ବେଜିଂ, ୨୪ା୮: ଫସଲକୁ ସାଂଘାତିକ ରୋଗ ଏବଂ ଜୀବାଣୁ, ଭୂତାଣୁ ଓ କବକ ଆକ୍ରମଣରୁ ରକ୍ଷା କରିବା ପାଇଁ ଚାଇନା ଗବେଷକମାନେ କୃତ୍ରିମ ପ୍ରତିରୋଧକ ବ୍ୟବସ୍ଥା ବିକଶିତ କରିଛନ୍ତି। ଏଆଇ ସହାୟତାରେ ପ୍ରସ୍ତୁତ ଏହି ପ୍ଲାଟ୍ଫର୍ମ ଦ୍ୱାରା ମାତ୍ର କେଇ ସପ୍ତାହ ମଧ୍ୟରେ ସ୍ବେଚ୍ଛାକୃତ ପ୍ରତିରୋଧକ ରିସେପ୍ଟର ତିଆରି କରାଯାଇପାରିବ, ଯାହା ନୂତନ ରୋଗକାରକକୁ ଚିହ୍ନଟ କରି ତୁରନ୍ତ ନଷ୍ଟ କରିବାରେ ସାହାଯ୍ୟ କରିବ।
ଚାଇନିଜ୍ ଏକାଡେମୀ ଅଫ୍ ସାଇନ୍ସେସ୍ ‘ଇନ୍ଷ୍ଟିଚ୍ୟୁଟ୍ ଅଫ୍ ଜେନେଟିକ୍ସ ଆଣ୍ଡ୍ ଡେଭଲପମେଣ୍ଟାଲ ବାୟୋଲୋଜି’ ଏବଂ ବାୟୋଟେକ୍ନୋଲୋଜି କମ୍ପାନୀ ‘କ୍ୟୁଆଇ ବାୟୋଡିଜାଇନ’ର ଗବେଷକମାନେ ମିଳିତ ଭାବେ ଏହି ସଫଳତା ହାସଲ କରିଛନ୍ତି। ସେମାନଙ୍କର ଏହି ଗବେଷଣାପତ୍ର ପ୍ରସିଦ୍ଧ ବିଜ୍ଞାନ ପତ୍ରିକା ‘ସାଇନ୍ସ’ରେ ପ୍ରକାଶ ପାଇଛି। ବର୍ତ୍ତମାନର ଏକକ-ଫସଲ ଚାଷ ବ୍ୟବସ୍ଥାରେ ରୋଗ ସୃଷ୍ଟିକାରୀ ଜୀବାଣୁ ଓ ଭୂତାଣୁଗୁଡ଼ିକ ଦ୍ରୁତଗତିରେ ନିଜ ରୂପ ବଦଳାଉଛନ୍ତି। ଏହାଦ୍ୱାରା ଫସଲର ପ୍ରାକୃତିକ ରୋଗପ୍ରତିରୋଧକ କ୍ଷମତା ହ୍ରାସ ପାଉଛି। ଏହି ଜୈବିକ ଦୁର୍ବଳତା ଯୋଗୁ କୃଷି-ଜୈବ ନିରାପତ୍ତା ପ୍ରତି ବିପଦ ବୃଦ୍ଧି ପାଉଛି ଏବଂ ଏହା ‘ଏଗ୍ରୋ-ଟେରୋରିଜମ’ କିମ୍ବା ଜୈବ ଅସ୍ତ୍ରର ଆଶଙ୍କାକୁ ବଢ଼ାଇଦେଉଛି। ସାଧାରଣତଃ ନୂତନ ରୋଗପ୍ରତିରୋଧକ ଫସଲ ବିକଶିତ କରିବା ପାଇଁ ବର୍ଷ ବର୍ଷ ସମୟ ଲାଗିଥାଏ। ମାତ୍ର ଏଆଇ-ପରିଚାଳିତ ପ୍ରୋଟିନ ଡିଜାଇନ ଦ୍ୱାରା ଏବେ ମାତ୍ର କିଛି ସପ୍ତାହ ମଧ୍ୟରେ ଏହି କୃତ୍ରିମ ରିସେପ୍ଟର ପ୍ରସ୍ତୁତ କରାଯାଇପାରିବ। ଏହି ସିନ୍ଥେଟିକ ରିସେପ୍ଟରଗୁଡ଼ିକୁ ଗଛ ଭିତରେ ସ୍ଥାପନ କରାଯିବ। ଜୀବାଣୁ କିମ୍ବା ଭୂତାଣୁ ନିର୍ଗତ କରୁଥିବା ପ୍ରୋଟିନ୍କୁ ଏହି ରିସେପ୍ଟର ତୁରନ୍ତ ଚିହ୍ନଟ କରି ଗଛର ନିଜସ୍ବ ରୋଗପ୍ରତିରୋଧକ ପ୍ରକ୍ରିୟାକୁ ସକ୍ରିୟ କରାଇବ, ଯଦ୍ଦ୍ବାରା ରୋଗ ଆରମ୍ଭରୁ ହିଁ ନଷ୍ଟ ହୋଇଯିବ ବୋଲି ଗବେଷକମାନେ ଦାବି କରିଛନ୍ତି।