ନୂଆଦିଲ୍ଲୀ, ୨୯।୧୧: ଦକ୍ଷିଣ ଚାଇନା ସାଗର (ଏସ୍ସିଏସ୍)କୁ ନିଜର ବୋଲି ଦାବି କରି ସେଠାରେ ଆଧିପତ୍ୟ ଜାହିର କରୁଥିବା ବେଜିଂ ଏବେ ହିମାଳୟ ଅଞ୍ଚଳରେ ଅନୁରୂପ କୌଶଳ ଆପଣାଉଥିବା ଦେଖାଯାଇଛି। ପଡୋଶୀ ଦେଶର ସାର୍ବଭୌମତ୍ୱ ଦାବିକୁ ଅଣଦେଖା କରି ଚାଇନା ଏକତରଫା ଭାବେ ବାସ୍ତବ ତଥ୍ୟକୁ ବଦଳାଇ ବିବାଦୀୟ ଭୂଖଣ୍ଡରେ ନିଜର ସ୍ଥିତି ଜାହିର କରିବାକୁ ଉଦ୍ୟମ କରୁଛି।
ଗତ ଅକ୍ଟୋବରରେ ଚାଇନା ଜାତୀୟ ଦିବସ ବେଳେ ଏହା ଭୁଟାନ ସହ ସଂଲଗ୍ନ ତିବ୍ବତର ଚାଇନା ପାର୍ବତ୍ୟାଞ୍ଚଳରେ ଏକ ନୂଆ ଗ୍ରାମ ନିର୍ମାଣ ସମ୍ପୂର୍ଣ୍ଣ କରିଥିଲା। ତୋସ୍ରା ନଦୀକୂଳରେ ଅବସ୍ଥିତ ଏହି ଗ୍ରାମକୁ ଶତାଧିକ ଲୋକ ଯାଇ ରହିବା ସହ ସେଠାରେ ଚାଇନା ପତାକା ଉଡ଼ାଇଥିଲେ ଓ ଜାତୀୟ ସଙ୍ଗୀତ ଗାନ କରିଥିଲେ। ମହାନ୍ ମାତୃଭୂମିର ଆମେ ସମସ୍ତେ ସମାନ ବୋଲି ଜଣେ ସୀମା ସୁରକ୍ଷା କର୍ମୀ କହିଥିଲେ। ତେବେ ସମସ୍ୟା ହେଉଛି, ଏହି ଗ୍ରାମ ଭୁଟାନ ଭୂଖଣ୍ଡର ଏକ ମାଇଲ୍ ଭିତରକୁ ନିର୍ମାଣ କରାଯାଇଛି।
ବିସ୍ତାରବାଦୀ ଚାଇନା ନିର୍ମାଣ ସାଙ୍ଗକୁ ଏହାର ସାଟେଲାଇଟ୍ ଫଟୋ ଦସ୍ତାବିଜ୍ ଏବଂ ପ୍ଲେ-ବୁକ୍କୁ ବର୍ଷ ବର୍ଷ ଧରି ବ୍ୟବହାର କରିଆସୁଛି। ଦକ୍ଷିଣ ଚାଇନା ସାଗରରେ ମଧ୍ୟ ବେଜିଂ ଅନୁରୂପ କୌଶଳ ଆପଣାଇଥିଲା। ସେଠାରେ ଭିଏତ୍ନାମ ଓ ଫିଲିପାଇନ୍ସ ଦାବି କରୁଥିବା ଜଳଭାଗରେ ଚାଇନା ନିଜର ସାମରିକ ଶକ୍ତି ବୃଦ୍ଧି କରିଛି। ଚଳିତବର୍ଷ ଚାଇନା ହିମାଳୟ ଅଞ୍ଚଳରେ ଏହାର ନିର୍ମାଣ କାର୍ଯ୍ୟ ଜାରି ରଖିବା ସହ ଭାରତୀୟ ଅଞ୍ଚଳକୁ ନିଜର ବୋଲି ଦାବି କରୁଛି। ଏହାକୁ ନେଇ ଗତ ଜୁନ୍ରେ ଏଲ୍ଏସିରେ ଦୁଇଦେଶର ସୈନ୍ୟଙ୍କ ମଧ୍ୟରେ ରକ୍ତାକ୍ତ ସଂଘର୍ଷ ହୋଇଥିଲା। ଏହି ସଂଘର୍ଷରେ ଭାରତର ୨୧ ଯବାନ ଶହୀଦ ହୋଇଥିବାବେଳେ ଚାଇନାର କେତେଜଣ ମରିଥିଲେ ତାହା ସ୍ପଷ୍ଟ ହୋଇନାହିଁ। ଏହି ସଂଘର୍ଷ ପରେ ଦୁଇ ଦେଶର ସମ୍ପର୍କ ତିକ୍ତ ହୋଇଛି। ଚ୍ୟାଲେଞ୍ଜ ସତ୍ତ୍ୱେ ଚାଇନାକୁ ଉକ୍ତ ସ୍ଥାନରୁ ହଟାଇବା କଷ୍ଟକର ହୋଇପଡ଼ିଛି। ସୀମା ବିବାଦ ସତ୍ତ୍ୱେ ଚାଇନ ସୈନ୍ୟ ଏକଦା ଭାରତ ନିୟନ୍ତ୍ରଣରେ ଥିବା ଅଞ୍ଚଳରେ କ୍ୟାମ୍ପ ପକାଇ ରହିଛନ୍ତି। ଶେଷରେ ଯାହା ଜଣାପଡ଼ୁଛି, ଉକ୍ତ ଅଞ୍ଚଳ ଚାଇନା ନିୟନ୍ତ୍ରଣକୁ ଆସିଯିବ ବୋଲି ମାସାଚୁସେଟ୍ସ ଇନ୍ଷ୍ଟିଚ୍ୟୁଟ୍ ଅଫ୍ ଟେକ୍ନୋଲୋଜିର ସୁରକ୍ଷା ଅଧ୍ୟୟନ କାର୍ଯ୍ୟକ୍ରମର ନିର୍ଦ୍ଦେଶକ ତଥା ଚାଇନା ମିଲିଟାରୀ ବିଶେଷଜ୍ଞ ଏମ୍. ଟେଲର ଫ୍ରାଭେଲ୍ କହିଛନ୍ତି।
ଗତ ବର୍ଷେରୁ ଊର୍ଦ୍ଧ୍ୱ ହେବ ଦେଖାଯାଉଛି, ଚାଇନା କୂଟନୈତିକ କିମ୍ବା ଭୂରାଜନୈତିକ ପ୍ରମାଣକୁ ଅଣଦେଖା କରି ଆକ୍ରମଣାତ୍ମକ ଭାବେ ବିଭିନ୍ନ ପଡୋଶୀ ଦେଶର ସୀମା ମଧ୍ୟରେ ପ୍ରବେଶ କରୁଛି। ଉକ୍ତ କାର୍ଯ୍ୟ ଚାଇନା ନେତା ଶି ଜିନ୍ପିଙ୍ଗଙ୍କ ବିସ୍ତାରବାଦୀ ଅଭିଳାଷ, ଅର୍ଥନୈତିକ ସ୍ବାର୍ଥ ଓ ରଣନୀତିକ ଆବଶ୍ୟକତାକୁ ପ୍ରତିଫଳନ କରୁଛି। ହିମାଳୟ ଅଞ୍ଚଳରେ ଗାଁ ନିର୍ମାଣ କରିବାରୁ ସୂଚନା ମିଳୁଛି, ଚାଇନା ଏହାର ଦକ୍ଷିଣ ସୀମା ଭିତରେ ଭୁଟାନକୁ ରଖିବାକୁ ଚାହୁଁଛି। ଦୀର୍ଘଦିନ ହେଲା ବିବାଦୀୟ ରହିଥିବା ଉକ୍ତ ଅଞ୍ଚଳର ୩୦୦ ବର୍ଗମାଇଲ ପରିମିତ ସାକ୍ଟେଙ୍ଗ ବନ୍ୟପ୍ରାଣୀ ଅଭୟାରଣ୍ୟକୁ ମଧ୍ୟ ଚାଇନା ନିଜର ବୋଲି ଦାବି କରିଛି। ସୀମାବିବାଦର ସମାଧାନ ଲାଗି ଦୀର୍ଘବର୍ଷ ହେଲା ଆଲୋଚନା ଚାଲିଥିଲେ ହେଁ କୌଣସି ଫଳ ମିଳୁନାହିଁ।
ମେରାଇନ୍ କମାଣ୍ଡୋ ନିୟୋଜିତ କଲା ଭାରତ
ପ୍ରକୃତ ନିୟନ୍ତ୍ରଣ ରେଖା (ଏଲ୍ଏସି)ରେ ଭାରତ ଓ ଚାଇନା ମଧ୍ୟରେ ମୁହଁାମୁହିଁ ସ୍ଥିତି ଲାଗି ରହିଥିବାବେଳେ ପୂର୍ବ ଲଦାଖର ପଙ୍ଗୋଙ୍ଗ ହ୍ରଦ ଅଞ୍ଚଳରେ ଭାରତୀୟ ନୌସେନା ପକ୍ଷରୁ ମେରାଇନ୍ କମାଣ୍ଡୋ ନିୟୋଜିତ କରାଯାଇଛି। ଉକ୍ତ ଅଞ୍ଚଳରେ ଭାରତୀୟ ବାୟୁସେନାର ଗରୁଡ଼ ବାହିନୀ ଏବଂ ସ୍ଥଳସେନାର ପାରା ସ୍ପେଶାଲ ଫୋର୍ସ ବିବାଦ ଆରମ୍ଭ ଦିନରୁ ମୁତୟନ ରହିଛନ୍ତି। ମେରାଇନ୍ ମାଣ୍ଡୋର ଉପସ୍ଥିତି ତିନି ବାହିନୀ ମଧ୍ୟରେ ସମନ୍ବୟ ବଢ଼ାଇବ। ଗତ ଏପ୍ରିଲ୍-ମେ’ ମାସରେ ପଙ୍ଗୋଙ୍ଗ୍ ହ୍ରଦ ଅଞ୍ଚଳରେ ଭାରତ ଓ ଚାଇନା ସେନା ମଧ୍ୟରେ ବିବାଦ ସୃଷ୍ଟି ହୋଇଥିଲା। ନୌସେନା କାମଣ୍ଡୋମାନଙ୍କୁ ଉକ୍ତ ହ୍ରଦରେ ପାଟ୍ରୋଲିଂ ପାଇଁ ନୂଆ ବୋଟ୍ ଯୋଗାଇ ଦିଆଯିବ।
