚାଷ କାର୍ଯ୍ୟ କରିଥିଲେ। କିଛି ରୋଜଗାର ଆଶା ନେଇ ଥିବା ୧ ଏକର ଜମିରେ ଉଦ୍ୟାନ ବିଭାଗ ସହଯୋଗରେ ମହାତ୍ମାଗାନ୍ଧୀ ଜାତୀୟ ଗ୍ରାମୀଣ ନିଶ୍ଚିତ କର୍ମନିଯୁକ୍ତି ଯୋଜନାରେ ଆମ୍ବ ଗଛ ଲଗାଇଥିଲେ। ଏପରି କି ଅନ୍ୟ ଜମିରେ ଲଙ୍କା, କଲରା, ମାଖନ, ରସୁଣ, ଝୁଡଙ୍ଗ, କଦଳୀ ଚାଷ କରିଥିଲେ। କୋଭିଡ୍ ସହାୟତା ବାବଦରେ ଉଦ୍ୟାନ ବିଭାଗ ପକ୍ଷରୁ ୨୦ମିଟର ଲମ୍ବ ୨୦ ମିଟର ପ୍ରସ୍ଥ ଜାଗାରେ ଧାଡିକିଆ କଲରା ଚାଷ ପାଇଁ ୧୨ହଜାର ୫ଶହ ଟଙ୍କା ସହାୟତା ପାଇଥିଲେ। ଏହି ଅର୍ଥରେ ସେ ଆଧୁନିକ ପ୍ରଣାଳୀରେ ପଲିଥିନ୍ ମଲଚିଙ୍ଗ୍ ସହ ବୁନ୍ଦା ଜଳସେଚନ ବ୍ୟବସ୍ଥା କରିଛନ୍ତି। କୀଟନାଶକ ପରିବର୍ତ୍ତେ ନିମ୍ବପତ୍ର, ଗୋବର, ଗୋମୂତ୍ର, ହଳଦୀ, ଅରଖପତ୍ରରେ ଜୌବିକ ଖତ ପ୍ରସ୍ତୁତ କରି ଚାଷ କାର୍ଯ୍ୟରେ ବ୍ୟବହାର କରୁଥିବା ରଶ୍ମି ପ୍ରକାଶ କରିଛନ୍ତି। ବର୍ତ୍ତମାନ ଅଳ୍ପ ଜାଗାରେ ଉନ୍ନତ ଧରଣର କଲରା ଚାଷ କରି ସପ୍ତାହକୁ ୪୫ରୁ ୫୦ କେଜି ଆଦାୟ କରୁଥିବା ସେ କହିଛନ୍ତି। ଆଗାମୀ ଦିନରେ ଆଧୁନିକ ପ୍ରଣାଳୀରେ ଅଧିକ ଜମିରେ କଲରା ଚାଷ କରିବାର ଲକ୍ଷ୍ୟ ରଖିବା ସହ ବିଭିନ୍ନ ଧରଣର ପନିପରିବା ଚାଷ କରି ଅଧିକ ରୋଜଗାର କରିବାକୁ ପୁରା ଦମ୍ରେ ଲାଗି ପଡିଛନ୍ତି ଯୁବଚାଷୀ ରଶ୍ମି।
