ତାମିଲନାଡ଼ୁର ରାମନାଥପୁରମ୍ ଜିଲାରେ ଥିବା ଚିତ୍ରାଙ୍ଗୁଡ଼ି ପକ୍ଷୀ ଅଭୟାରଣ୍ୟ ହେଉଛି ଏକ ଲୋକପ୍ରିୟ ପର୍ଯ୍ୟଟନସ୍ଥଳୀ। ସ୍ଥାନୀୟ ଲୋକଙ୍କ ଭାଷାରେ ଏହା ଚିତ୍ରାଙ୍ଗୁଡ଼ି କାନ୍ମୋଲି ନାମରେ ପରିଚିତ। ପ୍ରାକୃତିକ ସୌନ୍ଦର୍ଯ୍ୟରେ ପରିପୂର୍ଣ୍ଣ ଏହି ଅଭୟାରଣ୍ୟଟିର ଶାନ୍ତ ପରିବେଶ ପ୍ରକୃତିପ୍ରେମୀଙ୍କ ପାଇଁ ଏକ ଉପଯୁକ୍ତ ସ୍ଥାନ…
କ’ଣ ଦେଖିବେ
ସୂଚନାନୁଯାୟୀ, ୧୯୮୯ ମସିହାରେ ପ୍ରାୟ .୪୭୬୩ ବର୍ଗ କି.ମି. ପରିସୀମାବ୍ୟାପ୍ତ ଅଞ୍ଚଳକୁ ନେଇ ଏଠାରେ ଏହି ଅଭୟାରଣ୍ୟଟି ପ୍ରଥମେ ଗଢି ଉଠିଥିଲା। ସମୟକ୍ରମେ ଏହି ଅଭୟାରଣ୍ୟଟିକୁ ଲୋକପ୍ରିୟ କରିବା ପାଇଁ ଅନେକ ଉନ୍ନତି ମୂଳକ କାର୍ଯ୍ୟ କରାଗଲା। ଯଦ୍ଦ୍ବାରା ଧୀରେ ଧୀରେ ଏଠାରେ ପକ୍ଷୀଙ୍କ ସଂଖ୍ୟା ବୃଦ୍ଧି ପାଇଲା। ବିଶେଷକରି ଏଠାରେ ଦେଖିବାକୁ ମିଳୁଥିବା ବବୁଲ୍ ନାମକ ଏକ ଗଛର ସୌନ୍ଦର୍ଯ୍ୟରେ ଆକର୍ଷିତ ହୋଇ ଅନେକ ଭ୍ରମଣକାରୀ ପକ୍ଷୀ ଏଠାକୁ ଆସିବାକୁ ଲାଗିଲେ। କୁହାଯାଏ, ଏହି ଅଭୟାରଣ୍ୟରେ ପ୍ରାୟ ୭୦ରୁ ଊର୍ଦ୍ଧ୍ୱ ପ୍ରଜାତିର ପକ୍ଷୀ ଦେଖିବାକୁ ମିଳିଥାନ୍ତି। ତନ୍ମଧ୍ୟରୁ ଅଧିକାଂଶ ହେଉଛନ୍ତି ଭ୍ରମଣକାରୀ। ଏଠାରେ ଦେଖିବାକୁ ମିଳୁଥିବା କେତୋଟି ପ୍ରମୁଖ ପକ୍ଷୀ ହେଲେ ସ୍ପଟ୍-ବିଲ୍ଡ ପେଲିକାନ୍, ଏସିଆନ୍ ଓପେନ୍ବିଲ୍ ଷ୍ଟର୍କ, ଗ୍ରେ ହେରନ୍, ପର୍ପଲ୍ ହେରନ୍, ପଣ୍ଡ୍ ହେରନ୍, ଲିଟିଲ୍ ଇଗ୍ରେଟ୍, ଗ୍ରେଟ୍ ଇଗ୍ରେଟ୍ ଇତ୍ୟାଦି । ତା’ଛଡ଼ା ନିକଟରେ ଚିତ୍ରାଙ୍ଗୁଡ଼ି ନାମକ ଏକ ଗାଁ ରହିଥିବାରୁ ସେଠାରେ ଥିବା ଶସ୍ୟକ୍ଷେତରୁ ପକ୍ଷୀମାନଙ୍କୁ ଖାଦ୍ୟ ଆରାମରେ ମିଳିଯାଇଥାଏ। ତେଣୁ ବହୁ ସଂଖ୍ୟାରେ ପକ୍ଷୀ ଏଠାକୁ ଆସିବାର ଏହା ମଧ୍ୟ ଅନ୍ୟ ଏକ କାରଣ ହୋଇପାରେ। ସେଥିପାଇଁ କେବଳ ପ୍ରକୃତିପ୍ରେମୀ ନୁହନ୍ତି, ପକ୍ଷୀପ୍ରେମୀଙ୍କ ପାଇଁ ମଧ୍ୟ ଏହା ଏକ ସ୍ବର୍ଗୀୟ ସ୍ଥାନ। ତେବେ ଏଠାରେ କେବଳ ପକ୍ଷୀ ନୁହନ୍ତି, ଅନେକ ବିରଳ ପ୍ରଜାତିର ପଶୁ ତଥା ସରିସୃପ ବି ଦେଖାଯାଇଥାନ୍ତି।
କେବେ ଯିବେ
ଏହି ଅଭୟାରଣ୍ୟକୁ ବର୍ଷର ଯେ କୌଣସି ସମୟରେ ଯିବାର ସୁବିଧା ଥିଲେ ହେଁ, ସ୍ଥାନୀୟ ପାଣିପାଗ ସୂଚନା କେନ୍ଦ୍ରର ମତାନୁଯାୟୀ, ନଭେମ୍ବରରୁ ମାର୍ଚ୍ଚ ହେଉଛି ଏଠାକୁ ଯିବା ପାଇଁ ସବୁଠୁ ଉପଯୁକ୍ତ ସମୟ। ପର୍ଯ୍ୟଟକଙ୍କ ଦେଖିବା ନିମନ୍ତେ ଉକ୍ତ ଅଭୟାରଣ୍ୟଟି ସକାଳ ୯ଟାରୁ ସନ୍ଧ୍ୟା ୫ଟା ଯାଏଁ ଖୋଲା ରହିଥାଏ। ସେହିପରି ବିଶ୍ରାମ ନେବା ପାଇଁ ଏଠାରେ ରେଷ୍ଟ ହାଉସ୍ର ମଧ୍ୟ ବ୍ୟବସ୍ଥା ରହିଛି।
କେମିତି ଯିବେ
ଏଠାକୁ ଯିବା ପାଇଁ ଗମନାଗମନର ବେଶ୍ ସୁବିଧା ରହିଛି। ମଦୁରାଇ ଏହାର ନିକଟତମ ବିମାନବନ୍ଦର ହୋଇଥିବାବେଳେ ପାରାମାକୁଡ଼ି ହେଉଛି ଏହାର ନିକଟତମ ରେଳଷ୍ଟେଶନ। ତା’ଛଡ଼ା ଦେଶର ବିଭିନ୍ନ ସ୍ଥାନରୁ ତାମିଲନାଡ଼ୁର ରାମନାଥପୁରମ୍ ଜିଲାକୁ ଟୁରିଷ୍ଟ ବସ୍ ବି ଯା’ଆସ କରିଥାଏ। ପର୍ଯ୍ୟଟକ ଚାହିଁଲେ ଟୁରିଷ୍ଟ ବସ୍ରେ ପ୍ରଥମେ ରାମନାଥପୁରମ୍ରେ ପହଁଞ୍ଚତ୍ ସେଠାରୁ ଟାଉନ୍ ବସ୍ ହେଉ ଅବା ଟ୍ୟାକ୍ସି ଦ୍ୱାରା ଉକ୍ତ ଅଭୟାରଣ୍ୟ ନିକଟରେ ପହଞ୍ଚତ୍ପାରିବେ।
ଜାଣିବା କଥା
ଏହି ଅଭୟାରଣ୍ୟ ମଧ୍ୟକୁ ପ୍ରବେଶ କରିବା ପୂର୍ବରୁ ପର୍ଯ୍ୟଟକଙ୍କୁ ଏଣ୍ଟ୍ରି ଟିକେଟ୍ କାଟିବାକୁ ହୋଇଥାଏ। କ୍ୟାମେରା ପ୍ରବେଶ ପାଇଁ ମଧ୍ୟ ଅଲଗା ଶୁଳ୍କ ଦେବାକୁ ପଡିଥାଏ।
