ଅମରପାଲି, ୧୮।୭(ପୀତାମ୍ବର ସାହୁ): ସୁବର୍ଣ୍ଣପୁର ଜିଲା ଉଲୁଣ୍ଡା ବ୍ଲକ ଅନ୍ତର୍ଗତ ମହଦା ଗ୍ରାମ ପଞ୍ଚାୟତର ତିକୁଡ଼ା ଗ୍ରାମର ପ୍ରତିଭାବାନ ଛାତ୍ର ଚିନ୍ମୟନନ୍ଦ ମିଶ୍ର ଚଳିତ ବର୍ଷର ନିଟ୍ (NEET-UG) ପ୍ରବେଶିକା ପରୀକ୍ଷାରେ ଉଲ୍ଲେଖନୀୟ ସଫଳତା ହାସଲ କରି ସମଗ୍ର ଅଞ୍ଚଳ ପାଇଁ ଗର୍ବର ବିଷୟ ପାଲଟିଛନ୍ତି। ସେ ମୋଟ ୭୨୦ ନମ୍ବରରୁ ୬୩୫ ନମ୍ବର ହାସଲ କରି ସର୍ବଭାରତୀୟ ସ୍ତରରେ ୨୮୭୨ ରାଙ୍କ୍ ରଖିଛନ୍ତି।
ଚିନ୍ମୟନନ୍ଦଙ୍କ ପିତା ବିଭୂତି ଭୂଷଣ ମିଶ୍ର ଜଣେ ଶିକ୍ଷକ ଏବଂ ମାତା ମୟୁକ୍ଷୀ ମିଶ୍ର ଜଣେ ଗୃହିଣୀ ଅଟନ୍ତି। ନିଜର ଦ୍ୱିତୀୟ ପ୍ରୟାସରେ ଏହି ବଡ଼ ସଫଳତା ପାଇବା ପାଇଁ ସେ ପ୍ରତିଦିନ ନିୟମିତ ଭାବେ ୭ରୁ ୮ ଘଣ୍ଟା ପଢ଼ାପଢ଼ି କରିବା ସହ ଅଦମ୍ୟ ପରିଶ୍ରମ କରିଥିଲେ। ଦୃଢ଼ ମନୋବଳ, ଅଧ୍ୟବସାୟ ଏବଂ ଏକାଗ୍ରତା ହିଁ ସଫଳତାର ମୂଳମନ୍ତ୍ର ବୋଲି ସେ ମତ ପ୍ରକାଶ କରିଛନ୍ତି। ସେ ତାଙ୍କର ଏହି କୃତିତ୍ୱ ପାଇଁ ନିଜ ମାତା-ପିତା, ଅଜା, ପରିବାର ସଦସ୍ୟ, ଶିକ୍ଷକ ଏବଂ ସାଙ୍ଗସାଥୀଙ୍କ ନିରନ୍ତର ପ୍ରେରଣା ଓ ସହଯୋଗକୁ ଶ୍ରେୟ ଦେଇଛନ୍ତି।
ଚିନ୍ମୟନନ୍ଦଙ୍କ ଶିକ୍ଷାଗତ ଯାତ୍ରା ଅତ୍ୟନ୍ତ ପ୍ରେରଣାଦାୟକ। ସେ ସୋନପୁରସ୍ଥିତ ଏକ ଘରୋଇ ବିଦ୍ୟାଳୟରୁ ପ୍ରାଥମିକ ଶିକ୍ଷା ସମାପ୍ତ କରିଥିଲେ। ଏହାପରେ ମାଟ୍ରିକ ପରୀକ୍ଷାରେ ୯୨.୬ ପ୍ରତିଶତ ନମ୍ବର ରଖି ଉତ୍ତୀର୍ଣ୍ଣ ହେବା ସହ ପରବର୍ତ୍ତୀ ସମୟରେ ବରଗଡ଼ର ଏକ ଘରୋଇ କଲେଜରୁ ଯୁକ୍ତ ଦୁଇ ବିଜ୍ଞାନରେ ୯୧.୪ ପ୍ରତିଶତ ନମ୍ବର ସହ କୃତକାର୍ଯ୍ୟ ହୋଇଥିଲେ।
ତାଙ୍କର ଏହି ସଫଳତାକୁ ନେଇ ସ୍ଥାନୀୟ ଅଞ୍ଚଳରେ ଖୁସିର ଲହରୀ ଖେଳିଯାଇଛି। ବିଭିନ୍ନ ସାମାଜିକ ସଂଗଠନ, ଶିକ୍ଷାନୁଷ୍ଠାନ ଓ ବୁଦ୍ଧିଜୀବୀ ମହଲରୁ ତାଙ୍କୁ ଶୁଭେଚ୍ଛା ଓ ଅଭିନନ୍ଦନର ସୁଅ ଛୁଟିଛି।