ଢେଙ୍କାନାଳ ଅଫିସ, ୨୨।୧୨ ଅମଳ ହୋଇ ଖଳାରେ ପଡ଼ିଛି ଧାନ। ଝାଳବୁହା ପରିଶ୍ରମର ମୂଲ୍ୟ ପାଇବାକୁ ଜଗିରହିଛନ୍ତି ଚାଷୀ। ଅଥଚ ଢେଙ୍କାନାଳ ଜିଲାରେ ମଣ୍ଡି କେବେ ଖୋଲିବ ଏବଂ କିପରି ଧାନ କିଣାଯିବ ତାହା ସ୍ପଷ୍ଟ ହୋଇପାରୁନାହିଁ। ଏପଟେ ଟୋକନ ଆସି ନ ଥିବାରୁ ପ୍ରଶାସନ ପକ୍ଷରୁ ନିର୍ଦ୍ଧାରିତ ୨୭ ତାରିଖରେ ଧାନ କିଣାଯିବ କି ନାହିଁ ତାହାକୁ ନେଇ ଚିନ୍ତାରେ ପଡ଼ିଛନ୍ତି ଚାଷୀ।
ଖରିଫ୍ ଧାନକିଣା ଆରମ୍ଭରୁ ଆରମ୍ଭ ହୋଇଛି ଅବ୍ୟବସ୍ଥା। ସରକାରୀ ମାନ୍ୟତା ଦାବିରେ ଓଡ଼ିଶା ସମବାୟ କର୍ମଚାରୀ ମହାସଂଘ ଡାକରାରେ ରାଜ୍ୟର ପାକ୍ସ, ଲାମ୍ପ୍ସ କର୍ମଚାରୀ ଆନ୍ଦୋଳନ ଜାରି ରଖିଥିବାବେଳେ ଧାନକିଣା ପ୍ରକ୍ରିୟା ବାଧାପ୍ରାପ୍ତ ହୋଇଛି। ଇତିମଧ୍ୟରେ ଜିଲା ପ୍ରଶାସନ ପକ୍ଷରୁ ଡକାଯାଇଥିବା ଏକ ଜରୁରୀ ବୈଠକରେ ଆସନ୍ତା ୨୭ ତାରିଖରେ ଧାନକିଣା ପ୍ରକ୍ରିୟା ଆରମ୍ଭ ହେବା ବୋଲି ନିଷ୍ପତ୍ତି ହୋଇଛି। ହେଲେ ସମବାୟ ସମ୍ପାଦକମାନେ ଆନ୍ଦୋଳନ ଜାରି ରଖିଥିବାରୁ ପ୍ରଶାସନର ଧାର୍ଯ୍ୟ ତାରିଖରେ ମଣ୍ଡିଖୋଲିବା ଏବଂ ସ୍ବାଭାବିକ ଭାବେ ଧାନ କିଣାକୁ ନେଇ ଅନିଶ୍ଚିତତା ଦେଖାଦେଇଛି। ଜିଲା ଯୋଗାଣ ବିଭାଗ ପକ୍ଷରୁ ସୋମବାର ବିଳମ୍ବିତ ରାତି ଯାଏ ଆନ୍ଦୋଳନରତ ସମ୍ପାଦକଙ୍କ ସହ ଆଲୋଚନା ହୋଇଥିଲେ ମଧ୍ୟ ନିଷ୍କର୍ଷ ବାହାରି ନ ଥିବା ଏକ ନିର୍ଭରଯୋଗ୍ୟ ସୂତ୍ରରୁ ଜଣାପଡ଼ିଛି। ଅପରପକ୍ଷେ ଧାନକିଣାକୁ ନେଇ ଚାପ ବଢୁଥିବାବେଳେ ପ୍ରଶାସନ ବିକଳ୍ପ ଖୋଜିବା ଆରମ୍ଭ କରିଛି। ଏଭଳି ସଙ୍କଟ ସମୟରେ ସ୍ବୟଂ ସହାୟକ ଗୋଷ୍ଠୀ (ଏସ୍ଏଚ୍ଜି) ଉପରେ ଭରସା କରିଛି ପ୍ରଶାସନ। ତ୍ୱରିତ ପଦକ୍ଷେପ ସ୍ବରୂପ ଯୋଗାଣ ବିଭାଗ ୫୬ ଏସ୍ଏଚ୍ଜି ସହିତ ଆଲୋଚନା ଜାରିରଖିଛି। ହେଲେ ଏତେ କମ୍ ସମୟ ମଧ୍ୟରେ ଏଚ୍ଏଚ୍ଜି ଚୟନ, ସେମାନଙ୍କୁ ପ୍ରଶିକ୍ଷଣ, ଆନୁଷଙ୍ଗିକ ବ୍ୟବସ୍ଥା କରିବା ସହଜ ନୁହେଁ ବୋଲି ବିଶେଷଜ୍ଞମାନେ ମତ ଦେଇଛନ୍ତି।
ସେହିପରି ଧାନକିଣା ପ୍ରକ୍ରିୟା ଚୂଡ଼ାନ୍ତ ହୋଇପାରୁ ନ ଥିବାରୁ ଟୋକନ ଆସିବାରେ ମଧ୍ୟ ଅହେତୁକ ବିଳମ୍ବ ହେଉଛି। ଏକକାଳୀନ ଟୋକନ ଆସି ପହଞ୍ଚତ୍ଲେ ମଣ୍ଡିରେ ଧାନକ୍ରୟକୁ ନେଇ ଅବ୍ୟବସ୍ଥା ବଢ଼ିବ ବୋଲି ଚାଷୀମହଲରେ ମତ ପ୍ରକାଶ ପାଇଛି।
ଏ ସଂକ୍ରାନ୍ତରେ ଜିଲା ଯୋଗାଣ ବିଭାଗ ଅଧିକାରୀ ନିରଦ ରଞ୍ଜନ ଦାସ କୁହନ୍ତି, ୨୭ ତାରିଖରେ ଜିଲାରେ ଧାନକିଣା ପ୍ରକ୍ରିୟା ଆରମ୍ଭ କରିବା ପାଇଁ ନିଷ୍ପତ୍ତି ହୋଇଛି। ସୋସାଇଟି ସମ୍ପାଦକଙ୍କ ଆନ୍ଦୋଳନ ଜାରି ରହିଥିବାରୁ ସମସ୍ୟା ଉପୁଜିଛି। ବିକଳ୍ପ ବ୍ୟବସ୍ଥା ସ୍ବରୂପ ଏସ୍ଏଚ୍ଜିଙ୍କୁ ଯୋଗାଯୋଗ କରାଯାଉଛି। ପ୍ରାଥମିକ କାର୍ଯ୍ୟ ଶେଷ ହେବା ପରେ ଟୋକନ ଆସିବା ସମ୍ପର୍କରେ ପଦକ୍ଷେପ ନିଆଯିବ ବୋଲି ଯୋଗାଣ ଅଧିକାରୀ ସୂଚନା ଦେଇଛନ୍ତି।
ସୂଚନାଯୋଗ୍ୟ, ଚଳିତ ଖରିଫ୍ ଋତୁରେ ଧାନ ବିକ୍ରି କରିବା ଲାଗି ଜିଲାର ୪୯,୩୫୮ ଚାଷୀ ପଞ୍ଜୀକୃତ ହୋଇଛନ୍ତି। ମୋଟ୍ ୧୧ଲକ୍ଷ ୩୦ହଜାର ୮୮୨ କୁଇଣ୍ଟାଲ ଧାନ କିଣିବା ଲାଗି ଲକ୍ଷ୍ୟ ଧାର୍ଯ୍ୟ ହୋଇଛି। ୭ ଏସ୍ଏଚ୍ଜିକୁ ଧାନକିଣା ପ୍ରକ୍ରିୟାରେ ସାମିଲ କରାଯାଇଛି।
